自己刨椰絲

奶奶俾佐一舊自己整嘅魚塊，尋晚就炒佐佢做餸。

雪櫃無乜配料，就簡單地切佐半截甘筍，一扎蔥咁。

調味方面，就用佐蠔油同蒜蓉豆豉俾味。

 

我雖然一早知道整魚餅嘅過程，不過自己一直沒嘗試過，奶奶整魚餅多數會用「膠魚」嚟整，唔洗落粉，整出嚟嘅魚餅係好彈牙㗎，過佐年，我都整一次嚟試下。

 

 

另外用肉碎炒佐個紹菜，好清甜。。。。

尋晚就兩味餸，簡單又好味~~~

-----------------------------------------------------

我話想食椰絲糕，就俾電話叫阿媽整俾我食，點知阿媽調轉頭話「做法你都知啦，自己試學下，以後想食就唔洗靠阿媽了嘛」

所以阿媽就專程送佐自己刨嘅新鮮椰絲過嚟俾我，不過糕點就要靠自己整啦。

新鮮刨好嘅椰絲同市售乾嘅椰絲，味道有天淵之別，食過新鮮椰絲，對於乾嘅椰絲真係無乜興趣。

搵返幾年前影過嘅相，俾大家睇下我屋企刨椰絲嘅工具。

出邊基本上無得賣㗎，依個工具。

係舅父好多年前整俾阿媽嘅。

個形狀係咪好得意咧，好似個龜咁喎。

靈魂係頂果舊刀頭，不銹鋼做嘅，阿媽係香港搵佐好耐都搵唔到，後嚟托印尼嘅親戚寄過嚟，先整到依個工具㗎。

刨嘅時候，人就座係四方形嘅「燈」仔上，然後將椰子放係刀具上旋轉咁刨。

放大嚟睇下，個刨頭就係咁啦。

講個阿媽細個時食椰子嘅故事。

椰子樹通常都好高㗎嘛，咁人仔細細嘅阿媽，有時出去玩到口渴，想食椰子，又唔敢爬得太高，咁點算咧。。。。

講緊係六十幾年前嘅印尼，當時人少車少，所以生活嘅地方，動物同人類都生活得好接近，所以椰子樹上，通常都會有好多馬騮係度玩，咁百厭嘅阿媽，想食椰子嘅時候，就會用石仔去打樹上嘅馬騮，馬騮係好聰明嘅動物，睇到人類用工具去掉佢，咁佢又識得學人類咁，又用工具去掉返人類喎，咁係樹上嘅馬騮，隨手可搵到嘅工具，咪就係好靚嘅椰子囉，所以馬騮睇到阿媽用石仔打佢，即刻又摘個椰子落嚟，掉返阿媽。

咁阿媽識得避開㗎嘛，一撿起馬騮掉落嚟嘅椰子即走，咁就可以不費吹灰之力，就有新鮮嘅椰汁飲啦。。。。

~~~~~~~~~~

刨嘅時候，將個老椰子係咁轉，椰絲就會走出嚟㗎啦。

我嘅手勢唔熟，刨得好醜樣。阿媽刨得好靚㗎，而且阿媽開椰子嘅手勢好鬼叻，用刀背拍幾下個椰子，就可以將椰子一分為二啦，好彩強哥都同阿媽學識佐點樣開椰子殼啦。

新鮮刨嘅椰絲，好多汁，好清甜，同埋好香㗎。。。。。

用返幾年前嘅圖片。

可能好多人係泰國旅行都試過芒果糯米飯。

其實糯米飯除佐配芒果依個食法，印尼人總鐘意用新鮮刨嘅椰絲，落少少鹽（落鹽更能帶出椰子嘅清香同鮮甜），然後配糯米同食。

咁樣食法，非常清楚地食到糯米的軟糯清香，配以椰子獨有嘅清香，非常一流~~~

 

而且，推薦食嘅時候，用「大、食、中指」三隻手指去攝住一舊仔嘅糯米飯，再均勻地沾上一層椰絲嚟食，咁樣用手食法，更加地滋味無窮，同用筷子食，感受又係完全唔同㗎。。。。

同阿媽最鐘意咁樣一人一碟糯米飯，座係地板上，用個手慢慢一邊食一邊講下八卦，其樂無窮~~~