「食譜」瘦肉粥配牛肉卷餅

今日國慶假期，同老公都瞓都好晏先起身。

咁就早餐晏晝一齊食，食完晏晝過香港果邊行下，夜晚約佐屋企人係灣仔果頭食上海菜。

想食啖粥，咁就樓下買佐盒免治豬肉返嚟，煲一個瘦肉粥。

免治豬肉用「薑蓉、豉油、糖、酒、生粉、水」醃好味。

煲好一個白粥底，拍塊薑入去一起煲白粥。

粥煲好後，將醃好味嘅肉倒入去滾幾下滾熟，就搞掂啦。。。

粥入邊我落佐啲鹽去俾味。

切佐啲生菜絲。

香噴噴瘦肉粥，加啲胡椒粉，香香脆脆生菜絲，一人一大碗粥，滿足！！！

突然好想食餅仔。屋企無佐麵粉，好彩有包韓國餅仔粉，咁就用佢嚟整啦。

其實平時整包包用嘅普通麵粉嚟整依個卷餅都得啦，無需咩好特別嘅粉。

麵粉加水，加一細匙油，撈勻即可。一分鐘就可以較好個粉漿~~

然後粉漿倒入平底鑊，儘量將粉漿攤薄啲，煎一煎定型。

然後打一個蛋係面，又係慢慢用個湯匙底，去抿開個蛋液。

我買佐一罐台灣出嘅牛肉醬，依款醬入邊有紅麴米，多佐啲類似南乳咁嘅味，咸咸香香，好惹味。

將牛肉醬舖係蛋液上層，最後再落啲生菜絲。

將佢卷起，兩邊煎一煎香，搞掂。。。

切成一截截，伴以少少酸辣醬，正。。。。

一人一碗粥配一條卷餅，滿足到不得了。。。。