自製茶果---菠蘿茶果、椰蓉茶果

蒸椰蓉糕，我屋企嘅叫法，好突然先醒起，出邊啲人咪係叫佢「茶果」嘅果一樣嘢囉~~~

阿媽刨佐新鮮椰蓉俾我，所以今日就整佐幾個茶果仔做早餐食。

整茶果其實真係唔係好難，我三幾下就整好十幾隻啦。

睇下，新鮮蒸好嘅茶果~~~

白色就係純糯米粉，紫色係溝佐黑糯米粉，黃色係加佐菠蘿香油

阿媽整，總會加埋斑蘭精，整到翠綠色，好靚㗎~~

睇下我點樣用半個鐘就整好個茶果仔啦~~~

首先將幾塊棕葉烚一烚軟身，因為我無買到蕉葉，所以就用屋企凈抵有嘅幾塊棕葉代替，效果一樣咁清香㗎~~~

然後將烚軟嘅棕葉煎成一個個略圓形，上邊抹少少油待用。

餡我係早一晚提早整好嘅。

係街市買佐磅青島烤花生，直接就係好香脆嘅原味花生嚟，將花生舂碎，然後同略炒過嘅新鮮椰蓉撈勻，再加黑糖俾個甜味。

（椰蓉阿媽用少少黑糖同少少椰漿再炒一炒，咁樣嘅椰蓉食起上嚟會再香好多㗎）

因為個茶果嘅皮係無味嘅，所以個餡就要俾甜味先會好食。

睇下，阿媽俾佐一包黑糯米粉俾我，佢話無意中買佐依包粉，試整之後發覺口感同味道都非常good喎，咁就買包過我試下。

因為個黑糯米粉一煮熟會好黑，所以阿媽提醒我，要溝白糯米粉入去。

我用佐三分一嘅黑粉，三分二係白糯米粉。

整法好簡單啦，直接衝滾水入去，增加粉嘅張力。（可參考我以前整糯米糍嘅文章，其實依個茶果根本就係糯米糍的另一种整法）

整好個皮，直接咁包餡入去，埋口，放上擦佐油嘅棕葉上

菠蘿油係印尼商店買，都係色素嚟㗎啦，少食應該都無妨瓜（自我安慰）

阿媽都食佐七十幾年啦~~~~

然後，將自己整嘅菠蘿果醬包入去~~~

（強哥係菠蘿怪，我係咁意嘗試下包菠蘿餡入去，佢竟然贊不絕口，不過凍食，又真係幾過癮~~~）

睇下，三種色嘅粉團~~~

三幾下就包好十幾隻啦~~~

包好之後，生茶果表面都要擦少少油落去。

實不相瞞，我都係第一次自己整咋，以前想食都係叫阿媽整，不過睇嚟都幾有天份嘅~~~哈哈哈，整得幾似阿媽整果啲~~~

蒸十分鐘就搞掂~~~~

不過我估唔到嘅係，佢一蒸好，就扁佐落嚟，我預嘅空間唔係好夠，所以有幾個痴埋添，失策~~~不過好彩我表面都有擦少少油，所以好易就分得開。

同埋我整得個皮太薄啦，有幾個蒸好之後爛佐個表皮添，下次整個皮要厚啲先得~~~

睇下，蒸好之後，個色澤即刻走佐出嚟，好靚㗎~~~

 

我最鐘意係椰蓉味，強哥至愛係菠蘿果隻，雖然個皮係薄佐啲，不過都好好味啊，以後想食，可以自己整啦~~~

 

其實雞屎藤茶果，係咪都係類似嘅做法咧？