小菲菲俠自煮樂

24 8月, 2011

豬皮

關於預先鹵好的甜肉,再加熱嘅方式,經過多方嘗試之後,發覺最能保持原味嘅方法,係將肉同少少鹵汁加埋入去,再加多少少清水,開火煮返滾。



煮到略略收汁,然後再切片,咁就可以煮到又入味,又似新鮮剛剛鹵好出嚟咁又鮮美,又夠濕潤啦。

因為如果蒸返熱,啲汁會變淡,如果叮返熱,啲肉會過老過硬,而咁樣再加少少水加返熱佢嘅方式,最能保持返原風味。




早上只需要細細一舊仔,熱返之後,碌多兩個福字面。

一碗面仔,加埋一碟仔肉,食完又可以充滿精力一整天啦~~~




覺得男人無論去到幾多歲,內心其實總會收埋一個小男孩,所以適時地,做為妻子,都要發揮下母愛,贊下老公

「老公你真係好叻啊,做得好好啊」,咁男人就會有一種滿足與成就感。

而依種成就感,會令到男人,做為丈夫做為男人的角色,越來越好~~~

好似強哥咁,早上我先行出門,咁可以喺唔趕時間的情況下,強哥都會係屋企做埋啲家務再出門口,咁樣等我夜晚返到屋企,無需再做咁多嘢。

譬如今日,返到屋企一入門口,當眼處已經可以見到一張紙仔「我已拖好地」、「倒佐垃圾」

等老公返到嚟,攬一攬,錫一啖,然後贊一句「老公你真係世界上最叻最叻最叻叻嘅老公」,咁就可以令到佢心花怒放,一句姐,何樂不為~~



提早浸淋佐嘅豬皮,同三色椒,加埋XO醬炒埋一碟,又爽又惹味,幾好㗎~~




奶奶俾佐好大一盒豬腳薑我帶返嚟,食完凈返嘅薑醋,烚幾隻蛋擺入去,浸一晚,又入哂味~~~

物盡其用~~~



全家福~~


22 8月, 2011

食椒

趁周末去街市補佐好多貨返嚟擺。

見街尾果檔婆婆檔,新嚟一大袋嘅炸豬皮,聞一聞無油膩味,咁就買佐超大一塊返嚟,勁平,一大塊,五蚊雞咋~~

今日早上煮餃子做早餐食,煮完餃子嘅水無嘥到,隨即將豬皮掉入去碌一碌,即時淋哂,衝洗乾淨後擺入雪櫃,可以慢慢切嚟配菜炒。

炸豬皮通常都係愛嚟煮咖喱魚蛋㗎啦,不過其實都可以愛嚟做配菜嘅,佢炸過之後,就無哂油脂同肥膩感,而且口感煙韌,不過本身就無乜味,所以就要額外俾濃啲嘅調味去配搭。



切佐啲三色椒,少少甜肉切粒粒,少少甜肉嘅醬汁,加埋少少豬皮切絲。




笠笠雜雜,炒埋一碟,因為加佐甜肉嘅鹵汁,所以成味餸好香好惹味,豬皮口感又爽又縮味,幾好㗎~~




睇到好大一碌嘢,我傻更更問人「依個係咪冬瓜嚟㗎」

菜檔阿姐笑住答返我「節瓜嚟㗎」

乜節瓜都咁大一條㗎~~~

二斤半重一條。



切佐一半,愛嚟滾佐一個「咸蛋節瓜瘦肉湯」



炒多碟芽菜~~



全家福~~~


18 8月, 2011

肉魔

早幾日座巴士,因為係背對上車嘅人而座,所以睇唔到上車者何人。

正值收工時份,成駕巴士爆棚,突然聽到座我對面一個抱住B嘅師奶同座係佢隔離嘅囡話「起身,讓個位俾果個婆婆座啦」
個十四五歲,牛高馬大嘅後生女即時用一種理所當然地口氣問返阿媽「咁我座邊度啊」

我扭轉頭一睇,原來有個婆婆上佐車而無位座,咁即時起身叫婆婆嚟我度座低。

自己走向後少少企住,轉頭望佐下,成車好多係十幾二十歲嘅後生仔女,個個就算睇到個婆婆,都只係各自顧住打機或者聽歌或者聊天,全無一個人有意識話在睇到嘅情況下讓位俾個婆婆。

好多內地網友問我,點解嚟到香港,無論係地鐵或者巴士或者小巴,從來未試過有人讓位俾佢嘅小朋友或者同行嘅長者,係咪香港人無讓座位俾有需要嘅人嘅習慣?

我俾人問到口啞啞唔好意思答,因為實情喺香港,真係鮮少有「讓位」俾有需要嘅人座嘅習慣

係內地,縱有百千般嘅不良習俗,但係交通公具上讓座位係小朋友同老人家一事上,真係好普遍同埋好常見,有時一個老人家上佐車,馬上周圍有三幾個人企起身,主動讓座。

無論別人如何,總之我自己只要係交通公具上見到長者或者大肚婆或者小朋友,一定唔會視而不見,希望睇到依篇文字嘅香港人,唔好再冷漠地面對公共交通工具上,有需要幫助嘅人士。

~~~~~~~~~~~~~~~~~~~~~~~~~~~~~~~~~~~~~~~~~~~~~~~
依個月多數在出邊食飯,或者買啲燒味返屋企食,貪其好味,方便,快捷。

上個星期,收工之後,同強哥係燒味舖買佐半斤燒腩,新鮮剛剛燒出嚟嘅燒腩,返到屋企,總脆卜卜,熱辣辣,內邊嘅肉汁總好豐富,剛剛新鮮出爐嘅燒腩仔地,真係無與倫比~~



簡單地炒多個白菜,蒸碟飯,咁就搞掂一個晚餐。



飯我早上出門之前預先蒸好,晚上返到屋企再開火略略蒸返熱佢就即時開得飯,蒸好嘅飯唔去鬱佢,基本上擺上一日都絕無問題,即便係盛夏。




已經燒腩、叉燒、燒鴨換住花款買允哂啦,唔想再成日食燒味,所以趁住禮拜日得閒,走去買佐大批肉,預先煮好幾味,擺入雪櫃,慢慢食。

講下瘋狂地食肉獸兩公婆,一日內買佐幾多嘅肉。

我買佐-------

1、「一條豬手」,足有二斤一兩重,早幾日見到網友整南乳燜豬手,同強哥流哂口水,所以義無反顧,決定---跟風,去馬!!!---做法「請點擊依度

2、「三斤梅頭肉」鹵好甜肉,分成幾袋擺入冰格,慢慢食。做法「請點擊依度

3、「一隻雞」,連毛嘅時候有二斤七兩重,整佐一煲嘅「香菇燜雞」,因為雞唔算太大,所以煮好後,可以分兩餐食。做法「請點擊依度

因為街食到嘅雞基本上都係冰鮮籠養雞,所以我係出邊絕少會點雞嘅餸食,想食雞,都係買走地雞會比較有味道,肉質都唔同啲㗎~~



整好佐咁多肉,擺入雪櫃可以慢慢食,每日只需要炒多碟菜配合就搞掂,無需出街食又貴又悶。



整南乳豬手,我阿媽教落,豬手唔洗出水,改為用少少油去爆,咁樣燜好嘅豬手總好味。

蓮藕買得多佐少少,燜好後幾乎同豬手一樣咁多,不過南乳豬手入邊,最美味嘅,當然就係縮哂南乳汁嘅「南乳蓮藕」啦~~~



一碟係整好後即日食嘅,一如預料中的惹味~~~



一條大豬手,加埋蓮藕同花生,燜好後大大一煲,將佢分成三份,可以分三餐食哂,其餘即時唔食嘅,擺入冰格,可以留起碼一個星期有多啦。

我晏晝通常都係出街食飯,所以唔需帶飯,基本上準備好啲肉,都係為晚餐。

要食嘅果日,早上出門前先拎落嚟解凍,晚上返到嚟蒸飯嘅時候順便一起蒸返熱佢,炒多個菜,就開得飯啦~~~

安排得係咪好好咧~~~



三斤有多嘅梅頭肉,鹵好後其實唔係咁多,不過就真係太驚人,為免嚇到大家,我就唔影抵煮嘅場面啦,我將鹵好嘅肉,分成二舊仔一袋擺入冰格擺好,要食嘅果日早上先拎落底下慢慢解凍,又唔洗話下下係要啖啖肉嘅,切好一大舊甜肉,愛嚟配搭其它菜去炒,一樣都好好味。

因為用嘅全部係有質素保證嘅豬肉,肉質一啲都唔會過肥,睇似肥膏嘅部份,其實好爽口,肉食落好鮮甜。



今晚用嚟同一條涼瓜一起炒,好好味~~

涼瓜切稍厚身少少,燜五分鐘後熄火焗多五分鐘,咁個涼瓜食落就好淋好入味㗎啦~~

一味開大火去煮,係無咁易令到苦瓜變淋㗎~~





炒多碟豆角,開得飯~~~


12 8月, 2011

生日

今日係我「身份證」上的生日,哈哈,當然唔係真正的生日,只是父親當年為某些原因,而幫我改嘅生日。

生日當天,持本港身份證係可以免費獲得一張「海洋公園」的門票的,平時二百幾一張的門票,唔去白唔去,所以今日一早起床,咕嚕一聲,換件衫,拎埋一大支水,,就沖去公園行行下。

 

有個好消息,由2011年9月1日至2012年8月31日,凡生日當天的本港市民,可持身份證免費獲得入場券一張,並可為同行的一位親人以半價購買一張入場券,凡65歲以上的本港市民,可隨時免費入場,壞消息係,由2011年9月1日起,海洋公園的門票,由港幣250蚊加價至280蚊。

 

我決定佐,下次強哥生日的當天,帶同我媽媽,我奶奶,我老爺一起進園遊玩,強哥生日當日免費,我可以半價進場,幾位長輩全數超過65歲,都可以免費進場,所以,強哥生日當天我們一行五人,只需要支付半張票價(即港幣140蚊),就能全數進場,哈哈哈,我真係計得好盡~~~
 

以前同強哥去海洋公園,都只會座地鐵到金鐘,然後再轉海洋公園的專線大巴直達公園,轉來轉去,耗時耗力不講,僅車費,兩個人來回一轉都要將近一百蚊,好貴㗎。

 

所以我另外發掘佐一條對自己來講,省時省力總要好省錢的去公園的路線,俾同樣適合的網友們一個參考。

 

由屋企步行十分鐘左右,行到太子的聯合廣場,就在聯合廣場的正門樓下,有個巴士站,喺巴士站搭乘「171號」大巴,依班大巴,所有公眾假期都會直接開到海洋公園的正門口,不過平日星期一至星期五,就只能在中途站落車,然後步行一小段路自己行到公園的正門口。




座到「香港仔隧道收費廣場」站落車,車資一程十一蚊。




落佐車,一路上都可以睇到指示路牌,沿著指示牌,步行大約五分鐘,就行到海洋公園的正門口。

 

由屋企出發,到達公園,全程都僅用半個小時左右(唔塞車的情況下),車資不過十一蚊,又平又慳時,所以依條路線,下次我都會推薦俾其它朋友。




到佐公園正門口,到售票處出示身份證,證明係生日當天,就可以換到一張免費入場的門票,以及一張場內消費的優惠券。




因為係免費入園,所以遊玩的心態好隨興,唔洗驚話玩少睇少會蝕底嘛~~~


人多的場合我唔去,排隊太長的場合我都唔去。


所以先去探望佐團團同圓圓,依舊臟兮兮的,懶洋洋的。





座纜車過另一邊諗住睇海獅表演,不過人太多,都係算罷喇,轉佐圈見天太熱,無乜心機繼續玩其它機動遊戲,於是就座小火車返到入口處。




趁人少少,座佐汽球~~



睇佐下街頭表演~~




走去海洋館轉佐圈。

 

可惜,睇到一些非常不愉快的現象,排緊隊當中打尖的現象永遠係內地同胞最積極,明明已經在入館之前多次提醒影像嘅時候不能開閃光燈,但係此起彼伏的閃光燈永遠係內地同胞,在館內睇到一些年紀大的老人家,隨地就咁肆無忌憚地清佐下喉,然後「咳吐」一聲,再若無其事地就行開去,館內光線較暗,我睇到家長就帶著小朋友在角落無工作人員的情況下,解開褲頭就隨地尿起來。

 

所以無問點解中國人係出邊好似總係得不到別人的尊重,大部份時候,尊重係好來自彼此的態度。






11 8月, 2011

薑醋

上篇提及過嘅豬軟骨,最後整佐一煲---「排骨薑醋」~~~

浸佐一晚,隔夜再整返熱佢嚟食,又入味又淋軟,正~~~





傳統薑醋的煲法,材料通常係「五斤的甜醋、一斤的黑糯米醋、五斤的老薑、一細茶匙的幼鹽」

做法:1、老薑去皮,拍扁,白鑊炒出香味,落少少鹽炒至色澤透明

  2、取大瓦煲一個,倒入五斤的甜醋,一斤的黑糯米醋,一細茶匙的鹽,煲滾後將薑倒入煲煮一小時以上,等薑味融入醋裏。(點解有佐甜醋總要加埋黑糯米醋?因為醋嘅酸味在煮嘅時候會揮發佐好多,如果凈係甜醋加薑去煲嘅話,醋揮發佐之後就會變得太甜,所以五斤裝嘅甜醋,就要加埋一支一斤裝嘅無太多甜味嘅黑糯米醋去增加佢嘅酸味咁解,其實唔一定要八X甜醋去煮嘅,我試過用同X嘅甜醋去煲煮,一樣都係咁香㗎)
3、要派人豬腳薑之前嘅一二日再放入出過水嘅豬腳入去薑醋度煮淋軟,浸一晚入味,咁就可以派街坊了。

 

咁樣薑醋就煮好了,隔一個星期左右取出翻煲一下,等薑醋的味道更濃郁,通常可以保留三個月左右,不能用金屬鍋煮,因為會與醋發生化學作用,可以用瓦煲或是玻璃煲煮薑醋,落少少鹽,作用係要調出醋裏的甜味。

 

雖然市面有售已調好甜味的「甜醋」,不過我不過係突然想食咁一煲仔姐,無謂為佐食這麽一次半次的,總要跑去買一大樽返嚟擺咁嘥,所以就全程自己調味道。

 

自己做的方法可簡就簡單,我先用一大大舊嘅薑,去皮拍扁,然後白鑊炒一炒至出味,然後倒入少少鹽入去繼續炒一炒,可以睇到姜變到好透明。



然後倒入大半支嘅鎮江陳醋,一塊片糖,煲煮一個鐘或以上,等薑嘅味道融入醋里,同埋等醋唔會咁嗆。




我屋企凈有大半支嘅鎮江醋,所以無額外再走出去買,用哂果大半支就算啦。

不過後嚟係佳寶發現原來有同珍嘅細支甜醋賣喎,咁下次買定一細支甜醋加埋少少糯米醋係屋企煮薑醋一定非常好味啦。

如果係買出邊配好味嘅甜醋,咁就無需自己落片糖啦,佢已經夠甜,不過都一樣要加埋少少黑糯米醋去增加佢嘅酸味。



落佐片糖同薑同醋,開慢火煲煮一個鐘左右,等薑醋煲出香味~~

為佐令味道更加豐富,我煲薑醋嘅時候,落多尾指甲咁大粒嘅一細細粒八角,大指公咁大細嘅一細細片香葉,一粒花椒,入去同醋一起煲,咁香料嘅味道淡淡地滲入醋入邊,又唔多覺香料嘅存在,食起上嚟嘅薑醋,味道更加地香~~




薑醋煲出味道,然後倒入出過水嘅豬軟骨入去,開火煮多半個鐘,熄火浸住排骨一日,隔日再食,入至最入味~~

因為瘦肉同醋浸耐佐會變硬,所以我就買豬軟骨去煮,豬軟骨嘅肉比較淋軟,就算用醋浸一晚,食起上嚟都唔會又硬又鞋。

喺大間啲嘅百佳或者TASTE都會有新鮮豬軟骨出售,早啲去買就會見得到㗎啦。





其實煮薑醋乜乜物物,就係咁簡單之嘛,我唔想食豬腳咁肥,所以就用佐排骨代替,如果鐘意食豬腳薑嘅,咁依個步驟嘅時候,將排骨換轉出過水嘅豬腳去用薑醋煮,咪就係豬腳薑囉~~




我落多幾隻蛋入去一齊浸過夜~~




第二日嘅醋蛋,一啲都唔會會得係鐵蛋,好軟,好香~~~

一舊排骨薑,已經可以送埋成碗飯咁滯,等天凍啲嘅時候,幾時想食都可以自己整返一細細煲仔嘅豬腳薑過下口癮啦~~~

自己整嘅薑醋,一啲都唔差㗎~~



夜晚返到屋企,蒸飯嘅同時開火整返熱排骨薑醋,然後炒多碟菜,半個鐘,就開得飯啦~~~




加埋一碗仔隔夜湯,好滿足嘅一餐飯~~


10 8月, 2011

雞腳

雅虎新版啲回復好多係睇唔到嘅,真係,你未搞得掂就未咁快推埋出嚟啊嘛,搞到用戶,擺明要趕客啦。

近排唔多係屋企煮食,難得尋日得閒早返,可以係屋企煮啲嘢,慢慢係屋企食飯。

反正都係要出水㗎啦,咁啲豬軟骨,雞亦,雞腳果啲,全部用薑蔥水出一出過水。



雞腳就同赤小豆扁豆花生薏米果啲煲埋一煲湯水。

家下飲依款湯水去濕最好啦~~



好耐無煲過湯水飲,強哥一飲即刻嘩一聲「勁好味」~~



懶開真係有條癮嘅,真係懶得煮咩太複雜嘅餸啦,雞亦出過水之後,抹少少鹽,然後碟底舖蔥,上面再擺幾片薑,然後上鑊蒸十分鐘左右即可。




又簡單,又滑又香。




我用指天椒、蒜蓉、蒸魚豉油、香油等開好一個醬汁伴雞亦同食,好惹味㗎~~



炒多碟蕃薯葉,又滑又嫩,好好味~~






又幾豐富下喎,全家福~~




係喎,總有啲豬軟骨咧?點整?

且聽下回分解~~