濃湯與寶

濃湯係阿媽專程嚟屋企煲俾我依個寶貝飲嘅湯，所以，係濃湯，與寶。

淮山豬骨濃湯。




阿媽最鐘意嘅雜雜炒，乜都落啲，咁就一大碟~~

阿媽係屋企煮佐好多，帶嚟俾我，可以食多幾餐嘅甜酸豬手，正到。。。。不得了~~~不得了啊~~~

我收工返到屋企，炒多個菜，熱返個豬手，咁就食得㗎啦~

真係怪哉，阿媽煲嘅湯點解永遠咁正嘅？

問阿媽點解啖湯可以煲得咁靚，阿媽就教我話，好似煲魚湯咁，排骨先用油煎一煎，然後用滾水衝走多餘嘅油份，然後凍水落淮山紅蘿卜，拍多舊薑入去，水大滾之後落排骨，中火煲一個鐘，夜晚我收工返嚟之前，再開返火煲多半個鐘，落少少鹽俾味，咁就搞掂啦。。。

多啲材料少啲水，咁啖湯就可以咁濃啦~~

簡單的一個晚餐，超好味~~

做冬

人生還有什麽事情能夠比得上在這樣冷冷的冬日裏與親愛的縮在暖暖的被窩裏狠狠地睡到實在睡不下去哩~~

 

和強哥由昨夜一點，直睡到今午一點，感覺真痛快！

 
 

尋晚回強哥娘家食飯。

當係提早做冬。

 

去片~~

 

奶奶煲嘅老火湯，花膠響螺湯。

用瓦鍋煲出來的湯水，真係唔同啲嘅，真㗎，絕對不是心理上的作用，同鐵煲煲出來的湯水，口感上確實有些許的若幹的大大的不同的差異`~~

相同的材料同時間，瓦煲煲出嚟嘅湯水，感覺上更為濃更滑~~

用雞湯浸佐一大碗嘅魚肚同白菜，鮮美到不得了~~

似乎成年無食過嘅發菜蠔豉豬手，正~~

.

蒸條魚嚟食~~~

魚肚嘅位置奶奶知我鐘意食，第一時間挾到我碗內，幾時都話，奶奶最好㗎啦~~

好肥啊條魚，食落口滿嘴魚脂的濃香，加埋又滑又嫩的魚肉，食起上嚟，無窮滿瀉的快感~

外賣燒腩仔一碟~~

白灼大中蝦~~

肥雞一碟~~

粉絲蒸鮮貝~~

最好味係底下嘅粉絲~~

雜菜炒蝦球~~

人齊食飯~~~

匯報

消失的這段時間，走去讀佐個課程，點知又俾我考到個牌返嚟，成班同學當中最無心嘅果一個竟然柳成蔭。

想試下每月有固定收入的感覺，寄佐兩封信出去，換佐份工返嚟。

大公司，福利好，強哥比我還歡喜。

最大的樂趣，在於數月之後，第一次將糧卡塞入櫃員機，看著屏幕積累的數字，得意的，微微地笑一笑，將卡繼續收返入銀包，思考一下，將自由換成若干數字的遊戲，值得玩多久。

而其中最具玩味的，莫過於雖然身處本地最具規劃的食品公司，但無人知道，我最習慣買的是對手公司的同類食品，最欣賞的也是對手公司的調料味道，自家品牌的醬料，反而是家中最少儲備。

噓......細聲啲,唔好俾公司同事聽到啦....

依個秘密,得你知,我知咋~~~

兩餐

因為我唔識得打魚膠，亦都懶得去整，所以奶奶通常都會打多些少俾我帶返屋企，咁強哥唔洗返阿媽度都一樣有得食魚餅啦。

其實自己打嘅魚膠真係完全唔同街買嘅，自己打嘅魚膠真材實料，又夠爽口又完全添加物，早餐煮面仔嘅時候，落啲入去同面一起碌熟，又簡單又好味。

依日我就將係奶奶度帶返嚟嘅魚膠，煎熟佢。



然後切片，用纜菜，豆角，魚片，炒埋一碟。

好餸飯嘅重口味餸菜。

碌熟啲莧菜，淋少少自製腐乳醬上去，食得~

全家福~~~

買菜一買一大扎，一餐食唔哂，掉佐又嘥，第二餐煮一碟似乎又唔多夠。

好似莧菜咁，第二餐食凈細半扎，咁就唯有愛嚟滾返個湯嚟飲下。

咁就完全唔會嘥嘢啦。

上一餐嘅豆角又係咁，有凈嘅豆角，多唔多，少唔少，好尷尬嘅份量。

咁我就將佢剁碎之後，同蛋一起煎成豆角蛋，加埋少少煙肉入去配食，好香口㗎~~

又買茄子食，足見我幾咁鐘意食茄子。

熱天無乜葉菜好食，來來去去，唔係瓜就係豆，轉來轉去變個花款食下，無咁悶~~



搞掂，雪櫃有凈嘅多剩餘物，全部無浪費到，勁開心~~

 

茄子

我係好鐘意食茄子嘅人。無論茄子如何烹製，我都覺得美味無比。

依日買佐兩條茄子，愛嚟讓茄子。

切成兩塊，中間夾薄薄一層醃好味的瘦肉。

因為瘦肉本身有粘性，所以夾好的茄子可以痴得好埋，唔會分開。

然後薄薄地係茄子身上拍一層生粉。




用平底鑊，少少油，煎至兩邊金黃。要俾多少少耐性，因為茄子要煎到變淋要少少時間，但係如果煎得唔夠淋嘅茄子，食起上嚟會生水，就唔好食啦。

當然，如果你用一大鑊嘅油去炸嘅話，就會快好多，不過炸完嘅油好嘥，所以我都係寧可俾多少少時間，慢慢煎透佢。

茄子煎好之後盛起，原鑊落少少薑絲同蒜爆香，倒入煎好的茄子，兜一兜，然後倒入一碗芡水（生粉、清水、少少少少糖、舊裝蠔油），冚蓋煮一分鐘，搞掂~~


惹味好餸飯。我好似都係偏向煮比較重味嘅餸菜，因為我係飯桶一個，我好鐘意食白飯，咁惹味嘅餸，配上靚靚白米飯，食落真係好幸福~~

炒多碟白菜。

全家福。

中秋

中秋做節返奶奶度食飯，二佬三佬唔係度，得六個大人，一個細人仔食飯，所以奶奶無需煮太多餸。

白灼一碟海蝦。



一碟果皮蒸鮑魚

蒸條魚

螺頭花膠湯。

早幾日同強哥去相熟嘅舖頭諗住買返包花膠入倉，真係羅命，今年啲花膠足足貴佐成倍，舊年九百幾一包嘅貨色，今年竟然升到二千蚊一包，睇到啲價真係完全落到手，你話一千幾百買包嚟食下都無防，都叫接受得到，一下升到二千蚊，我就真係唔捨得食啦，唯有努力搵多啲錢，才能追得上通漲，家下做人真係慘情，生活質素直線下降，總要係唔覺唔覺之下發生，叫人防不勝防。

無乜青菜又唔得嘅，所以奶奶就用雜菜炒魚片，當係菜仔啦。
奶奶打佐好多魚膠，飯後有得帶返屋企。

外賣一盒咸雞。

大花菇花膠燜鴨亦。

生炒菠蘿骨。

今年食飯，多佐一個人仔參加，場面即時溫馨同開心好多。

中秋六大一細，全家福~~

多餐

所謂懶開會有條癮，真係一排唔理個BLOG，就完全由得佢自生自滅。

今日得閒，良心發現，上嚟探下大家，HI，大家好嗎？

問候完，繼續記錄返我嘅家常便飯。

上個月嘅某日，晚上返嚟，碌熟啲西蘭花，話咁易~~

繼續最後的豬手。




一餐飯，有肉有菜，好過出邊街唔知食乜好。

另一日，我至愛的大青椒，炒鹵肉。

煮多味麻辣茄子，勁惹味。

全家福

豬扒雞亦依類食物，係無得選擇懶得選擇費事選擇之下的不二之選。

用薑蒜蓉，豉油糖，生粉，水，米酒，醃入味。

洋蔥炒炒裝起。

豬扒猛火煎煎



將洋蔥倒返入去，互相炒一炒，認識下，入味下。
倒入少少水，少少鹽，將醃豬扒的醬汁倒入，煮幾下，搞掂。

又簡單又好送飯。


炒多碟菜。

全家福

基本上每一餐我都會安排有一碟菜，一碟肉，依日無例外地，炒碟油麥菜。




蒸多碟肉餅。蒸飯至差不多熟嘅時候，係飯面擺雙筷子，然後再加上一碟肉餅，咁樣蒸多十分鐘，飯熟肉餅好。

幾咁易~~

又係例牌，一飯一菜一肉餅。

買佐盒牛仔骨，依家真係乜都貴得好緊要。

好耐無買過牛仔骨嚟食添，果日見到突然想食，咁就整佐盒返嚟。

好快手嘅一碟餸。

黑椒先剁碎粗粒，然後落少少鹽撈勻個椒鹽，就咁抹上牛仔骨，等佢略略入味。

然後同洋蔥豬扒差不多嘅煮法，先將洋蔥爆香，然後再倒入牛仔骨猛火短時間之內煎至兩面金黃轉色，然後倒入少少水，倒入一大湯匙嘅李記黑椒汁，兜幾下，起得鑊~~

三五分鐘煮好碟餸，不過據某人所講「極之好味」~~

炒多碟芽菜，識嘅人，睇唔睇得出。。。。

我先炒佐芽菜再炒牛仔骨，擺佐咁耐，碟芽菜一啲水都無標出嚟，依啲就係炒芽菜嘅最高境界啦~~

每一條芽菜都入味而爽脆，咁樣一碟芽菜先叫好味嘛~~

我用麵豉醬去俾味，加埋少少肉碎，幾蚊雞嘅一碟餸，只要俾多少少心機去煮，一碟平價如是的餸菜，都一樣可以好美妙。

例牌，全家福~~