香芋南乳燜豬手（食譜）

尋日雖然係周日，不過強哥有個地盤開緊工，強哥都要係屋企開工趕起啲圖，所以無得出街，唯有自己同自己玩。

將廚房底下大廚櫃啲嘢大拾位，重新安排擺位之後，挪出好多餘位，睇落清爽同就手好多。

尋日成日強哥都係書房埋頭畫嘢，除佐時不時走入去錫佢兩嘴，我都無乜去打擾過佢，期間總走去樓下買佐啲材料煮飯仔，費事行太遠買餸，求其係惠康買啲肉返嚟就算。

見豬手幾靚，咁就買佐盒返嚟，想整南乳蓮藕燜豬手，不過無得蓮藕買，見有芋頭，咁就買佐半邊返嚟試下用芋頭燜，應該都好香。

所以老公係書房有佢忙，我都有我係廚房玩。

玩佐一個香芋南乳燜豬手。

材料超簡單，如下圖所示：

「豬手一盒、芋頭半邊、薑同蒜適量、南乳兩磚（細舊）」

 

做法：

1，先落油熱鑊，倒入切成大塊嘅芋頭煎一煎到表面略帶金黃，另外置碟以備用

 

2，將清理干凈毛發嘅豬手，入鑊煎一煎（或飛水亦可）

 

3，倒入蒜同薑爆香，然後倒入南乳慢火用油煎出香味

 

4，倒入豬手同芋頭，加「蠔油、生抽、冰糖、紹酒」炒勻味道