三色飯

就嚟到中秋，今日見天氣好涼爽，一早俾電話舅父，過佐沙田同舅父飲茶。
好多年無買月餅俾長輩，因為長輩實收到好多月餅，老人家邊食得咁多咁肥嘅食物，所以最實際都係俾封利是，佢鐘意點洗都得，心意到，好多傳統事都未必需要跟足先叫好嘅。

去完舅父度又同丞B去佐遊樂場玩，成日無係屋企食過野。

依個係尋晚整俾亞仔食嘅三色飯。

亞仔對魚一路麻麻，唯汁多啲可以蓋得過魚嘅味道，佢都會食到，但如果就咁凈魚肉，佢真係食唔落，特別係三文魚，點整佢都唔肯食，尋晚再試過另一形式去整，睇下佢接唔接受。

蛋炒碎，菠菜烚熟，三文魚煎香拆肉，分別整好後擺上飯面即成~~

俾少少茄汁調下味，試下佢肯唔肯~~

第一啖先食佐魚，果一刻好開心，亞仔肯食~~~

點知咬佐幾下就~~~~

悉數吐返出嚟~~

再望一望，索性成碗飯唔肯食，走埋一邊玩。

唉，佢真係唔肯食三文魚嘅，就唔逼佢喇，費事佢連飯都唔食，咪總得不償失~~~

唯有出絕招~~~

電視撈飯~~~~

咁先半推半就下俾我餵完魚以外的食物~~

蕃茄蛋飯

屋企無乜餸係度，唯有煮最快手的蕃茄蛋俾佢配飯。

煮法好簡單，先用水將蕃茄煮出味道，然後原煲打個蛋入去，攪爛個蛋黃，熄火闔住蓋焗佢二三分鐘蛋熟~~~

每一日中午返到屋企我都要好似打仗咁快快手手煮好餐飯。

因為，由我入廚房開始有一個小朋友就座定定係廚房門口睇住我，等耐小小就索性放聲大喊直到我捧住碗筷出嚟講一句「食得喇」

佢即刻彈起兼笑返~~~

可以我煮幾耐佢喊幾耐，有無咁肚餓啊仔`~~

簡單快手易整又營養的一個蕃茄蛋飯~~~

雖然好多人都話信丞仔瘦，但係你睇下佢個肚腩仔~~~

我唔想佢變肥仔啊~~~

等咁耐，要食一大啖先可以撫慰下我嘅心靈~~~

太大啖喇媽媽，我咬唔到啊點算啊~~~

超好味~~~

蒸鮮肉大包

尋日蒸佐一籠鮮肉包今朝做早餐

阿仔嘅餡凈係少少薑蔥同鹽，自己整嘅包包用料最放心。

阿仔一個，媽咪兩個，爸爸三個包包，一二三，一家三口六個包~~~

亞仔嘅餡好清淡，唔會太咸~~

一起身已經先飲佐八安奶，奶完照舊去佐個大，舒服~~

等大人搞掂佐所有事，埋位食早餐，佢睡眼惺忪，肚又空空也，於是照嚼無誤~~~

一啖落肚，醒神~~~~

一大杯奶，再加一個包，半碗麥皮，勁~~~

 

尋日剁瘦肉有凈啲肉，留起今日用，蒸碗水蛋，再用水煮熟啲肉淋上蒸蛋度，快手又簡單的一個飯餐就搞掂。

一啖飯一啖餸~~~

甘筍肉碎紫薯飯

甘筍肉碎紫薯飯，個名講哂所有材料。

俾少少蒜蓉炒香，好簡單，好清甜。

無乜太大香味，應該係色彩吸引佐小朋友嘅食慾。


影緊相，個手仔已經開動~~~

次次食飯都好似餓佐十年八載咁款，睇怕我煮得再難食，都會有人同我嚼哂~~~

真係好慶幸小朋友係一個對食物完全無要求嘅人，我都試過有幾一排信丞乜都唔食，只不過短短幾日時間係咁，我已經好頭痛，可以想像家中小朋友如果長期對食無乜興趣，做人父母嘅會係幾咁辛苦。

等我諗下，先食邊一啖好咧~~~

媽咪，你唔記得俾杯水我啊~~~

唉，睇下杯水最後，俾個小朋友玩到，水都變湯~~~

白汁魚碟頭飯

今日食飯。

蒸飯，一細撮米，水好隨意落，浸過米就無問題，落水越多飯就越淋，水滾後蒸十五分鐘，由得佢係鑊入邊焗一焗飯粒更油韌，所以如果唔用電飯煲而係蒸飯，最好就提早蒸定啲飯，焗耐啲先好食。

亞仔食魚都係一啖起兩啖止，後嚟試過原來濃味嘅魚佢都肯食嘅。

今日中午整白汁煮魚，白汁最白搭，除佐落魚，可以配搭其它任何食材。

先用少少油，什麼油都可以，牛油總香，不過阿仔食嘅餸，我就用佐橄欖油。

用少少油，細火炒香一細細匙麵粉，炒麵粉嘅作用係令到個汁更濃稠，類似中國人生粉嘅作用，炒麵粉嘅過程要好細火，白汁顏色的深淺就係在於你炒嘅火候。

炒完麵粉跟隨就落奶，煮滾奶後落魚肉入去，三幾分鐘就煮熟魚，將魚盛起，留返個汁。

落芝士入去，煮融，即成白汁，淋上魚度，成餐飯煮好。

講就好似好耐，其實全程煮落都係十分鐘之內可以搞掂。

啲飯撈埋啲白汁，成舊魚亞仔清哂~~~

為，小朋友，著返件衫好嗎~~~

係廚房洗完碗走出嚟，就睇到一個無比寂寥的背影~~~

啜住水，望窗外的風景~~~

最抵死係總識得搵個盒座得舒服啲~~~

午餐與晚餐

午餐係蒸薯仔，蕃茄肉醬，豆豆。

酸咪咪超好味，連媽媽都鐘意~~

婆婆 買佐盒藍莓嚟俾孫孫。

食緊飯嘅孫孫一睇到至愛嘅莓莓就停唔到口，第一粒循例都係要俾佐長輩先，但你睇下個衰仔，手就像征式地遞俾婆婆，但個眼。。。。

食完飯婆婆帶孫孫落街玩，我見得閒，就搓啲南瓜饅頭仔俾信丞仔~~~

丞第二日嘅午餐，就係黃玫瑰兩朵，蛋一隻加埋芝士白菜仔~~

晚餐我啲就食白菜仔煮讓豆卜。

蝦米煮南瓜~~

午餐加晚餐

今日午餐，出門前蒸好南瓜，牛丸與豆豆。
返到嚟，用水煮少少麥皮，趁熱撈啲芝士入去，芝士麥皮又香又滑，小朋友超鐘意。

南瓜又粉又甜，最先清哂嘅就係南瓜喇~~

好味到~~~

順手影埋晚餐，大蔥炒肉片。

蠔豉讓豆卜煮勝瓜，凈係落佐鹽調味，清甜到，小朋友菜汁撈飯添，食佐好多勝瓜啊佢~~

午餐

另一日午餐，芝士通粉牛丸伴豆豆。

依個星期整嘅係紅腰豆，藥房買一包，煮半包。

先用水洗凈，擺入碗度，加少少水浸過豆豆頭。用壓力煲煮半個鐘至淋軟。將煮好的豆豆冰起佢，每次想食拎少少出嚟整返熱就即刻食得。牛肉又係，一次買一大舊，分切為每日嘅份量，每日拎一舊出嚟解凍就煮得，無需日日急急腳買佐返嚟又急忙忙嘅煮。牛丸做法上邊有講。早上出門前蒸好牛丸，返到屋企，再用水淥熟通粉，煮好嘅通粉擺一塊芝士入去撈勻，就成芝士通。


咁就有通粉，有牛丸，有豆豆嘅一個午餐。

丞超鐘意食豆~

肚餓狀態中。。。。。

丞遺傳佐媽咪嘅好人緣，佢可以係一個陌生嘅環境里好快速吸引到其它小朋友埋佢身邊一齊玩，今日有一個小姐姐為佐保護丞不受其它小朋友搶玩具而飛撲向另一個小朋友。。。。。

我已經可以想像得到丞長大後，身邊嘅小蜜蜂~~~~

為為，你邊間報社咖，我食緊飯，咪影喇~~

飯後拎碟入廚房。睇到剛買未擺上高位嘅生果，即時果斷取一個試下。

凡帶皮嘅食物丞一定當雞蛋一定敲一敲~~

發覺敲唔碎，放棄。

轉為取之唯一一款佢食得開嘅生果，蕉~~~

依個小朋友嘅肚仔係咪有一個黑洞咖？食極都總食得落嘅？