小菲菲俠自煮樂

10 9月, 2008

一雞二食之第二食--鹽焗雞

上篇講到一隻雞分二邊,一邊整佐豉油雞,另一邊,用鹽焗雞粉同薑蔥醃佐之后擺落雪櫃雪佐一晚。


第二日,即係尋晚,羅出黎直接擺入焗爐。



 



乜都無須做,直接二百度火焗二十五分鐘~~



焗野就係依點好,自己會逼返D油出黎,睇下隻雞,幾靚`~



香噴噴~~



尋晚真係勁懶,直接炒佐一大煲飯,加埋一大杯汽水,一細碟仔雞,就咁搞掂。。。。


無話無菜啊,蔥都有二條O既~~~



「美X」既依款粟子杯我好鐘意食,只不過后來加價加得好離譜之餘,個身形瘦佐又矮佐,實在唔想配合奸商的行為,所以唔買黎食好耐,尋日強哥收工之后買佐幾個點心做第二日早餐,順便買佐一杯俾我,味道無變,只不過真係細佐好多~~~



-----------------------------------------------------------------------


今日本來想整北方的「醋溜白菜」,不過焗五花腩剩抵好多豬油,愛黎炒佐白菜之后覺得勁香,不捨得破壞依种香味,所以臨時改做簡單的蒜蓉豬油炒黃牙白。



新鮮豬油炒出黎D菜真係香過人`~~



買菜我多數係街市買,買肉我多數會去隔離間TASTE買,感覺乾凈D咁~~~最希望樓下開間吉之島,無辦法,師奶即係師奶,個願望都市井過人。。。。


今日買佐盒豬頸肉,同韭菜炒佐一碟,簡單~~~



夏日之夜,簡單清爽~~~



 


 


09 9月, 2008

豉油雞+韭黃炒蛋

尋日買佐一隻本地走地雞,叫檔主代為斬開二半。


一半整豉油雞。


我屋企整的豉油雞一D都唔複雜,個味總好好味添。


材料如下所示「雞+薑+蔥」



作法:1,先將薑蔥舖係鑊底



2,跟住將雞擺係上邊,加「生老抽+黑糖+清水」


加入足夠清水之后開火燜啦~~


燜至收汁就得啦,就係咁簡單之嘛~~~


最好留番少少汁沾雞,因為咁樣整出黎的雞汁,超級美味~~



睇下,靚唔靚~~


何止靚,總好好味添`~~



另外炒佐一碟韭黃炒蛋。


作法好簡單,先將韭黃落鑊猛火炒二三分鐘,落少少鹽調味,跟住發好二個蛋,將蛋液倒入韭黃度,熄細個火,慢火煎香佢。。。



睇下,個生鐵鑊依次我好錫住使,用佐將近半個月,都唔會點痴底。。。



一碟鮮味的韭黃炒蛋~~~



 


尋晚溫馨二人餐~~



係羅,總有半邊雞咧。。。。


欲知半雞如何,且聽明日分解~~~


粉蒸肉+蝦醬炒豆角

食過一次粉蒸肉,真係幾好味。所以上一次過深圳,係超市買佐一包整粉蒸肉的粉返黎,試下自己整。



買佐盒排骨,先用生粉,豉油同埋糖腌一腌入味,跟住加少少水,倒D粉入去撈勻。



搵一個底下穿窿的碟仔,切一個薯仔,厚切。舖係個碟底下。



跟住將排骨舖係薯仔上邊,入高速煲煲佐二十分鐘度。



另外用蒜蓉同埋蝦醬炒佐一碟豆角,勁扯飯~~



睇下,就係咁二味送,搞掂晚餐~~



高速煲真係好野,燜得好腍。。。。



不過我至愛的,係底下D薯仔,一咪薯仔一啖米粉,好好味~~~



原來貌似複雜的粉蒸肉,整起黎,不過如此。。真係簡單又好味~~


 


------------------------------------------------------------


早幾日抄到強哥一大本舊畫冊,原來入邊係佢好多年前總係學生哥時的作品。同依家乜都係電腦制圖唔同,當年佢完全係手工作業,總係學生哥的佢,聽聞當年憑住一支筆,幫自己搵到好多零用,真係叻仔~~


可惜依家根本全電腦制圖,畫圖一事亦都會有同事幫手,睇怕佢的手繪功夫,一早消失無晒。。。。


真係可惜~~~




以手工繪圖,真係一絲一筆都唔可以出錯,唔學得電腦製作,錯佐可以再來過,所以從整體的規劃至細節的描摹,都需要好細心好認真同埋好專心,先至好以做好,相信依個都係強哥的性格折射,我眼中的佢,係好完美的一個男人。


(男人需要女人時不時贊下佢,先至可以隨時地充滿信心征戰依個世界,所以我時不時都會講D好肉酸的說話俾佢聽嫁,難得佢都好受落啵`~~~)


煲湯食飯

對上一次的九號台風,不知道怎麼的,漁排莫名鑽入四十幾條成年黃笠倉,依排返奶奶度食飯,例必有這味魚食。


帶佐幾條返黎,是晚就用佢做主角。


係魚身上劃幾條口,再洒少少鹽上去腌十分鐘度。



煎香香之后,落少少喼汁同埋豉油,已是美味一碟`~~



近排突然好想食臘腸卷,走去榮華買佐一包,(好似一年四季皆有得賣咁啵)整臘腸卷之后有凈抵好多,愛黎同青紅椒炒佐一碟,送飯~~



屋企有少少煲湯凈抵D冬瓜,同少少肉碎炒做一碟,權當青菜~~



 


-------------------------------------------------------------------------------------


早幾日表姐俾電話我,講起我當晚,原來煲佐冬瓜湯,表姐就話好耐無飲過蓮藕湯咁話,咁周末就約佐佢黎屋企,我煲佐一大煲蓮藕湯俾佢飲。


用佐豬骨,蓮藕,雞腳,花生。。。


依家煲湯真係唔平,閒閒煲一個好平常的湯都要五六十蚊,物價真係超貴。


所以真係想係街度食到有番咁相下質素的食物,真係要俾得貴少少錢人D先可以,太平果D,真係唔知用佐乜材料來整~~~


講黎講去,都係自家整黎食,最好味最穩陣~~



幾時都咁好味的蓮藕湯~~



因為係食晏時間,個個都唔會有胃口食飯,所以買佐一包德國腸同熱狗包,加少少芥醬同酸瓜,就係主食啦。。。


表姐話想食菜,又炒佐一碟俾佢。。。


睇下,不中不西,不主不閑的一餐,有乜所謂,開心最緊要~~



------------------------------------------------------------------------------------


因為臨近中秋,國人素以禮儀之邦著稱,受此教育之下的我,逢年過節都會備齊禮物手信俾一眾長輩。


早幾日送盒月餅去俾沙田舅父(屋企舅父姨媽甚眾,唯有以地名配上稱呼方可區分)臨別時舅母送佐一大袋自制的酸菜俾我。


好耐好耐無飲過我娘親煲的酸菜湯啦,我從舅父度出黎后即刻走去買佐份豬骨,自己煲一煲酸菜湯。


強哥未飲過酸菜湯,唔知係唔係印尼華僑先至鐘意煲咁樣的湯咧,出邊好似真係無乜點飲過。


好簡單,酸菜+薑+豬骨


勁好味~~~



無需煲好長時間,一個鐘到就可以啦~~~


夏季飲來,酸酸香香,份外好味~~



切佐D鹵好的牛腱同青紅椒加少少麻辣醬同糖同豉油炒做一碟~~



沙田D野似乎真係平過第二度咁啵,舅母兩蚊雞就買佐三大把的番薯葉,知我當晚唔留抵食飯,驚我番去又無時間再買菜,就索性幫我剝好一把蕃薯葉俾我帶番黎炒,幾時都係外家D親人最錫我啦。。。。



全家福~~



 


雜集合

買佐成年「天X野」的生鐵鑊,唯一感覺係「搵笨」


因為個效果其實同雜貨舖幾十蚊貨色無乜區別,甚至比幾十蚊貨更不堪。對上一個用佐一年,基本上炒乜痴乜,最離譜係個底用得幾用嚴重變形,我用電磁爐煮食,個底唔平,炒起菜黎真係要好小心扶住個把手,用佐一年即將過保養期之際,走去佢公司加佐150蚊又換佐一個全新的鑊,依間公司D野無乜好特別,吹捧什麼什麼的特別材料鑄做全部係廢Q話,今年依款又係個蓋搞搞新意思,個頭識得自己企住咁羅~~



因為對上一個用佐一年之后實在係千瘡百孔,就算唔換都要丟佐,索性加D錢換過個新的,因為就算再買都會買番生鐵鑊,視乎係買邊種而已,貪生鐵鑊炒出黎D菜夠鑊氣,好食D。


因為今次係去佢公司換佐一個新鑊返黎,所以無人幫開鑊,唯有自己開啦。


倒佐少少油入去等佢燒熱之后用廚房紙掃一掃個鑊。憑心而論,佢又真係有做過打磨功夫,所以基本上同出邊幾十蚊的生鐵鑊唔同,新鑊都唔會產生好多黑色鐵水。



第二日搓佐D面團再炒炒個鑊,都係無黑水。表示可以用啦~~


唔知佢用佐乜涂層,新鑊真係唔會痴底。吸收上一個鑊的教訓,依次我煮食基本上唔會開盡大火,因為生鐵鑊傳熱真係幾勁,用電磁爐中火已經夠熱了個鑊。


但係依隻咁既爛鬼鑊真係唔贊得,用佐第二次,個鑊底又再變形啦,擺住係個電磁爐上邊識得搖來搖去,真係俾佢激死。


依個再壞佐,打死都唔會用咁既價錢去買咁既貨色,直接去雜貨舖買個幾十蚊貨色的生鐵鑊黎用總實際。



雖然對此鑊諸多不滿,但係有始終勝於無,飯都係要食,菜都係要煮。


買佐一個洋蔥,一舊五花腩,屋企凈抵一個薯仔,加埋落去,加少少豉油糖,加水燜至收汁。



好送飯咁羅~~



樓下惠康紹菜做特價,四蚊有一條咁大「碌」菜,我之前真係未食過紹菜,以為同係白菜咁既味,點知原來好清甜,個口感又好好。。。睇黎以后都會多D買黎食啦~~



加佐少少上邊果個鹵肉的肉汁落去炒,更加惹味~~~


加埋蒜蓉同足夠的鑊氣,菜好味過肉~~



---------------------------------------------------------------


我同強哥都係南方人,但又極之偏好面食,時不時要整D包包面面俾佢食等佢開心下~~


果日整佐一大煲豬肉生煎包,加佐少少紹菜落去~~~



皮薄餡大,無得頂~~~



依個肥肥白白被仔係乜?


係酥皮羅~~整幾個蛋塔第二朝做早餐~



整到個形狀鬼咁核突,好彩個味都好掂~~~



凈係幾個仔細細蛋塔仔,凈抵D蛋水另外再焗做一碗,好滑好香~~~



好滿足~~



--------------------------------------------------------------------------


再過多一個小小招式俾各位街坊朋友,係網上學佐一招「水養蔥大法」,買番黎D蔥用個樽仔浸少少水係個根部,咁可以養好耐啦,平日買蔥一買就一大扎,用都係果幾條仔,無用果D好快就殘晒,第二次要用又要再買多一扎,實在浪費,依家咁樣養住D蔥,一二日就換次水,咁D蔥可以KEEP住好耐,個根部要選擇粗粒D架,因為浸住水D蔥會繼續不斷自己從根部生新蔥出黎,但係就會越生越幼,等佢無得再生羅,都係大半個月啦。。。


你都試下啦~~