葫蘆

葫蘆唔凈止係可以擺嘅。

總可以食得嘅~~~

有啲似翠肉瓜，去佐皮，愛嚟同肉碎炒埋一碟，貪得意~~

一般般，唔係好得我心~~

蕃茄炒蛋，加埋少少青瓜~~

熱天食嚟食去，唔係酸就係甘㗎啦``~

好似總滾佐一個咸蛋節瓜湯，唔記得影像添，依餐都二個月之前㗎啦，哈哈哈，依家先整佐啲圖片擺上嚟。。。。

又蒸腸仔包做早餐~~

無失手，一樣咁好味`~

強哥可以一次食四個，強咧~~~

白肉

買佐幾條茭白筍。依排好多，又嫩，好清甜，我好鐘意食。

將佢切成條狀，關於條狀，好似以前有講過我點切嘅。

我通常會先打斜橫切成一片片，厚度決定佐條狀的粗幼。

打得越斜咁切好的條狀就越長。

切好片，再豎切，就成為條狀了。

切好多食物，都可以用咁樣嘅方法去切成條狀，青瓜、甘筍、翠肉瓜，茄子，薯仔，任何長形嘅食物都可以用咁樣嘅方法切成條狀，好處係切好的條狀，頭尾都可以帶有皮的硬度，好均勻。

趁假期得閒，買佐好多梅頭肉鹵好甜肉擺住，咁隨時切一舊配任何菜炒，都可以好好味，尋晚切佐一舊甜肉，同茭白筍炒埋一碟，香噴噴，非常食得到茭白筍本身特有的清香與甜意。

茭白筍的食法極多，可以愛嚟燜排骨，炒牛肉，涼拌，點都得~~

另外，買佐一舊五花腩，細細一舊就足夠。

整蒜蓉白肉。

醬汁係靈魂。

醬汁依次整好好味「芫莤、蒜蓉、指天椒、蒸魚豉油、麻油、少許黑醋調下味」

如果用普通生抽，因為較咸，所以要落埋少少糖入去，我用蒸魚豉油，咸甜味好適中，所以無需額外加工。

肉嘅處理真係簡單到一句講哂「白水煮至斷生即可」

最緊要睇你用咩肉，新唔新鮮~~

煮好的腩肉，切薄片，然後沾醬汁同食。

醬汁極好地解佐腩肉的膩，食起上嚟只有鮮美，絕無肥膩之感。

好簡單，不過極滿足的一餐飯~~

 

冬瓜

整肥牛卷凈低幾塊肥牛，愛嚟同甜椒炒埋一碟。加埋少少豆腐干。

整涼瓜燜排骨。

做法簡略地講講。

排骨加少少干辣椒，花椒，薑片，蒜片，炒至轉色。

落生抽老抽糖米酒，加水燜二十分鐘。

然後倒入涼瓜，燜多十分鐘，搞掂~~`

勁入味嘅涼瓜燜排骨就整好啦。

另一日，蒸飯蒸凈八分鐘嘅時候，將切好的冬瓜擺埋入鑊一起蒸熟。

蒸完會走好多冬瓜水，將冬瓜水倒出嚟，加埋粟米瘦肉一起煮熟。

埋個蠔油芡「水、生粉、糖、鹽、蠔油」

然後將煮好的粟米瘦肉淋上蒸好的冬瓜之上，勁清甜~~~

用香菇炒多碟甘筍。

熱天食咁樣清清啲，幾好㗎~~~

細菇

風暴之前那一抹的淒美,艷麗得令人窒息.

狂風暴雨之下,趁著停雨的少少時間衝落樓下係附近買佐扎菜再衝返嚟屋企.

旺角街市生果檔最尾段,有一個年過八十的婆婆,擺賣一些菜蔬干貨,特色在於阿婆雖然年過八十,不過數口之精,叫人嘆為觀止,雖然動作略顯遲緩,但計算價格完全無需過多思考，貨物一上磅，望一望可即時話俾你聽一斤賣幾錢依度幾重實收你幾錢，一連串的反應全無阻滯,真係佩服。

早幾日見阿婆新嚟一啲細細粒嘅珍珠菇，雖然細細粒，不過睇落肉極厚，而且知道阿婆之前無賣依隻菇，都係剛剛嚟貨肯定唔會係陳年舊貨，所以即刻買佐半斤返嚟試下味道。

冬菇較厚，所以提早幾個鐘浸住佢等菇菇完全發起。

煮依味餸，主要係想食菇，所以肉類係配菜，用咩肉都無問題，我剛好屋企有雞扒，咁就用佢嚟配菇。

雪櫃凈有一塊雞扒，雪到硬哂，咁就擺入水中，俾少少鹽落去浸一浸，只需十分鐘左右，雞扒就完全解好雪變返軟，用交剪將雞扒剪成一塊塊備用。

做法：1、切幾片薑，雞扒無需醃味，同薑一起擺入鑊，雞皮向下，無需落油，等佢自己慢慢煎出油，炒至轉白色，將浸好嘅香菇倒入去一起翻炒至聞到香菇嘅香味。

因為主角係冬菇，要食得到菇嘅味道，調味無需太複雜，要選能夠帶出菇嘅鮮味嘅調味，我用佐李記嘅舊裝蠔油。

2、所以菇與雞扒已經干炒出味道之後，只需要落極簡單的幾樣調味「黑糖、米酒、蠔油」，加少少清水入去，燜大約十分鐘，搞掂。

蠔油已有咸味，黑糖係中和返個咸味，米酒係增加佢嘅香味，加水將菇嘅味道完全煮出嚟之後，簡單地幾樣調味，已能夠將冬菇嘅味道完全提升。

3、起鑊之前，俾幾滴麻油入去兜均，等味道嘅層次更豐富。

依一味餸，食嘅係「菇」

常見的食材，簡單的幾樣調味，輕鬆地煮法，卻得出惹味之極的效果，各位師奶，依味餸，要試下啦。。。。

另外煮碟「菜」

雞扒嘅雞皮較多，剪佐啲留出嚟俾「菜」

所以無需落油，凈鑊先將雞皮慢火煎至出油，然後擺幾粒蒜入去爆香，倒入簡單地用「鹽糖米酒生粉」等醃過嘅豬肉碎，炒散開。

然後倒入清水，煮滾即成簡易高湯。

買蛋返嚟發現壓爛一隻蛋殼，留起個蛋黃，煮湯時加埋入去，等啖湯更甜啲。

煮好個高湯，將莧菜浸入去，浸熟之後俾鹽調味，搞掂~~

清甜無味精，又嫩又滑嘅莧菜，正~~

尋晚風雨之下嘅晚餐，簡單，溫暖。

牛肉

印佐一批宣傳單預佐派俾目標客戶嘅，點知搵錯印刷公司，俾佐設計稿佢，印成一個星期先出到貨俾我，總要係出嚟嘅效果同我實際設計嘅色彩相差好遠，睇到把幾火，係要靠依啲宣傳單俾客第一個印象㗎嘛，依家真係嘥哂我時間嘥哂我心機，唉~

考慮佐兩日，都係照用返依批宣傳單，真係要見客嘅時候，再俾實際嘅作品佢睇，相信睇到真正嘅產品，客人都會對我有返信心嘅，最緊要我要對自己嘅能力有信心~~

都預佐期間一定會有好多阻滯喇，所以已經有佐心理準備，凡事不過係見招拆招，最緊要係睇下自己把口點去講解，只要人客接受，落單，我製作，出貨，收錢，咄，萬事有幾難~~~

勇字當頭，一切無有怕~~

~~~~~~~~~~~~~~~~~~~~~~~~~~~~~~~~~~~~~~~~~~~

上上上個星期煮佐牛肉。

最經典嘅家常菜式「薯仔燜牛肉」

買佐一條牛腱，切一指粗嘅厚度，鐘意用牛腱，燜炖蒸炒煮，點都得，味道又濃郁，而且唔洗驚切錯方向，總之一條牛腱打橫切就係㗎喇。

做法：

1、牛腱求其切成幾舊之後，落鑊，同幾塊薑及蒜爆一爆出香味。

我唔記得落油添，就咁干炒其實都無問題，炒至聞到香味，牛肉轉淺色即可。

因為一條牛腱切好之後其實好少，所以我直接係一個瓦煲仔入邊煮，咁煮好可以直接上檯，洗少一個碟幾好啊。

睇下，就炒成咁樣轉淡色表面斷生即可，佢自己會出啲水，所以就算無落油，其實都唔洗驚會痴底，而且本身會帶有少少脂肪，煮嘅時候都一樣會有油走出嚟。

2、落「清水、生抽、老抽、黑糖、米酒」，開火煮~~

我會先開大火煮到滾起，然後熄到細細火慢慢炖，炖大約半個鐘左右。

炖嘢一如即往地，炖好後唔揭蓋，由得佢繼續係入邊焗多半個鐘，咁就包保夠腍軟啦

其實一個爐有咩炒餸，BBQ，煲湯依類功能，我都幾乎唔會去理會，所有嘅功能，只不過係溫度上嘅少少區別，我只固定用其中一個功能，自己去調較溫度同時間，已經用得好好啦，所以買電器，唔洗太執著佢本身有幾多幾多嘅功能，其實變來變去，都不過係同樣嘅一個道理做出少少嘅改動姐。

用任何工具，最主要都係要靠自己個頭腦去判斷、控制最可靠。

3、炖好嘅牛肉，試下味道，如果唔夠咸就再俾少少鹽入去，然後倒入切好的薯仔粒，開火焗多十分鐘，搞掂~~

我無落太多嘅香料，只簡單地用薑蒜加以豉油嚟帶出牛肉本身最純正的香味。

咁樣一味薯仔燜牛肉，送飯最一流~~~

唔信佢真係咁好味？咁真係要試一試喇~~

加多一個粉絲煮節瓜，一個晚餐就完成~`

 

煎餅

今日報紙的一角刊登佐細細的一個新聞，指一個七旬老婦，因病厭世，由住所跳下結束生命。

所占新聞版面不過細細一個角落，因為無太多報道價值，所以無人會願意去深究箇中因由。

一個人的生命，現時社會嚟講，由生至死，全無發言權。

早排剛剛同母親傾過類似的話題，母親年過七十，對於生命，母親同我講：「已經睇得極淡，隨住身邊的親人，朋友，一個接一個離開自己，女兒亦長大成人無需照顧，覺得繼續做人，真係全無意義，依家不過係度等緊果一日的來臨，全無畏懼」

我體會唔到母親的果種心情，不過可以理解一個人存在於世，如果無佐一個目標追求嘅時候，係會因為無所期盼，而產生依種「淡世」的情緒。

當下即刻回應母親「唔準你亂諗嘢啊，我係咁自私㗎啦，我要阿媽你陪我至永遠，永遠永遠你都唔好做傻事㗎，如果唔係，我餘生都將會在永遠無法釋懷的傷痛中度過㗎」

雖然話題就此打住，不過返嚟之後，我繼續深思依個問題，其實尊重生命，是否包括埋個人對生命的意願咧？如果一個人真係病得好重，周身病痛，每日不過為佐社會的要求而苟留殘喘，是否真的是對生命的一種尊重？以致於只能選擇一種極端的方式去做出一些引起社會不安的舉動來面對自己對生命的意願？

如果可以將安樂死變得合法化，經過醫生及心理專家嘅評估之下做出合乎個人意願的安排，令人生的最後一程，走得舒服同埋更有尊嚴，是否更加文明？

~~~~~~~~~~~~~~~~~~~~~~~~~~~~~~~~~~~~~~~~~~~~~~~

好耐無煎過餅仔食。提早一晚整好幾個餅坯，留待第二日早餐煎嚟食。

準備好「一舊發麵團、一碟花生碎加埋砂糖椰粉、一碗仔香蔥加花椒粉少許鹽倒入滾油浸出味道的蔥油」

就係全部材料。

麵皮係落佐乾依士嘅發酵麵團，不過無等佢發酵，直接搓好就可以用。

額外一提，除佐乾依士，我總落佐一粒米咁細粒嘅蘇打粉，因為乾依士經過一晚長時間發酵會產生酸味，蘇打粉可以中和返個酸性，咁就算發酵一晚的麵皮，都唔會有酸味。

至於點樣整發酵麵皮，可以自己搜索一下我過往所寫。

將糖花生餡包起收口。

然後再壓成扁扁一塊。

凈低嘅麵團，整佐兩個蔥油餅。

好簡單，發酵麵團搓成一塊圓薄片，然後將蔥油均勻地涂上去。

然後卷起，卷起之後，捏實兩頭等蔥油唔會走出嚟，同時稍稍用力，將卷起嘅麵卷略略拉長啲。

再盤起，跟住一樣步驟，將佢壓扁。

三舊麵坯就處理好啦。

搵個大啲嘅碟，上下隔住保鮮膜，包好之後擺入雪櫃，低溫發酵一晚。

第二日早上，先開爐開大火，空燒個鑊約一分鐘，等個鑊稍熱之後，落少少油，將生嘅麵坯擺上去，轉中火（1200火），冚蓋焗。

設好時間三分鐘，每邊煎一分鐘，最後一分鐘落一細匙嘅清水，目的係務求熟透。

三分鐘之後，餅仔煎好~~

想表面香脆啲，可以再兩面略略煎一煎。

全部餅仔都一樣咁樣處理，三分鐘煎好一塊餅仔~~

強哥至愛蔥油餅，又香又酥軟，我都一樣~~~

一個早餐，話咁易~~