小菲菲俠自煮樂

26 2月, 2009

家常便飯之豆卜蒸排骨

曾經食過一味「干煸四季豆」的川菜,好鐘意佢香辣干爽的口感。


早幾日買佐盒甜豆,本來打算就咁用肉鬆清炒,點知臨煮之時,想學下整果味干煸四季豆,咁就學人用油炸一炸個蜜豆,但係我錯誤地低估佐蜜豆本身含有的水量,想學四季豆咁炸干身既甜豆,個結果係炸得半干度,即無想像中的干爽樣,亦失去佐甜豆本身自有的清甜。


 



再加埋醃得味道過重的免治豬肉,加埋辣椒花椒孜然粉,得出既結果係絕對令人沮喪的失敗。


唔想多講個味道啦,二個字講晒---「惡頂」



好彩另一味就都OK。


蒸排骨。


1,排骨我就買佐盒帶白色軟骨果D一字排啦,阿媽話帶軟骨果D肉最滑最好味,咁買返黎既排骨,先用腐乳,豉油,糖醃好味半個鐘或以上下其手。


2,將豆卜用熱水洗一洗,切開對半,舖係個碟底。


3,醃好味的排骨,再撈埋生粉,麻油,一大匙「李X記蒜蓉豆豉醬」,舖係豆卜之上。



4,上鑊蒸十五分鐘度。。。。


一碟鮮甜美味既排骨蒸豆卜就搞掂啦。。。。


其實底下果D豆卜吸晒肉汁,成碟野最好味反而係佢添。。。。



另外,用佐二包仔味噌醬做湯底,加埋一大碗既芫莤,一舊豆腐,少少免治豬肉,滾佐一個芫莤豆腐湯。



快速又美味既滾湯。。。。。



又係一餐家常便飯。。。。。



飯后,食星星啦。。。。。



 


家常小菜~~

最鍾意係見到雪櫃清清如也,表示可以繼續大肆入貨。


所以時不時都會清一清雪櫃凈餘既一蔬半果。


依日,就用凈低既一條甘筍,二條青椒仔,全部切絲絲,加埋蒜頭蔥頭,用沙茶醬調味,簡單地炒做一碟餸。


(全手工切架,切得好齊整咧,刀功越黎越叻了)



甘筍其實同沙茶醬意外地「格」,清甜之餘,份外惹味。值得推薦。



另外一包友人送的臘腸,食極都食唔晒咁,買佐盒豆卜,加埋干爭爭的一個蕃茄,加少少薑絲,就簡單的用豉油糖調味又炒一碟出黎。



炒好之后加一細扎蔥落去,成碟野,香晒~~~



雪櫃又多好多位出黎啦。。開心晒~~



-----------------------------------------------------


另一日,無出過街,就落樓下惠康,買佐包娃娃菜,一盒濃湯寶。


加埋幾粒肉丸,一扎粉絲~~



一煲味精湯就搞掂啦。。。。。



開多罐茄汁豆,加少少糖,豉油,白醋較好味。



 


煎幾隻蛋。


 



煮埋幾條腸仔,再煮一煮個茄豆,淋係蛋上邊,搞掂~~~



一盒娃娃菜都幾多架,一舊愛黎煮湯,另外二個切絲之后,用少少煙熏味的臘肉一起炒。



勁清甜,又惹味。。。。



家常小菜,係咁啦。。。。



25 2月, 2009

教你豆沙酥餅快速家庭製法

其實真係幾鐘意食酥皮類食物。但係個酥皮製作的過程,繁復的做法,往往令人望而卻步。


不過依家唔使擔心,整酥皮的過程,又要依樣又要果樣的材料,先至可以完成。


只需要往超市,購買一种冷凍酥餅半成品。


通常會係超市擺叮叮食品果度可以搵到。


試過係X康買過類似食品,但係太過濃郁的「瑪琪琳」的味道,實在難頂。


亦都在大昌買過另一款內地生產的同類產品,叫「思念」牌,個味道都叫宜中,酥化程度都好勁。


不過以味道來講,反而係「百X」買到既依款酥餅我最鐘意。可以食到面粉獨有的麥香,唔會太多牛油或者代牛油的味道。


言歸正傳,整酥餅,首先,可以選擇底下依款半成品做替代。



然后,將佢放室溫中幾分鐘自然軟化。



將佢D卷成一卷,分切成一舊舊。


基本上二塊就可以整到三個。



然后將佢搓好,中間擺一粒紅豆沙。(買現成紅豆沙)



將佢包好之后,掃一層蛋黃液,再落少少芝麻。



然后擺入焗爐,二百二十度火,我就焗佐二十五分鐘度。



咁,聽日既早餐就搞掂啦。。。。



試食佐邊邊細細一啖,真係好鬆化啦。。。。


咁以后要整酥皮類食品,話咁易啦。。。。。



菠菜瘦肉粥加小菜

煲粥,菠菜瘦肉粥。


先將米,少少糯米,甘筍,煲成綿綿粥底。


跟住將攪碎豬肉(用少許薑同生粉豉油醃過)擺落粥底度煮熟,最后將切碎的菠菜加入去。


一煲簡單又好味既菠菜瘦肉粥就搞掂啦。



 



真係幾好味架。。。。



買佐十蚊瘦肉攪碎,五蚊煲粥,另外五蚊用黎同甜梅菜炒。


加少少蒜蓉,落蠔油糖調味,撈入粥度同食,滋味無窮~~



------------------------------------------------------------


又另一日,朋友送既筍乾。


預早浸佐一晚,食之前切絲,再出出水。



然后整配料。


先用油爆香花椒粒粒,花椒味走晒去油度之后,將花椒撈起丟佐。


咁就變佐香噴噴的花椒油啦。



然后落薑,蒜蓉,爆香之后加入五花腩,筍絲,加豉油糖調味,加水燜。。。。


我總加埋少少花椒碎落去,咁成煲野,惹味~~~



 



炒多一個油麥菜。



切佐一個薯仔絲,因為凈有舂好的花椒碎,加少少辣豆瓣醬,咁就成為一味香艷誘人既麻辣薯仔絲啦~~~



 


 


24 2月, 2009

電飯煲版芝士蛋糕

因為屋企個焗爐只得上火,所以焗一般菜式或者細點心都還叫OK,但係講起焗蛋糕或者其它需要均勻火力的西點,佢就顯得力不從心啦。


但係屋企個大細佬好鐘意食點心,特別係蛋糕類。


雖然焗爐焗到效果麻麻,但係想食一樣野,總有辦法搵到解決的方法。


依日整個芝士蛋糕,唔用焗爐咁就用電飯煲黎啦。


材料如圖所示,唔使多講。



做法:


1,先將牛奶整返熱,跟住將芝士同牛油擺落去攪拌到幼滑,最后將粟粉同埋蛋黃倒入去,攪成最終的芝士粉漿。



2,另一邊,將蛋白打到發起,分三次將砂糖倒蛋白度一起打發。



3,將蛋白好像刀切咁,拌入芝士粉漿里。



4,打蛋白的時候,電飯煲就可以開始預熱,擦少少油係煲底,開佐個電飯煲煮飯制就得啦。



5,然后將撈勻的粉漿倒入電飯煲里邊,好似煮飯咁,開電制係咁煮就OK啦。


煮到咁上下,電飯煲會跳制,表示煮熟佐,咁停一停佢,等電飯煲有少少凍返之后,又再一次開返電制,按個煮飯制,由得電飯煲慢慢焗個蛋糕啦。


基本上,再按多二次煮飯制,咁個蛋糕就完成啦。



6,因為電飯煲凈係個底係度加熱,所以個蛋糕面就唔夠靚同埋唔夠香,咁我就將整個飯煲膽取出,擺入焗爐度,焗一焗個面,焗大約一分鐘到就OK啦。



靚靚芝士蛋糕就咁出爐啦~~~



睇下,同街賣果D真係無乜分別架,個外觀。。。



 



但係可能係因為電飯煲熱得比較慢,而D芝士又較重,所以焗好之后,好多芝士就沉佐落個底,變左個蛋糕分開佐二層咁,咁上邊既口感就好鬆化,下層果D就好濕好重芝士味,一啖食落既雙重口感真係幾好,幾有趣架~~~


自己係屋企整芝士蛋糕,話咁易啦~~~