小菲菲俠自煮樂

30 11月, 2010

早午餐之---香煎年糕、蕃茄煮花花菜

今朝半夢半醒之間,腦海中突然清晰地透出一陣教堂果種管風琴的樂聲,聲音平靜而安寧,被樂聲驚醒,睜眼一睇時間,清晨六點正。


已經唔係第一次,睡夢中突然會被奇怪聲音驚醒,譬如對上一次,係夜半時間,突然地「感覺」到有個女人若隱若現的嚶嚶抽泣圍繞係我身邊,而果種悲傷的感覺連聽者都似乎能夠感同身受,閉住雙眼,細心傾聽,想搵出發聲嘅地方,同時間,係好清晰地可以聽到身邊強哥嘅呼吸聲,兩個係完全唔同嘅聲音,因為好奇,我開大雙眼問佐聲「邊個」,而果個抽泣聲,就立即應聲而止,之後再無聽到過,我係好肯定唔係發緊夢,因為開大眼之前,已经識得去思考同搜寻声音嘅来源处,之后總睇佐下床頭嘅時間,而果一種抽泣嘅聲音,唔係平日習慣經由耳膜傳入大腦嘅訊息,而係一種似乎係一條細細嘅聲線慢慢鑽入腦海之中再由腦海反映返出嚟俾我聽到,令人聞之印象特別會深刻。


類似經驗,已經好幾次,所以再遇到,並不會感覺驚恐。


因為家族中,有過類似經驗嘅,我並不是第一個。由長輩處得知,姨媽經常地可以睇到一啲常人睇唔到嘅物體,不過佢睇得到,就聽唔到聲音,所以其實我有少少擔心,自己會否漸漸地,會越來越頻繁地聽到一啲常人聽唔到嘅聲音?定係我嘅耳膜出現佐問題?莫非我耳仔有炎症?


~~~~~~~~~~~~~~~~~~~~~~~~~~~~~~~~~~~~~


阿媽整佐底年糕嚟俾我做早餐。


阿媽同我一樣㗎,成日會整各式各樣嘅食物出嚟食,所以雖然唔係過年,因為想食,佢都會蒸返底年糕過下口癮,都好嘅,我都有份食,又唔洗自己整,幾好呀~


尋日朝早就煎年糕食。


先將年糕煎軟熟。



阿媽教落,就咁沾蛋液好難痴得上太多,所以煎軟熟嘅年糕,就先上一層生粉,然後再沾蛋液,再落鑊蛋,咁樣會痴得蛋多啲~~



果真係咁,蛋液痴上好多,煎好後,香噴噴。。。。



總有二個矷仔糕,以前買開都係三蚊個,果日夜晚同強哥散步行到見到想食,就買返兩個,點知依家加價加到成五蚊個,真係貴得緊要,好食都唔係你係咁加價嘅原因㗎~~



甜蜜蜜嘅一個早餐~~



晏晝強哥返嚟食飯。


咁就蒸個飯炒個菜。


一煲水全無浪費㗎,先煮熟個花花菜,然後再煮一煮個蕃茄好去皮,最後用返同煲水蒸熟碟飯,幾好啊,無浪費到燃氣。



用蕃茄煮花花菜。


先爆香蒜蓉,再放蕃茄入去炒腍身,倒入醃好味嘅免治豬肉入去,等個汁甜啲,炒到肉熟,俾啲砂糖同少少鹽,再加埋少少茄汁,煮好個蕃茄汁。


個蕃茄好大個啊,買佐兩粒蕃茄,已經有一斤幾重啦,唔知有無呃我稱咧~~



然後將碌熟佐嘅花花炒倒入去翻炒均勻即可~~



好開胃嘅一道菜嚟㗎~~



同場蒸多一條潤腸,強哥鐘意食,我麻麻~~



晏晝簡簡單單又一餐~~



 


 


29 11月, 2010

非傳統隨意版水煎包(詳細圖解)

係街市買佐扎香蔥,依種紅色蔥頭的小香蔥,蔥味特別香濃,最適合愛嚟拌餡。


或者切佐紅蔥頭的部份,用油爆出香味,再拿來炒其它的餸,都特別美味。


香蔥好便宜啊,一蚊雞有一大紮,依次都不過係用佐三分一。


原本打算買佐蔥係要做鹹魚茄子時用的,突然地諗起香蔥拌成餡後的香,又突然地諗起香酥松軟的水煎包配著香噴噴的香蔥肉餡的美,這一想像,可就不得了,話做就做。。。。




屋企有一舊肉,係買來準備滾湯切成肉片用的。


一般滾湯我喜歡買這樣的“上肉”,帶點肥,帶點皮的部位。


厚厚的,特別好切片,切成片的肉,簡單地用豉油生粉糖醃一醃,用來滾湯,滾好的肉片,特別特別滑嫩呢。


或者愛來炒也是不錯的。。。


我就用佢剁碎做肉餡。




講下我拌餡的調味料。


1、我無講究調味的次序,就取個碗,倒“生抽、老抽、雞粉、砂糖、少少鹽、胡椒粉、酒、生粉”全倒係碗裏,然後倒幾湯匙清水,將所有調料調勻。


2、然後將剁好的肉倒入碗裏,一個方向大力攪至起膠。


3、然後再倒香麻油,隨便拉一拉肉,等香油的味道附在肉體上~~


4、香蔥與姜剁碎拌在一起,倒少少燒滾的油入去,將香蔥與姜的味道炸出來。


5、最後將上個步驟的姜蔥倒入碗同肉拌勻即成。




開始講下我制作非傳統水煎包的過程。


至於怎樣非傳統,就係依一度,留意了~~~


做法:1、首先酵母粉先用少少暖水同少少砂糖開佐佢,靜置幾分鐘,等酵母水明顯漲大發起,就可以使用。


依個步驟極重要,你首先確要保酵母的生命力被你完全喚醒,才可以繼續下個步驟,如果發不起的酵母,說明已經係死物,再點樣完成後面的步驟,也屬枉然。


2、然後取幾勺面粉,掉一把砂糖入去,將上個步驟的酵母水倒入去,俾多少少油入去。



3、倒入清水,將麵團和好。


我就一邊加水一邊揉面,無特別去搓佢,就隨便地將麵粉同水混和好即成,不用辛苦地揉來揉去揉成什麽表面光滑果啲,全部無啊,就好隨意地揉成水和麵粉混埋即成,我水落多佐少少添,個麵團特別軟,很難揉成光滑,所以我都放棄要揉成光滑的要求了,隨意地就揉成看似一團即可。


4、揉好的面團,擺埋一邊,醒大約五分鐘。


沒錯,你沒睇錯,就醒個五分鐘,完全無發酵的狀態,還是死麵一團,充其量就係一團較軟的麵團。



5、五分鐘之後,因為麵團太濕太軟,所以就俾啲啲幹粉,咁先將麵團取出來,在案板上滾二三下意思一下,可以開始包了。



6、甚至唔洗又搓又捏的,直接就咁用刀,將麵團分割成細舊,就可以開始包包了。


因為係直接就咁切割的,所以切成佐四方形,咁我就用手心壓一壓扁面坯,再用撖面仗隨便地壓幾下變成一個隨意地“圓”,咁就可以包餡入去了。


我包的肉餡好飽滿㗎,一大匙的“肉”包入去,吃起來,滿嘴都係香香的肉餡,幾滿足啊。。。



7、依個時候,平底鑊要上場了,平底鑊淋上少少油備用,然後將包好的包包直接就咁擺入去放靜置



包嘅功夫就好快,三幾下就將所有包子包好了,個鑊都剛好擺得滿一滿,真係剛好得咁緊要,面團剛剛好用完,肉餡凈有少少,而啲包包,都剛剛好將個鑊擺滿了,再多一個,都沒地方擺添。


8、依個時候,就開始包包發酵的步驟。


將包好嘅包包,就咁入平底鑊,靜置大約半個小時,下圖係發酵前嘅狀態



尋日天氣還是幾熱下㗎,所以我都係發佐大約半個小時,包包就發起來了呢,其實唔洗發得特別巨大,稍稍看到發起就得了。


9、我整水煎包,唔係先落水去煮,而是先煎個底,如下圖所示,包包發起了,咁直接就先開中小火,目的係將包嘅底部煎出香脆金黃。


所以我預先已經擺佐油係個鑊度,所以煎嘅時候,就不用再另外俾油了。



10、整包時用嘅手粉(即係麵粉)用凈少少,咁就加點清水,調成一碗仔麵粉水。



11、煎幾分鐘,感覺包嘅底可能已經煎定型了,咁就可以開始落水去煮了。


直接將上個步驟調好的麵粉水,倒入鑊度,開中小火,煮大約七八分鐘,等包包煮熟。



煮嘅過程係要蓋埋個蓋嘅,等待嘅過程,心情總是愉快的~~



12、煮嘅時候,人唔好走太遠,要留意水煮的情況,睇到水煮幹佐,再稍煎一煎底部,將水份煎幹佐,底就香脆了,最後將包包翻轉個身,表面都煎一煎吧。。。


可以睇到底部,煎得金黃漂亮吧。。。。


而果一碗的麵粉水,煎好後就形成佐薄薄地一層香酥面皮,勁好食㗎。。。。



表面稍稍煎香二三分鐘,咁依款「水煎包」就大功告成~~


睇到金燦燦嘅包包,心動嗎~~~



撕開睇下內部,肉餡水盈滑嫩,香氛撲鼻,最重要,係先整好包包嘅形狀,再發酵的非傳統做法---------


“包皮”同樣松軟可人~~


咁樣的做法,對於搓面沒咩信心的同學來講,係非常值得嘗試的一種做法。


咁,我哋就唔客氣,食先了~~~



27 11月, 2010

豆沙鍋餅「食譜」

雪櫃有早幾日煎pancake凈低嘅少少粉漿,擺佐係雪櫃,我本嚟想養住啲酵母菌嘅,點知可能凍過頭,啲菌死哂,咁就變成死面漿一碗啦。


本住知慳識儉嘅理念,當然唔好浪費啲粉漿啦,因為係低筋麵粉漿,而且有蛋液,咁我就諗住同高筋麵粉結合,減少佢嘅筋度,愛嚟做豆沙鍋餅嘅面皮。



所以直接係粉漿入邊,加入幾湯匙嘅高筋麵粉。


我因為係「物盡其用」,所以先至咁做姐,如果平日自己整,只需要中筋麵粉,加水揉成麵團。


不過如果凈係用中筋麵粉整,記得水嘅量要稍多,同埋先衝少少滾水入去,碌熟一部份麵粉,等佢嘅筋性減少,如果想口感再軟熟啲,可以摻少少「栗粉」入去,效果都唔錯㗎。



甚至無需要用手去揉麵團,加水稍多一些,用一對筷子去大力攪下攪下,二三幾分鐘就攪好個麵團。


睇下圖,個麵團係好稀㗎,係稀到可以咁樣拉得起嘅效果。


攪好麵之後,擺住係室溫之中半個鐘,等個麵粉同水份融合,產生筋度。


(其實完全無需落手去搓,一對筷子就搞掂啦,係咪好容易咧)


(大家唔洗問我詳細嘅麵粉同水嘅比例,我係無㗎,要自己一邊落水一邊去調適,


做中式點心唔同西式,所有份量都要非常精準先至可以做得成功,中式點心較為隨意,多啲少啲材料,只要大概嘅做法無偏差太多,基本上都可以做得出嚟,對份量嘅要求無咁精準,依個就係我鐘意整中式點心嘅原因啦)



半個鐘之後,將醒好嘅麵團到出,因為較軟,所以要係表面拍多啲麵粉,咁就分割為適當嘅幾份。我麵粉較少,就分割成三分。



試幾種唔同包法。


先係將麵團搓成一塊薄片,然後將豆沙搓成薄片再舖上去,最後再折好,就落鑊去煎。



咁樣整係最搵笨,工夫要多好多,食起上嚟味道雖然一樣,不過咁鬼難搞,都係咪咁搞了。。。。



最簡單係將麵團好似包包咁,將豆沙包入麵皮度,然後壓扁。



壓扁之後再搓成一塊薄片。



再落鑊兩邊煎至金黃。


煎嘅時候,要蓋上蓋,咁樣會產生水蒸氣,咁麵皮就唔會因為太乾而太硬,食起上嚟就會鬆軟好多。。。。



因為我係整好留返第二日早餐,所以唔洗煎得太金黃。


煎熟就得啦。



咁到佐第二日早上,再擺入鑊,落幾滴水去,先蒸熱,再揭蓋煎至香脆~~



隔佐一晚再食,當然無新鮮即整嘅時候咁好味,不過都OK接受嘅~~


大家可以睇得出,個邊邊位,真係好鬆軟㗎~~


個麵皮整得好好,好似街食果啲咁軟熟,下次我要將豆沙轉成肉餡,一定總好味`



豆沙鍋餅早晨全餐~~



個邊邊位係好鬆軟㗎,而中間嘅麵皮,因為隔夜再煎返熱,所以有少少脆,食落極過癮~~



26 11月, 2010

有菜有湯

噪聒之婦簡直係全宇宙最恐怖嘅物體。


肆無忌憚地係公眾場合以高分貝同大家分享自己對家庭對社會嘅獨特見解,不管不顧旁人是否有傾聽意願,一廂情願地無私分享,實在叫人「情何以堪」~~


事緣尋日,同強哥座巴士去機場,諗住時間充裕,由得巴士慢慢開,權當游下車河,欣賞下四周風景,不亦樂乎~~


屋企樓下就有巴士搭去機場,由總站座到尾站咁滯,本住輕鬆情緒上車,點知上車無耐,兩位婦人帶同三位小童上車,就座正后座同隔離,悲傷地時刻,由此開始。


先係後座兩小童,不停係座位拉伸彈跳,吵吵鬧鬧,又要食嘢又要飲水,嚴重直接滋擾到座係前位嘅我,不停咁有人撞到我嘅座位,好唔舒服,我不嬲唔鐘意小朋友,覺得佢啲最叻係「持幼行兇」,最識得利用本身弱勢去大行無理之事,所以好唔客氣咁回過頭狠狠地「啤」佐佢啲一眼,好彩,小朋友始終係未來嘅希望,都好明白事理,表明佐我嘅態度之後,佢啲都識得自我收斂,無再係咁撞來撞去。


如果大人都可以好似小朋友咁明白事理就好啦。。。


果兩位婦人,係小朋友停止打鬧之後,開始佢啲暢談人生嘅巴士旅程,由「大家哭」「扣足一百分」事件講到屋企人嘅性格分析,真係好佩服佢啲「滔滔不絕永無枯竭」嘅口才,全程講足個幾鐘頭無停過,講都唔緊要,兩個人私下細細聲交談無乜所謂,最緊要係越講越興奮,越講越激動,聲浪越講越大,成車人逼住要同佢哋分享佢哋嘅社會見解,救命啊。。。。


~~~~~~~~~~~~~~~~~~~~~~~~~~~~~~~~~~~~~~~~~~~~~~~


發現滾菜湯其實真係又簡單又好味。


做法:


煲底落少少油,爆香蒜蓉,然後落半碗上湯半碗清水煮開,倒入紹菜同肉丸,水滾後俾鹽調味即成~我總落多少少胡椒粉,香噴噴~~


又係菜又係湯,幾好㗎~~



雪櫃凈有少少青椒,咁就買多條牛展返嚟同佢炒埋一碟~~



一餸一湯,簡單滋味~~



第二晚,高湯凈有半盒,紹菜凈有半條,咁又再滾多次菜湯,清哂~~


煎兩個荷包蛋,買條叉燒~~


我啲嘅晚餐係咁簡單啦~~



煎半熟嘅蛋,少少叉燒,再俾啲韓國嘅拌飯辣醬,已經成碗飯搞掂~~~


飲多碗湯, 舒舒服服~~



 


 


25 11月, 2010

傳統小食--琥珀核桃「食譜」

得賴於父親的好人緣,差不多係我嘅成個童年期間,每年十一月份左右,就會有一個世伯,由鄉下托人帶一大袋嘅當年新鮮當兆嘅核桃送嚟屋企俾我啲,一袋有成二百幾斤左右,足夠我啲享用成年。


記憶中成個童年期間,屋企成日會有一大大袋嘅核桃,無窮無盡咁食極都會有係度,每日放學返屋企,開飯之前,父親都會同我搬個細細嘅凳仔,係露台度用個錘仔,舖張報紙,慢慢敲核桃,取出核桃肉出嚟享用,係生食核桃肉,因為係當年新鮮生成嘅核桃,所以粒粒新鮮清甜,一啲油膩味都無,不過當年無依家嘅薄皮核桃品種,個殼係好厚好硬,有時開得唔好,邊邊位好多肉會塞埋係殼度出唔到嚟,咁我嘅工作,就負責將果啲位嘅肉用牙籤挑出嚟。


再大啲嘅時候,我已經有力氣自己用錘仔敲核桃食,多年功夫練落嚟,好清楚知道係邊個位置用咩力度去開核桃,所以基本上用個細錘仔,就可以好完整嘅將成個核桃肉取出,得閒嘅時候,就會剝好多核桃肉出嚟,俾阿媽煲湯或者阿爸將佢酥炸之後做下酒嘅小食。


唔知同長期食用核桃有無關係咧,我屋企人嘅頭發,全部都烏黑濃密,阿媽直到依家七十幾歲人先至有返啲白頭發咋,雖然無乜白頭發,不過因為年紀大嘅關係,發澤已經帶有淡淡暗啞,無後生時咁黑到油亮嘅效果,不過能夠保持到七十二歲人先有白頭發,已經好好啦~~


~~~~~~~~~~~~~~~~~~~~~~~~~~~~~~~~~~~~~


早排係網上買佐幾斤核桃返嚟,一直擺住都未開過張。


依家網絡真係方便佐生活,安座家中,乜都可以買得到~~


咁尋日下晝無無聊聊,走去開佐好多核桃肉出嚟,諗住酥炸做小食。


一大堆嘅殼,得果一碟仔肉~~


買嘅係薄皮核桃,好似紙咁,輕輕一夾就可以碎佐個皮。。。。



本嚟係想炸核桃食嘅,不過突然醒起好耐無食過香甜酥脆嘅琥珀核桃,係一款中國古時就已經有製作嘅小食,傳到依家,識整嘅人已經好少,整得好嘅人,更加少之又少。


早幾年係旺角往九龍城方向,有一間地舖,都有依款小食售賣,整得味道都好清甜,口感好冰脆,核桃亦整得非常香酥可口,算係非常出色,不過好多年無去買過,唔知總有無係度咧。。。。


作法大概記錄下,有心嘅人,可以自己係屋企試整。


做法:


1、核桃肉用滾水浸二三分鐘。


作用係等佢將核桃皮泡起,核桃表面嘅皮會有苦澀味,浸一浸過滾水嘅皮,用個牙籤可以好輕鬆咁剔走,不過我懶,求其剔佐幾下就無搞啦。



2、將核桃用油炸至香酥脆口。


可以用焗爐慢慢焗熟嘅,咁樣就無乜油,不過我懶得開個焗爐慢慢焗,反正整少少,咁就用油炸酥佢啦,香好多㗎~~



見核桃有少少浮起,聞到香味,就炸好啦,細個時就咁炸好後,俾少少鹽去撈勻佢,愛嚟當小食真係一流㗎。。。


除佐炸好嘅核桃肉,總要一碗仔炒香佐嘅芝麻。



3、糖水比例


糖同水嘅比例應係2:1,傳統上會用冰糖嚟整,咁糖漿會清甜同香脆好多。不過我無意中發現,用黑糖整,味道會濃郁好多,所以依次我係用二湯匙半嘅黑糖,一湯匙半嘅白糖,合共四湯匙嘅糖。



四湯匙嘅糖,用二湯匙嘅水。


因為我嘅核桃較少,所以糖嘅份量相對就少啲,如果核桃多嘅,要適當增加糖嘅份量



4、開中細火煮糖漿


由得佢一直係咁煮,煮到變稠結為止,個氣泡變得好細好濃密就差不多啦。



有一個小方法知道糖漿煮好未。


準備一碗仔冰水,用筷子去點少少糖漿,如果糖漿變結,就會痴住係筷子度,然後將糖漿浸入冰水度,等佢溫度急速下降,然後試食下糖漿,如果咬一咬,覺得會痴牙,咁就表示糖漿煮得未夠,要繼續煮,如果稍硬唔痴牙,咁就表示糖漿煮好啦。


無煮得太耐啊,煮過籠糖漿會有焦味。



5、糖漿煮好後,將炸好嘅核桃同芝麻倒入糖漿翻炒均勻


糖漿凍佐好難清洗,所以鍋具可以用少少熱水去清洗,咁就好容易洗得乾乾淨淨啦



取出攤凍之後,就成為好好味嘅「琥珀核桃」啦。。。。。


糖漿唔係太多,所以食落,少少甜之餘,好食得到核桃本身嘅香味,正啊~~~


依家一邊打緊字,一邊食緊佢,開心~~



其實真係算係好簡單嘅一款小食,食落真係好超高享受,有機會,不妨一試~~