小菲菲俠自煮樂

29 10月, 2010

「食譜」薯仔燜排骨

其實我煮餸好多時材料係一樣,煮法一樣,只不過係配料上有少少變化。


隻要掌握到主要味道嘅來源,同大致煮嘅過程,變化係可以千變萬化㗎。


今日煮薯仔燜排骨。


主要材料就係排骨同薯仔啦。


其它配料就係薑同蒜,少少紅椒,少少花椒粒。



做法:


1、要花椒油,所以熱鑊,落一匙油,然後倒入花椒,慢火爆出香味。


花椒可以掉佐㗎啦,個油香噴噴,有花椒味,咁再煮咩餸都會帶有淡淡花椒油嘅味道,好香㗎~~



2、然後倒入薑同蒜頭爆香


3、再倒入排骨翻炒至表面變白。



4、落生抽老抽同砂糖,少少鹽,少少酒,加水燜至收汁即可。


燜嘢係最簡單嘅一件事,加水燜到收汁就得啦,如果見材料腍佐,水總好多,咁就打返個生粉水打芡,一樣可以搞得掂。。。。


燜嘢來去都係咁嘅材料,薑蒜,豉油糖,水。。。。


材料可以用薯仔雞亦啦,或者排骨栗子,或者栗子雞亦,點配都無問題~~



老公超鐘意食。。。。所以第二日又想再食返依味餸,咁就轉成用栗子燜排骨,做法同其它材料一樣,燜嘢就係咁簡單啦,天氣開始凍啦,燜嘅食物,可以擺入煲仔座暖佢,食時都係暖笠笠,一流~~



另外炒多碟菜食。


好少食花花菜,其實都唔係咁識得點煮


就開佐一罐五香肉丁,先爆香蒜粒,然後倒入五香肉丁,再倒入花花菜略炒,加水燜熟即可。。。


其實花花菜係咪可以先用水灼熟再炒會易啲咧。。。



不過都好惹味㗎~~



一肉一菜,無湯,搞掂~~



 


 


27 10月, 2010

「食譜」發麵蔥油餅

香港有錢人嘅新聞幾時都精彩過連續劇,好似追緊現實版電視咁,耐唔耐整單勁有趣嘅事出嚟。


不過如果唔係咁,又點會製造咁多話題俾坊間議論,增加茶餘飯後嘅樂趣度咧。


晨早打開收音機就聽到阿四叔終於抱上男孫嘅新聞,最直接感覺係「嘩,生命被踐踏如斯程度,它日知道自己存在的過程係靠器械輔助,最主要目的不過為名義上的父親增加若干籌碼,真不知道該做何感想」


當生命不過等同產品一般,隨心被人製造出嚟嘅時候,我覺得人類嘅存在,已經不需要得到任何尊重,生命根本全無尊嚴可講。


有錢人可以玩弄嘅大至生命,一般人家如我哋,玩下食物,成品可以食得落肚,口腹之欲同樣可以令我哋獲得片刻嘅滿足,相較之下,更為環保~~~


~~~~~~~~~~~~~~~~~~~~~~~~~~~~~~~~~~~~~~~~~~~


尋晚食飽飯無嘢做,就開始準備第二日早餐。


材料:


1、少少幾湯匙高筋麵粉,細半匙酵母粉,一匙白糖,幾粒鹽,加水搓成麵團。


2、另外,切一碗仔蔥,然後煮滾少少油,淋入蔥花度,變成蔥油。



做法:


1、將搓好嘅麵團擺係室溫中十分鐘。


2、然後將麵團搓至一大塊薄身麵皮。


3、將蔥油均勻地舖上麵皮(見手邊有炸蒜粒,都擺埋幾粒入去,可以唔洗落)



4、將面皮卷起,成一條長條,我總會用手將佢拉一拉伸,變得更長



5、將卷好嘅麵,如下圖咁,盤起一堆。



6、再將盤好嘅麵團,搓壓扁


所以蔥唔可以落得太多,太多會逼爆個麵團。



7、搵個碟,底洒少少麵粉,然後將上個步驟嘅麵舖入碟度


8、擺係室溫當中二十分鐘,等佢略略發起


9、然後就可以擺入雪櫃一晚等佢低溫繼續發酵。



睇下,第二日早上拎出嚟,已經好明顯係發起佐啦。



第二日早上,可以輕鬆用幾分鐘去煎熟即可。


煎法延續以前煎任何麵餅嘅一樣。


先用油煎到兩面金黃,然後加水焗熟,再開大火略煎至兩面香脆即可。



因為比較厚,所以一定要加水焗一焗,先可以保證熟透。


加少少水焗就可以啦,我都係加佐二三湯匙嘅水,焗大約三分鐘左右已熟透。


全程其實六七分鐘已足夠。



睇下煎好嘅蔥油餅,雖然係發麵,不過一樣起酥有層次感~~



相較用死麵整嘅蔥油餅,佢多佐一份鬆軟嘅口感,加埋蔥油嘅香,真係好正嘅一個餅仔嚟~~~



今日嘅早餐~~~



 


 


23 10月, 2010

「食譜」沙嗲燒豬頸肉

個風真係搞死人,話嚟又唔嚟,等我做佐咁多準備,最搞笑係天文台連一台風球都落埋,咁既然乜事都無,今晚同強哥返奶奶度食飯,成個月無返過去食飯,都係約奶奶係出邊飲茶食飯,係出邊食飯嘅感覺,始終無屋企咁親切。


講真,食嚟食去,始終係住家餸最溫暖~~


~~~~~~~~~~~~~~~~~~~~~~~~


買佐舊豬頸肉,上次有個豬肉佬同我講無食咁多豬頸肉之後,都成年無買過嚟食啦,不過我諗幾衰嘅嘢,年中食一次半次,應該都無乜大問題嘅,所以一早去到超市,剛剛新鮮片好嘅幾盒豬頸肉,忍唔住手,都係買佐盒返嚟。


提早一日醃好味。


材料「芫莤籽粉、印尼甜豉油、幼鹽、少少白酒」


就係簡單的幾味材料,主要想突出嘅係芫莤籽粉嘅味道,所以只需要俾少少甜同咸味已足夠。


將調味同肉撈勻,擺入雪櫃醃一日。



買電陶爐跟機送有一個韓式烤盤,咁就一於試下~~


我驚會痴底,所以擦佐一層油,然後將醃好味嘅豬頸肉擺上去。



每面燒焗10分鐘。


我總用佐另一個平底鑊嘅蓋去蓋一蓋,等肉熟得透啲。



差唔多燒好嘅時候,擺埋兩塊菠蘿上去一起燒,等強哥個菠蘿蜜怪開心下~~


不過原來,擺有食物嘅果個地方原全無事,輕輕一省就乾淨哂,但係無擺食物,又俾我擦佐油嘅地方,俾火燒到黑哂,都唔知點清潔好啦。。。。



哈哈,個爐幾好玩,連焗爐都唔洗開啦以後,直接用依個爐,已經可以燒嘢啦~~~


比焗爐嘅效果總好啊,因為我可以一邊燒一邊擦啲醬汁,等個面燒得再香啲,而且時間同火力嘅控制都較之焗爐更為方便準確,燒得外焦內嫩,正~~



一舊豬頸肉,切好都幾大份㗎,出邊食,一份得依度一半咁多咋~~~


自己醃嘅味道,香噴噴,即燒即食,正~~



食時伴以印尼沙嗲醬同食,強哥至愛`~~



上次有網友問沙嗲醬係點樣,如下圖所示~


一次都係用佐三分一,用水開稀即成`~


好方便㗎。。。。



蒜蓉炒多一個青豆角,搞掂~~



係出邊食過咁多間嘅燒豬頸肉,真係知道自己醃嘅味道,絕不會失色於任何一間,好自豪㗎~~



 


 


21 10月, 2010

「食譜」糖醋青瓜伴荷包蛋

超級巨風就要打到嚟,大家出門之前記得刪好門窗啦~


每年打風都見過有人因為無刪窗而被風大力吹拍之下震碎玻璃,自己屋企有損失就不在話下,若因此而傷及無辜,咁就真係好無謂啦~~


今日去超市,人人難掩打風前嘅興奮與憂慮,係咁狂掃貨,有用無用,掃返屋企先算,就算打到埋身,係屋企唔洗出門都可以解決一日三餐問題嘛。


我就買佐啲薯仔豆角青椒青瓜依類耐擺放嘅餸菜,肉就買佐啲雪藏肥牛排骨咁,雪住食幾日都無問題,罐頭之類嘅都少不免入定啲貨啦,總之做好準備,就可以舒服避超級巨風啦~~~


~~~~~~~~~~~~~~~~~~~~~~~~~~~~~~~~~~~~~~~~~


好耐無食過糖醋青瓜添,咁就買佐兩條青瓜返嚟,用最簡單嘅方式去醃制。


首先準備糖醋汁「白醋+砂糖+辣椒絲」


白醋與糖嘅比例可以大約以1:2嘅比例去配,不過都要視乎唔同嘅白醋會有唔同嘅酸度去調適,依個就要自己去試味啦。



因為只有幾個鐘時間去醃,所以我就將青瓜切條,體形較幼,咁醃嘅時間就無需太耐。


青瓜打橫切片,無需太薄,太薄食落就失去本身嘅爽脆口感。


打得越橫,切好嘅條就越長。



切好片嘅青瓜片,再豎切成條,咁樣切成嘅條狀,就有頭有尾有中間,食落會爽脆好多~~



切好條嘅青瓜,就咁直接擺入糖醋汁里邊,撈勻醋汁,擺入雪櫃醃二三個鐘左右即成~~~


完全無需落鹽去醃個青瓜,因為一落佐鹽,青瓜就會變腍,咁食起上嚟就無咁爽啦~~~



做餐前小食又好,飯後零食又得,清香酸脆,女仔至愛~~



晏晝強哥話返嚟食飯,懶得煮太複雜嘅餸,諗起電視阿蘇教過一味青瓜煮荷包蛋,咁就一於試下味道。


煎幾隻荷包蛋,剩低嘅糖醋汁同少少青瓜。



將糖醋汁倒入鑊煮一煮滾



加入老抽較色水,俾返少少芡汁埋個芡



熄火,倒入荷包蛋同青瓜,等糖醋汁掛住係蛋度~~


青瓜唔好太快落,如果唔係,一加熱就煮到腍哂~~


利用爐嘅餘熱去令到全部材料入味就足夠啦~~



好簡單好快手嘅一碟糖醋青瓜荷包蛋,就整好啦~~


幾分鐘嘅事情~~


味道又真係幾好㗎,好開胃,下次如果再整有凈嘅糖醋青瓜,會再整返依味餸~~~



除佐荷包蛋,飯面蒸多兩條東莞臘腸



晏晝嘅粗茶淡飯,一樣都可以好好味~~~



~~~~~~~~~~~~~~~~~~~~~~~~


之前一晚整佐隻豉油雞,有凈好多,夜晚就同醬汁再回鑊加返熱。


煮好餸強哥未返到,咁就擺上爐,利用餘溫座熱佢。。。


估唔到個汁係咁啵啵啵係度煮緊~~~



所以依味餸,食到尾,都總係熱辣辣,正啊~~



炒多碟仔油麥菜,搞掂~~~



 


 


20 10月, 2010

「食譜」早餐之煎椰香麵餅+豬柳蛋漢堡包

屋企長期會備定高筋同低筋麵粉。


只要有一包麵粉,早餐隨時可以有百幾種變化。


麵粉要買比較新鮮製造嘅,擺耐佐嘅麵粉,會有霉味。


所以我好少去超市買麵粉,因為流動性相對較弱,咁麵粉轉得慢,就未必咁新鮮,所以一般我會去賣烘焙材料嘅舖頭買麵粉,果度出貨快,嚟貨密,可以保證到麵粉嘅質素,日本出嘅麵粉質素就已經好好,十幾蚊已經有好大一包,可以用好多次,家庭用最經濟實惠。


~~~~~~~~~~~~~~~~~~~~~~~~~~~~~~~~~~~~


前日早餐,煎一個最基礎嘅麵粉餅。


細個時阿媽識得整嘅麵食不多,連包包都唔多識得整,唯一最常見嘅麵食就係依款煎麵粉餅啦。


原來我從來無整過俾強哥食喎,可能係過於簡單,一直無諗過依樣嘢,不過有時越係簡單嘅嘢,反而越見經典~~


材料好簡單:


「高筋麵粉+水+砂糖」


其實就咁幾樣材料已經可以煎到,不過我想味道再突出啲,就再加多幾湯匙椰漿。


細個時總係要阿媽落多啲椰漿,有椰香味食落好味好多㗎~~~



因為無油無乜,凈係麵粉加水加糖,係好易混合,所以攪幾下,已經開好個粉漿。


水嘅份量無問我有幾多,我都係自己慢慢加,一邊加水一邊攪,基本上一分鐘我就開好個粉漿啦,濃稠程度可見圖示~


糖嘅份量,隨個人喜好,可以攪好粉漿後試食一滴,人嘅舌尖係負責甜味,所以用舌尖試味最準確,覺得唔夠甜就再加少少糖。



然後好簡單,熱鑊落少少油,兩面煎至金黃即可`~



強哥同我一樣,鐘意煎到脆卜卜嘅口感,煎到邊邊脆卜卜,中間都依然係好綿嘅口感,食到濃濃嘅椰香味,同細個時嘅記憶,係一模一樣嘅~~~


連強哥都話,好好味~~~



強哥一邊食我一邊係入邊煎,隨時保持有熱辣辣椰香麵粉餅~~


因為好薄,所以強哥一次食佐成五件咁多添啊~~~


早餐無乜諗頭嘅時候,依款麵粉餅,係不二選擇~~~


係依款麵粉餅嘅基礎上可以有無數變化,譬如可以落蔥同鹽,俾少少胡椒粉,煎出嚟嘅咸味蔥香麵粉餅,都一樣好好味㗎~~



~~~~~~~~~~~~~~~~~~~~~~~~~~~~~~~~~~~~


第二日,依然都係高筋麵粉。


幾湯匙嘅麵粉,加少少酵母,水,牛油,搓成一個麵團,然後俾佢發酵變大。(其實就係整饅頭嘅步驟)


搓麵團我用嘅水,稍多少少,等個麵團較為濕潤,然後我都唔係搓得好耐,隨便係咁搓到麵團光滑就算㗎啦,唔會好似整麵包咁,要搓到起筋起薄膜,求其搓成團就算數。


我開少少火等爐頭變熱,麵團擺上爐頭,半個鐘就發到二倍大~



然後將發酵完成嘅麵團,分割成幾份,搓成圓形再壓扁。


然後放置五分鐘等佢二度發酵。



然後平底鑊,落少少麵粉落去,開火熱鑊。


將麵餅擺入平底鑊,開細火慢火煎焗至兩邊金黃,期間要蓋埋蓋乾焗等中間都熟透。



因為依次嘅麵餅唔係太大,所以全程煎焗佐都係十分鐘左右就搞掂~~


睇下,三幾下功夫就整好啲包包啦。。。


咁留返第二日早上整返熱佢,就食得啦~~



因為係擺係雪櫃,所以第二日早上,我會先用水蒸一蒸返熱個包~~蒸嘅好處係可以熱透到中間。



蒸幾分鐘,等包包熱透,然後再擺返入鑊,煎至兩邊香脆返。



同一個鑊,煎一煎熱個漢豬柳漢煲扒,煎個蛋,夾塊芝士。



一個好快手嘅早餐,好滿足添。。。。。



迷你豬柳蛋漢堡仔早餐~~~



豐富咧~~~