小菲菲俠自煮樂

29 4月, 2009

五香鹵排骨食譜

禮拜日果日約佐表姐來我度拎D野,同埋去行下街。


因為表姐平日要返工都無乜時間煲湯,咁約佐佢黎我度,當然會煲返煲靚湯過佢飲下啦,除佐煲啖湯俾佢飲,我總整佐一味餸俾佢帶返去夜晚做餸,咁佢行完街就唔使再咁辛苦諗夜晚煮咩餸,晚餐時,炒多個菜就可以開飯啦。


本黎係想整煲咖喱牛腩俾佢架,不過上次有網友問我整鹵水排骨既食譜,咁就索性整依味餸,寫埋個食譜俾有興趣既朋友參考下啦。


做法:


1,排骨先飛一飛水,水入邊落佐一粒八角,一粒薑,少少酒。



 


2,準備材料「蒜頭幾粒,八角一粒,香葉一塊,草果半粒,桂皮細細一粒,花椒適量」


 


咁香料既多寡主要由材料而決定,我用佐兩磅排骨,咁唔想個味太過於濁,所以落得香料都唔係好多。



3,鑊里落少少油,先爆香個花椒,等個油帶有花椒既香味,煎到花椒有少少農農地就得啦。凈係個油帶有花椒味,所以煎佐既花椒要撈起棄用。


因為我係用快速煲黎整排骨,所以直接係個煲度處理排骨烹製既過程。個煲好厚底,可以直接係度炒餸都無問題架。


 



 


4,將所有材料扔入煲度,落生抽老抽黑糖較味。


為佐更香,我再落佐幾粒生既花椒落去一起燜。


 



5,然后落水,開火,燜啦。。。


咁係依度就有一個區別啦,因為我係用高速煲黎燜,咁就直接開火半個鐘度,就已經將煲排骨燜得好腍啦,係腍到D骨頭都可以用牙咬得碎果隻啵。


如果係用普通既鑊燜排骨,想燜到「入口即融」果種口感,咁就要燜既時間略長少少先至得啦。


同埋燜野個小小竅門,就係開火燜得半個鐘度就可以熄火焗住佢,然后又再開火燜一陣,再熄火焗,咁焗得一陣,基本上就已經食得,D排骨都好腍架啦。。。。


總之無論係燜排骨或者牛腩都好,最緊要係燜野唔好一味死開火燜,要燜下熄火焗下再開火燜下,咁D肉就好易燜腍架啦。。



睇下,用快速煲,煲得靚靚既排骨。。。。


燜到差唔多時間要開蓋睇住火,燜到收汁。。。。


快速煲係唔可以干燒架。。。。



二磅排骨,燜好都係得一煲仔咋。。。。


不過依D好易送飯又比較流既餸,一煲仔已經足夠兩公婆食有突啦。。。



 



---------------------------------------------------------


咁個排骨既做法就係咁簡單啦,如果唔想凈係肉咁流,可能係未收汁之前,落D薯仔或者冬菇,咁就變成「薯仔燜排骨或者冬菇排骨煲」啦。。。。


第二晚我又買佐D排骨,用個基礎既燜排骨方法燜佐一煲,再加兩個薯仔落去,咁就係一味香噴噴既薯仔排骨煲啦~


 



 


再炒多一個青菜,搞掂~~



 


 


 


 


住家餸菜

冰封億年的北極冰雪日漸消融,速度以幾何數字進行,影響係牽一發而動全身的,全世界都將受其影響。


曾想像,億年之前,冰何世紀的形成,根本係由地球自身為著自救而衍生出來的一種行為,以極低溫度將所有傷害地球的生物一併冰存起來。億年之後,隨著系列的環境問題,北極加速自身的融解速度,而隨之而來既,係冰封佐億年之前的不知名細菌,也一並隨之復蘇。吏前細菌隨著北極的水一路註入大海,流向世界。


所以孩子氣的暗自認定,曾經肆虐一時,讓國人聞之色變的沙士,包括日前傳得沸沸揚揚的“豬流感”,以及一些出現得莫名其妙,不可解釋的細菌,都係經由果D被放出來的史前細菌尼。。。。恐怖。。。。


!!~~~


轉下channel,講起沙士,當年沙士暴發之前既一個月,剛剛去北京玩佐一轉。返黎後唔夠一個月北京就開始大面積暴發沙士,如果遲少少返黎,睇怕就要繼續留係果度多幾個月了。


其間去故宮玩佐一次。總發生佐一D不可解釋的事件。


係故宮遊玩的期間,一直有陣揮之不去的寒意,返黎既當晚,在酒店就又瀉又嘔佐成晚,當時帶去既係入菲林既相機,返到黎曬相之後先發覺,所有D像都無問題,偏係在故宮影的果輯像,曬出來的,全是白蒙蒙的一片。。。。。


 


依家諗返,都幾驚驚下的。。。。


------------------------------------------------


回播一下上星期某幾日的餐單。


星期三:辣椒蛋、脆肉瓜炒臘腸


本來係打算返奶奶度食飯咯,特意整佐個新菜式打算帶返去俾全家人嘗試下,點知臨時有事,返唔成,整好的印尼炸辣椒蛋,只能係屋企同強哥獨享,制作的過程圖都無影低,咁只簡單的講下,俾有興趣的朋友可以嘗試一下。


 


作法:1,雞蛋白水煮熟之後剝皮,油炸表皮略見焦黃。


2,將唔辣的紅色辣椒與紅蔥頭舂碎撈勻,用油煎出香味,落“咖喱粉,白醋,糖,醬油,花生醬”較味。



 


食的時候,將蛋對半切開,伴以步驟2的醬料同吃。。。。


淡淡的辣意,淺淺的甜酸,濃濃的異香,配以外酥內滑的雞蛋,非常一流。。。。



再炒多個脆肉瓜炒臘腸,搞掂。。。



 



星期四:檸檬鴨胸肉、脆肉瓜炒肉碎,昆布豆腐湯


偶然係一間凍肉舖發現有賣日式生鴨胸肉,即刻買佐包返黎,一包二舊,足夠一餐食用。凍肉舖如果留心搵,真係幾多野可以買到,而且售價絕對平過超市好多,以后真係要多D留意下總有無乜野特別野。。


上次整檸檬鴨,用既係鴨亦,強哥唔識吮骨,食到佢愁眉苦面,咁依次用鴨胸啖啖肉,全無骨頭可言,咁就適合晒佢啦。。。


作法以前寫過,就唔重復了。。



 


實在太入味了。。。。細細一片仔既鴨肉已經可以送佐半碗0既飯。。。。太誇張。。。所以區區二塊鴨胸肉,竟然一餐都食唔晒啵。。。。



上次買佐份脆肉瓜,之前一晚炒佐一條,依晚炒埋凈返果兩條,又一碟餸~~~



一舊豆腐加埋D昆佈,少少肉碎,加二勺味噌醬,好簡單,又好好味既一煲滾湯。。。。



 


星期五:沙葛炒檸檬鴨、甘筍粟米湯、菠蘿炒牛肉


買佐一個沙葛整沙葛肉包做早餐,剩返半舊,愛黎同之前一晚食凈果D檸檬鴨一起炒埋一碟,酸酸香香,加埋沙葛本身夠爽脆香甜既口感,又真係幾開胃啵。。。。



早排做佐次Body Check,好好彩,身體各處都好健康,血液都好乾淨好健康,人過佐三十歲,漸漸覺得,世上乜都係假既,至緊要係有一個健康既身體,比乜野都真實與寶貴。所以每年都會做一次身體檢查,對於身體既狀況有個基本既了解,就係愛護自己既最好方式。


平日無乜點去食D貴價滋補品,但係湯水,一定要經常煲黎俾家人飲用,同埋每日都會進食生果,促進腸胃消化,去除身體隔宿之毒。


依日煲佐一個老火湯。



 


我煲既湯水,幾時都係咁濃郁美味。。。。。



 


本黎要炒一個菠蘿炒牛肉既。用既係一條牛腱。


切既時候已經可以味到好香既牛味。



因為聽聞菠蘿里邊既果酸可以好有效咁去鬆化牛肉里邊既筋脈,咁依次醃牛肉,除佐例牌既蒜蓉同薑絲,總加埋一碗仔既菠蘿。



點知,可能係我醃既時間太長,(我醃佐怕有三四個鐘咁耐),而個果酸真係太勁,個牛肉一落鑊炒,竟然全部梅佐,牛肉味都無晒,似果D用佐過多鬆肉粉拉過既牛肉咁,勁失敗。。。


咁既野點擺得落口啊,未上碟,就全部扔佐羅,唯有煎多二個荷包蛋頂住羅。。。。


 


所以,係度用自己失敗既經驗話俾大家知,菠蘿真係可以好勁既鬆到D肉架,但真係要掌握好個時間,唔好醃得太耐。。。。。


 



 


 


柴魚花生粥、梅菜蒸肉餅、炒銀針粉

清清D,整返煲粥。


柴魚花生粥,加埋D魷魚落去,鮮美。



蒸埋二個咸蛋



蒸多碟梅菜蒸肉餅



係咁易,又一餐。



第二日食凈大半煲粥,咁就蒸多份銀針粉(做法以前寫過)黎炒送粥。


之前有網友問過我,如果疊埋蒸D銀針粉得唔得,咁依次我就試做,係咁亂擺埋蒸,原黎係得啵,熟佐都唔會痴埋架。。。最緊要搓好既生面要撈一撈D油。



加埋少少配料,又一碟。。。



好香架。。。。



 


 


23 4月, 2009

好玩,玩下好

係網友度發現一個網址,可以好輕易,一個步驟搞掂「換臉」動作,試玩下,出黎既圖片真係勁搞笑。。。。


有興趣的可以進入以下網址:http://www.photofunia.com/


 



 



 


 



 


 


20 4月, 2009

去濕湯水--冬瓜意米湯、肉醬焗茄煲、加多加多青瓜

尋晚夢中有巨大蝶形怪獸出現,舉城混亂,人們四處逃竄,只求自保,軍方以大炮火箭都無法對付,只見自己化身神奇女俠,以洗潔精加入家用漂白水勾兌自制成為最新生化武器,追逐怪獸來至一處遊樂場所,在一臺遊樂設施之下,對準怪獸噴射自制生化武器,怪獸觸之即化,三下兩下解決全城困境,頓獲掌聲一片,幸夢中性格亦屬低調與熱腸,只見自己謙虛地向一眾媒體極力否認功勞之余,只介紹最新家用洗潔精,平日除可做清潔之用,遇上怪物亦可取之自保,實屬家居必備之物。。。


英雄夢醒,只能感喟一聲,原來連發夢,都可以盡顯主婦本色,自制武器,亦屬家庭用品,看來師奶一職,已根深蒂固,此後將伴隨一生。


今日英雄主婦為家中成員煲佐一款極適合依家天氣飲的湯水。


冬瓜癔米湯。


依段時間濕氣好重,整個人感覺四肢乏力,臉部浮腫,D衫總有一股濕濕不盡幹爽的感覺,而哩款湯水,冬瓜有極好的利尿去水腫功效,癔米又係最好的去身體濕氣的食材,所以兩者結合著煲佐黎來飲,在現在的天氣來講,真是最恰當不過。


 


材料:


冬瓜,瘦肉(阿娘話我成日用骨頭煲湯,係慢性自殺,話飲多佐身體既膽固醇會增高,因此叫我以後煲湯最好選用一般瘦肉即可,沒乜油,又會有肉的甜味,所以今次煲湯就凈係買佐細細細細一舊的瘦肉),一細碗仔的癔米,因為肉比較少,為了增加鮮香度,我切了幾片雲腿入去,再多幾幾粒瑤柱。



擺入高速煲,開火煲吧。。。。


一碗靚靚的濃湯。。。。


同埋,依個湯我一點鹽都唔落架。


因為雲腿與瑤柱本身都帶有鹹味,所以依款湯水煲出來之後,淡淡的鹹味,更能品嘗出湯水裏邊所有材料本身具有的清甜與鮮香。



 


有人話,煲湯一定係要用瓦煲慢火煲三幾個鐘以上先至叫靚湯。


但係未必個個師奶都有咁多時間去睇住煲湯,可能係要收佐工先至返黎整飯,邊有咁長時間去慢慢等。


其實我就覺得如果煲既時間足夠,材料夠豐富,用高速煲一樣可以煲出同傳統煲法既老火湯不相伯仲既靚湯出黎。



睇睇下圖,濃唔濃?用不銹鋼高速煲煲佐一個鐘。真係好濃好濃郁的一煲湯水,因為自家煲的湯水料足時間夠,不添加味素,飲落D湯水,濃而不濁,有一種好清甜,好舒服咁滑落喉的感覺。


 


而且用瘦肉來煲湯,真係無乜油。。。。


極為清爽的一道湯水。。。


 



今日預佐係要整肉醬茄子。


只不過茄子就唔同以往,簡單地切成條狀,而係用蓑衣刀法去切佢,不過因為係第一次切,所以功夫未到家,一個唔小心,就切斷佐。。。。


切好既茄子拍少少粉,落油鑊炸軟。



然后擺入煲度。


如果唔切斷,咁擺入個煲仔入邊,會好似一條龍咁,散開之餘又連埋一起,好靚架。。。。



因為無乜好送飯既餸,所以我煮肉醬既時候就將肉醬整得濕少少,咁愛黎撈飯都好一流。。。。


肉醬我就係簡單地用薑蒜蓉爆香個鑊,然后倒入免治豬肉炒斷生,跟住落豉油蠔油糖較味,起鑊前埋個芡,倒入煎碎佐既大量芫莤,香晒~~~


將肉醬淋係茄子上邊就得啦。。。


 



實在好似無乜太多心機整餸,係咁易,切佐條青瓜,切絲,然后再淋上開好既「加多加多」醬上去,撈勻可食。。。。


 



 


係咁多~~


19 4月, 2009

印尼椰香曲奇餅製作

 


取其同音字譯,“歸般結”。一種印尼華人都喜歡制作的餅仔。


 細細個果陣時,只有逢年過節屋企先會制作一大堆分與一眾親友共享,每到年底媽媽與爸爸合力制作這款餅幹的時候,怕是因為集聚了一年的期待,因此每次享用這款點心的時候,總是珍之重之。


已是去年七月份的事情,回過媽媽那兒,特意做了一次這款小餅幹用以解饞。


期間發生了一件對我傷害到了極致的事情,雖已過去將近一年,然,每每想起當時種種,胸腔似乎仍有一只惡爪毫不留情地扯住心房拼命往外拉扯的難受之意,不想面對,不願回想,甚至不願多提。


只是很清楚知道,心房最深的某處黑洞已然形成,窮我一生,怕是都無法再讓陽光射入。。。。。


雖然遺憾,但深深知曉傷害已經造成,填補之後再也無法圓滑如初,因此索性坦然地讓陰影留滯胸腔,甚至不願意用隨緣二字代替模糊不清的情緒問題,好清楚再也無法挽回的信任關系,愈加肯定了自己未來對待彼此關系的方向。


它日實在避無可避之下的接觸,只願自己能夠坦蕩大方地表現出自己應份之內的權利與責任,已屬最好。


-------------------------------------------------------------


 
牢騷足夠,繼續食譜。


需要直到今日才能整理當時的一些照片,用以記錄這個食譜。


頭先專登打過電話俾媽咪確認佐份量與作法。


其實依個就係我每一道親手制作過的菜式與點心都需勤加記錄的原因。


實在我係一個無乜小記性的人,好多細節總會遺漏,因此加以拍照記錄,最是一流,幾時想要再制作卻又忘記了作法,只需上自己既BLOG搜索記錄即可~~~


與人方便,自己方便`~~


---------------------------------------------------------------------


所有的制作材料:


具體的份量與作法:(過程圖比較多也比較混亂,所以我就將作法與份量都寫埋一切,有心人,自能慢慢看出個究竟來)


1,必需用木薯澱粉才能出來同樣的效果與味道,這第一次做,我就用了一包開過用過的粉,大約四百克。


2,木薯澱粉先用白鍋(就是幹凈幹爽的炒菜鍋),炒熟澱粉,怎麼判斷熟了沒有?大約就是澱粉變得極輕極輕,而且能聞到香味,顏色轉成淡淡焦黃色即可,這個就真的要靠個人經驗去判斷了。多試幾次,總能找到要訣。


3,平日做這道餅幹,一般一包五百克的粉阿娘會用一包半的椰子粉,我依次整,用的粉一斤唔到,所以只開佐一包的椰子粉,用篩將椰粉與澱粉拌勻,這一道過篩的步驟,可以讓粉散得更好更均勻。


4,一般一斤的粉用四五個雞蛋,粉與糖的比例是一斤的粉就用八兩的糖.不過媽媽嫌太甜,所以往往是一斤的粉,只用六兩的糖.



 


5,然後將雞蛋與糖打發,當初我買手動打蛋器既時候順便買佐一個俾媽媽,所以果次係媽媽度,用的也是同我平日用的同一款打蛋器,非常方便,因為有糖的關系,打既時間比較長D,大約用佐四五分鐘,先至打到發起.


 
然後將打發的蛋液,逐點倒入拌好的薯粉裏,所以基本上很難講用幾個雞蛋,阿娘一般都係有經驗佐,估計粉的多寡而決定放幾個蛋,因為整個制餅過程係完全不能加水的,靠既就係雞蛋去開粉,所以如果覺得粉多的話就多打個蛋入去,依個沒乜野太大的影響.



睇下,四百克就整到咁細細一舊面團。。。


雖然凈係細細一舊面團,其實已經可以整到好多既餅仔啦。



個模具係阿媽係印尼帶返黎架,好似我係香港既印尼商店搵唔到。


整好面粉,個製作方式就好簡單啦,將面團塞入個圖形入邊,掃平個底壓一壓實佢,然后再大力拍出黎,咁一個餅仔就整好出黎啦。


木制既模具雕刻較深,所以印出黎既餅仔形狀好清楚,不過亦都因為太深,所以拍出黎經常會有D面團痴住係個模度。


 



睇下,係未好趣致咧。。。。



另一個模具係塑膠啤出黎加要,個印就比較淺D,個好處就係好易脫模,壞處就係整出黎既形象無咁清晰。



睇下,依個公仔係一個背住手既壽星公來架。。。。


好細好細一個,一蚊硬幣都大過佢好多。。。



睇下我同阿娘既地下小型加工場。。。。整佐幾多餅仔。。。



唔想晒電,咁就兩盤一起入焗爐,二百度火,焗十幾分鐘。


焗既時間唔好行開,一聞到香味,見個餅仔顏色開始有少少變色就好即刻熄火羅出黎攤凍。


阿媽話焗到有香味出黎,而個餅仔保持係白雪雪既狀態就謂之一流啦。但係我較為鐘意焗到有少少農農0地較為香口,所以就焗得稍稍耐少少。



順便睇下,姐夫設計俾媽咪擺焗爐既櫃,平日收埋刪埋個櫃門,完全睇唔出係乜,而個櫃門就可以90度打個轉,收番入側邊,方便擺焗爐D拖板可以完全拖出黎,平日要用邊只就拖邊個出黎用,好方便使用同貯藏。



焗好啦。。。因為雞蛋係打發既關係,所以焗好既餅仔會有少少脹大,剛剛焗好既餅仔要攤一攤凍再入袋,因為剛焗好總熱辣辣既餅仔唔會定型,好易整斷。



睇下個餅仔,發得好好。。。。



細細一粒,食相優雅。。。。。



依款餅仔,細個初食時,真係驚為天人,竟然可以鬆化若此,真係毫不誇張咁講,入口即化,同埋食完之后滿腔既椰香,真係由頭至尾既滿足。。。。


如果嫌製作辛苦,大家可以去印尼商店買整好既一盒盒返黎試下。。。


我既推薦,絕不會錯。。。。。