小菲菲俠自煮樂

28 5月, 2012

家常便飯

依排強哥成日要開夜,好遲先返屋企,所以我基本上都懶得係屋企開火。

係出邊食完先返嚟,干手凈腳。

不過耐唔耐都要煮返幾餐先得嘅。


買佐一隻雞返嚟。簡單地用「生抽老抽、薑、蒜、糖、客家黃酒」


炒成一碟。

無乜難度,謹記炒雞無需落太多水。

水落得多,炒出嚟嘅雞就無咁鮮味。


雞靚,炒得好,味道無容置疑。




買佐一斤莧菜。


本地出產,無落太多化肥,所以菜食起上嚟,不會起渣,更為清甜。

簡單地清水淥熟,淋啲腐乳醬伴食,已滋味無窮。




食肉嘅戰鬥力明顯減弱,一碟雞食佐三分一就無力再戰。

菜就當然清哂~~



半條甘筍,幾條茭白筍,幾條青椒。

咁就一個晚餐。





青椒炒肉絲。

故意煮耐啲等青椒淋啲,咁就好入味,好惹味,好好餸飯~~~




干煸茭白筍。

炒得好夠鑊氣,自己都好滿意。




開飯~~




清茶淡飯

天熱唔想食肉係真嘅。

買佐半斤油麥菜,浸幾條枝竹,加埋些少豆豉魚。

炒埋一大碟。好好味。

超鐘意食枝竹。





脆肉瓜切片同少少臘腸粒炒埋一碟。

好清爽。




某日早餐。

麵粉開水,加少少五香粉,鹽,香蔥,攪勻。



煎成餅仔。

好好味㗎~~




另一日晚餐。

幾乎叫全素。

薯仔切片,加麵豉炒成一碟。






蒜蓉炒脆肉瓜,好清甜。

我就食得好開心。

強哥就默默地,扒完一碗飯,我知道,沉默,代表佢嘅傷心~~~


涼薯瘦肉包

某日又整大包。

整佐好多個,可以做二三日嘅早餐。



依次用涼薯加肉碎加蔥花做餡。




涼薯白鑊略炒,落少少豉油,炒走青味。

肉碎預先用豉油炒熟。

所有材料撈勻,落一匙胡椒粉。



包就咁簡單。




因為包得較多,要分兩籠蒸。

睇下,蒸好後嘅包包,同生嘅包,身形爭幾多~~




又鬆又軟嘅涼薯包,完全係阿媽嘅味道,新鮮蒸好嘅包包,忍唔住即刻食佐一個~~





晚上,用凈嘅涼薯,切粗條,加埋牛肉,加上牛肉燒汁,炒埋一碟。

超好餸飯~





炒多碟菜~

開飯~~~


糯米燒賣

好鐘意食糯米嘅食物。

所以耐唔耐會整下糯米嚟食。

依排多佐新鮮糯米上市。買佐幾斤返嚟慢慢食。

依一日整糯米燒賣。


做法以前寫過,可以參考另一文章「http://blog.yahoo.com/_TYO2LOZIMZEMASBBQ6KC3UYDUA/articles/14460


臨時興起要整,無買到皮,唯有自己搓揉。

好易嘅,麵粉要做「燙麵處理」

所謂「燙麵」指嘅係對麵粉嘅一種處理方式,用煲滾嘅滾水,衝至麵粉度,等麵粉短時間煮熟一部份,咁樣處理過嘅麵皮,較為軟口。

幾湯匙嘅麵粉,一個全蛋,幾粒鹽,無乜比例,求其落,中式包點係咁好玩,無需太刻意。

如果一次整得多,麵粉用得較多,當然雞蛋嘅數量要相應增加,依個唔洗點講。


將蛋同麵粉略略攪勻,然後衝入煲熱嘅滾水,搓成麵團。





將搓好的麵團,放置十分鐘左右,然後均勻地分成數粒。

以搓成麵皮。



糯米嘅餡好隨意。

煮好的糯米飯,撈少少豉油,臘味,菜脯粒,冬菇粒,蝦乾粒。(預先炒香)




搓好的麵皮,包上較好味嘅糯米餡。




上鑊蒸七八分鐘即成。




對我依個糯米怪嚟講,超好味~~




晚上買佐一個青椰菜,加煙肉黑椒鹽。

炒埋惹味好餸飯。




蕃茄蛋。

熱天食嚟最一流。

開飯。。。


蕃茄雞蛋麵

天熱的緣故,唔多想食飯,某晚,凈返嘅鹵水汁,加幾舊豆腐入去,煮煮又一碟。





係樓下買佐幾隻煎餃伴食。




淥佐兩碗麵

最普通的麵條。



淥過麵嘅鑊無洗,直接炒兩個大蕃茄,加幾匙自制酸豆角。



加清水,落鹽,落煎好嘅雞蛋,煮滾即成一個蕃茄湯底。

 




淋上預先煮好嘅麵度,一人一碗蕃茄雞蛋麵。




開餐~~~


16 5月, 2012

鹵牛肉續

鹵好的牛肉放在雪櫃里,第二日想吃的時候取出,鍋里加入一點點的水,稍稍加熱即可。

不一定要完全加熱透的。








加熱後的牛肉切片,醃過再鹵的牛肉特別入味,不沾任何汁就直接這麼吃,就很好味道了呢。





不過鹵牛肉,我又特別愛配著一些蒜醋同吃。

白醋加白糖加一點辣椒干,做個糖醋汁。




糖醋汁里的蒜用的是生蒜,味道會香辣一些。

鹵好的牛肉,稍稍點上一些醋,味覺上是絕對的相得益彰。





天氣熱,不想呆在廚房太長時間,所以做了個蒸菜。

蒜蓉蒸娃娃菜。

娃娃菜洗凈後,一層層地舖在碟上,中間及面頭舖上一層預先炒熟的「熟蒜」,淋上一小碗的高湯,上鍋蒸十分鐘左右。


和上邊提過的糖醋汁不同的,這樣的蒸菜,用的熟蒜,少了生蒜的嗆辣,多了一份蒜的濃香,味道上更為理想。







蒸好的娃娃菜,取出淋些蒸魚豉油調味,最後淋上一些滾油,或是預先制好的蔥油,開吃吧。。。

清甜香濃,夏天吃來,猶其一流`~~




關於煮飯,只有好的米,不足夠。

關於米,中國人有個說法「好米不長飯」

就是說,好的新造的米,煮好後不會發得太多,吃起來才會油亮爽彈,粒粒口感分明。

我是飯桶,除了好菜,更要好米配。

最近愛上一種越光米,煮出來的飯,完全就是想像中需要的那一樣。

一般新米,都比較不長飯,並且較為硬身,所以煮飯就需要一點小小的技巧。

洗好的米,加入足夠的水量,浸泡的飯煲里十至十五分鐘,然後再開始煮飯。

先浸泡過的米,煮出來的飯粒,更油潤爽滑,比沒浸泡過的飯,口感好出數倍不止。






煮好的米飯,用飯勺鬆一鬆開飯,讓水氣散開,煮好後稍等五分鐘後再吃,這個時候的米飯才到達最完美的境界。

軟硬適中,粒粒彈牙而油潤,這樣的米飯,光是拌點醬油,都能吃光三大碗的呢。。。





昨天強哥下班早,轉去街市,買荔枝回來給我吃。

看到路經的酒樓剛剛掛出烤好的燒腩仔,斬了半斤回來加餸。


回到來已經略帶濕氣,我回鑊再略略爆一爆香~~~






買了個椰菜,加煙肉及黑椒同炒。

好餸飯~~~

是爆完腩肉後不洗鍋,利用腩肉逼出來的油脂炒的這碟菜。

非常有鑊氣~~~


 

12 5月, 2012

鹵水牛肉

好想好想食荔枝~~~

點解今年還沒看到有總未見有上市嘅?

荔枝狂人如我,有節制地情況下一天只需要食三斤就足夠,在我看來世上沒有比荔枝更好吃的生果呱。

往年依個時候妃子笑該上場啦。今年好似遲佐。。。。。


今日特別一大早跑到街市,成條生果街轉佐一個圈,竟然無一檔有賣荔枝嘅,真係失望到極。




買佐一堆其它生果,但係點樣都取代唔到荔枝在我心目中的地位。

比較能夠和荔枝相抗衡的,大約也只有肉了。 

係㗎,我愛食肉。

熱天無乜胃口食熱嘅肉,但係可以涼著食的肉,還是能夠接受的。


開鑊鹵汁,鹵肉吧~~~

提前一晚,將牛腱,X  X  X  出無數個窿窿。

作用係利於入味。








然後擦啲豉油,糖,酒,孜然粉,五香粉。

目的係讓味道先進去,醃一個晚上。

順便醃左幾隻雞亦。






其實鹵嘢係特別簡單,我覺得吶。

將任何想食嘅食材,擺入鹵水煮熟佐再浸一浸入味,其實就可以了。

我超鐘意食鹵水豆腐。

買佐兩件布包豆腐,橫切一半,一分為二。

變成四大塊,落鑊炸至兩面金黃備用。





開始準備鹵汁。

我準備了:

「八角一粒、香葉一片、甘草一粒、薑一小塊、蒜兩粒、花椒一小把、干辣椒一小把、小茴香數粒、孜然粉一小匙」

先用油略略炒出香味。

炒出香味的香料,用個鹵包裝起佢。






鑊里加清水,加生抽老抽,冰糖,酒,鹽,一匙柱候醬,一把青蔥。

份量的多寡自己試味,比平時煮餸略咸少少即可。

加入鹵料包,開火煲滾大約十分鐘左右,讓醬汁的味道出來。





鹵水牛肉我唔鐘意過於淋軟嘅,較屬意食起來略硬少少,比較有咀嚼的樂趣,所以一般我都會鹵個半個鐘左右即熄火。

依次需要鹵的材料有三種「牛肉、雞亦、豆腐」

最經煮的是牛肉,其次係雞亦,最後係豆腐,所以落嘅次序,由難至易。

先落嘅係牛腱,落鑊煮二十分鐘,中小火滾煮。






鹵佐二十分鐘牛腱之後,擺雞亦入去繼續鹵。

雞亦我打算鹵個十分鐘左右即可。




凈返最後五分鐘的時候,掉豆腐入去。

豆腐鹵好五分鐘之後可以熄火,浸泡一個下午,至晚上食嘅時候,就已經非常非常入味了。







必需非常非常負責的告訴大家,鹵好的豆腐,真係超級超級超級好食㗎!!!

一鹵好,我試佐一細細啖,忍唔住再試一口,再試,再試。。。

就咁,三幾分鐘之內食佐兩大塊的豆腐~~~

嗝~





後悔,點解唔買多兩件豆腐。

聽日啦,聽日再買過兩件豆腐,掉入去鹵汁里繼續鹵,食到膩為止。

鹵汁的味道徹底地滲入到豆腐的每一處肌膚,外邊係酥酥香香,里邊係嫩嫩香香

比肉好食無數倍~~~





撈起雞亦,切少少青瓜。

我唔鐘意食雞亦,一只就足夠。

試味而已,先醃了一晚,再鹵過的雞亦,濃香濃香的~~






天熱,無胃口食飯,淥佐啲米粉,拌上鹵汁,清爽`~~





強哥鐘意食麵。

佢自己落佐碗湯麵。

韓國麵的麵身算係幾爽彈嘅。





全家福~~~

有粉有麵,有肉有豆腐。

好食又易到極~~~




另外兩舊鹵好嘅牛腱,連埋鹵汁擺入雪櫃,浸多一晚,更加入味~