美味住家餸---雞腳節瓜玉竹湯、洋蔥爆燒鴨

依幾日天氣都係麻麻，日日係咁落大雨，搞到我都懶得出街買餸。

依日費事出街，叫老公收工返黎前買半邊燒鴨做餸，我再煲落啖湯，咁就一餐。

屋企有幾隻雞腳，係早一日買返黎要整沙薑雞腳架，不過買到返黎又無佐整既慾望。咁依日益晒我，唔使出街買材料，求其係屋企搵到乜就落乜材料落去煲啖湯水飲。

 

總有一條節瓜，其實屋企真係要擺定D可以擺得耐既果瓜，咁唔想出街都有得材料整出幾味餸啊嘛。。。依條節瓜買擺佐都怕有五六日羅，都無穿無爛，好野啊。。。

因為依排有少少熱氣，所以落多一扎玉竹落去。

玉竹好野黎架，佢有養陰潤躁，消煩止渴，降肝火等功效，

屋企有幾個梨，我都切佐一個大大個落去一起煲啖湯，令佢更甜D，除此之外，落多一碗仔花生眉豆落去，等啖湯濃D。

 

 

依款湯水好適合依個天時飲用架。有少少干咳，玉竹水既飲用對止干咳都好有效。。。。。

 

斬佐半邊燒鴨，特別交待老公同燒臘師傅話要鴨肚入邊既汁。

半邊鴨都勁多啊。。。一餐都係食佐一半咋。。。。

 

有啖湯飲，有個鴨批食，好滿足。。。。

 

-------------------------------------------

湯水都好多，留佐一煲仔第二日繼續飲用。

第二日落出黎一睇，湯水變到好似嗜喱咁結成一舊。

說明雞腳入邊既膠質全部融入湯度啦，咁女士飲豈不是好養顏？

好野啊。。。

我專登用瓦煲仔入湯水架，咁第二日直接上爐整返熱就得啦，少洗一次鑊。。。。少用一隻碗。。。。

D師奶係要計埋依D懶人招數架啦。。。。

 

燒鴨剩有好多件，切佐半邊洋蔥粒粒，用薑絲蒜粒，落豉油糖，用油爆返香佢。。。。

 

唔知點解，聞到隔夜燒鴨既味道，令我諗起細個時又係咁樣隔夜既燒鴨，阿爸又係用同一樣既方式加熱，多年后聞到相似既味道，又叫我回憶返細細個時，有父母呵護有加既幸福時代。

諗起好好笑，阿媽以前成日提我「百無一用是書生」，叫我第時搵老公都係實實際際既普通人好，因為阿爸係某個領域既專家，一世人凈係識得做研究，對於家事係一竅不通，屋企事無巨細，都由阿媽負責,不過入廚一事，反而係阿爸既強項，過時過節，反而都係由阿爸負責做大廚，同平日人前形象，反差甚大，如果唔係十幾年前因意外過身，相信依家我都可以同阿爸學到好多廚藝。

 

 

屋企有少少整餃子剩抵既免治豬肉，加埋薯菜，又炒埋一碟。。。。

 

份量都唔少既一餐，最后都係食唔完，不過已經係隔餐既食物，食唔完都要掉佐啦。。。。

 

 

依幾日天氣真係反覆無常.係房望出去,成日可以睇到好多靚景.

好似有一陣,遠處就烏雲密佈,反而係我依頭,陽光滿瀉.....

 

 

可以清楚睇到D雨雲飄移既速度同方向....就黎緊啦....

 

滿城之間,彷彿就係果一束陽光直射到某一處.....

鮮明對比之下,好奇突.....

 

 

韭菜餃、粟米餃

好似好耐無食過餃子，所以尋晚買佐一斤餃子皮返黎，自己整黎食。

詳細做法以前寫過，如有需要，可參考依個網址：包餃子

不過依次整餃子，我凈係較好個餡，教老公點包餃子，等佢玩下又好。

老公收工返黎之前係屋企擺好個架步先。。。

老公真係幾有天份，教佐佢一次，就完全熟手技工咁，尋晚既餃子大部份都係佢包架。。。。

大大隻餃子，包佐三十幾隻。。。

 

我就鐘意食韭菜餃，老公鐘意粟米餃，一次滿足兩個人的願望。。。

 

凈食餃子太單調，另外整多一個拍黃瓜擺係雪櫃雪定佢，夜晚食餃子既時候，配埋清爽冰涼既拍黃瓜同食，真係一流。。。

 

好滿足既一餐。。。

 

今早將方包剪成細細一塊再煎到香脆，煎多隻太陽蛋同煙肉。。。

 

擦D牛油，落D黑椒鹽，一啖一個，一個快手又好味既早餐就咁搞掂。。。。

 

美味住家菜---咖喱雜菜煲、黑椒洋蔥炒火腿

其實咖喱唔一定係全肉制架，素菜整出黎既咖喱一樣好好味

好似熱天，食欲不振之時，整返煲味道濃郁，口感清爽既咖喱雜菜煲，肯定能令胃口大開。。。

無肉既咖喱，由數种素菜組成。

（其實係因為屋企凈有幾一款半隻既菜係度，唯有諗計將佢地組合成菜，食得就唔好浪費嘛）

 

材料可以自由發揮組合，我就用佐屋企已有既一隻薯仔、一條細細條茄子、幾條豆角、半條甘筍、半邊洋蔥

係咁多。

作法同整咖喱乜乜係一樣步驟。

先落油炒香咖喱料，然后倒入菜菜炒勻，最後加水燜，起鍋之前落椰漿鹽糖調味。

 

因為全屬素菜，食起上黎口感較之肉類更為清淡，好適合夏季進食。

 

無出街，凈係一個餸好似好少咁，東拼西湊，用佐整早餐凈返既幾塊火腿，同半邊洋蔥炒。

金妹火腿既口感好實，愛黎炒又幾好啵。

 

先用豉油同糖炒香洋蔥，然后加火腿入去炒，落黑椒醬較味，落少少水焗幾下，裝得碟。。。。

 

洋蔥比火腿好味。。。。

 

惹味兩餸。。。

 

 

 

一餸一湯---甜酸排骨、節瓜粒粒湯

天氣又濕又熱，屋企冷氣一開就成日，到月尾張電費單，實俾到我好大驚喜。

天氣咁熱，如果身水身汗煮到餐飯出黎，都無晒胃口食啦。

所以依晚就求其滾煲湯水，煮埋一碟餸就算。。。

 

滾佐一個節瓜瘦肉湯。

加佐D甘筍，一粒雞精，少少魚肚，五蚊瘦肉切片。

 

 

係菜又係湯咁羅。。。。

都好清甜。。。。

 

街都費事出，係樓下求其買佐盒肋排。

先用油煎一煎封個表面，然后落生老抽砂糖，少少茄汁，加水燜。。。

 

 

裝碟之前落少少白醋，如果唔夠甜，再落少少砂糖，咁，一味酸甜排骨就搞掂啦。。。。

 

平日煮飯，就咁樣兩個爐頭，一個明火，一個電磁爐。。。

 

 

同時搞掂兩味餸。。。。。

開得飯啦。。。。

 

 

 

蔥之花

通常買一蚊雞既蔥，一次用唔晒，就會用個水樽養起佢，可以用一個星期度。咁有時唔出街，要用到蔥都即刻有得新鮮既用。

半個月之前發覺養緊既果樽蔥，意外地，有兩條既頭頂長佐一個細包包出黎，好特別，即刻影埋相。

當時唔知係乜野，有一條俾我摘佐，留返另一條觀察。

因為通常蔥既頂頭都係尖尖一條過咋嘛。。。。

 

依D生有包包既蔥特別實芯，摸落去係硬硬架，可能係要咁樣先至可以提供到足夠既營養俾個花苞。。。。

由發現生佐個包包頭既蔥之後又過佐一個星期。。。

開始有D野，破苞而出。。。。。

 

又過佐一個星期，即係今日，一起身就走去睇一睇，嘩，好靚啊。。。開佐花啦。。。。

真正既蔥花。。。。

 

蔥之花。。。。。

 

靚靚的蔥之花。。。。

終於俾我見到。。。。

 

 

 

美味住家菜---豆角嗜嗜煲、魚肚粉絲浸勝瓜

同強哥邊聽著懷舊經曲老歌，邊上網打遊戲睇網頁。

音箱裏傳來熟悉的經典歌曲“讓我一次，愛個夠”

 聽到熟悉的樂曲，五音不全如我與強哥者，不禁同步投入大吼行列。

初聽以為強哥係普通話不佳以致歌詞不準，再細聽之下，好似又有唔妥，於是問清楚：你復述一次你先頭唱的歌詞俾我聽下！

清了清喉嚨，強哥用標準的國語大吼一聲“跟我一起，咬一口”

 

一直只是憑著耳仔聽歌詞的強哥，咁多年來，一直將無數歌詞自我改編得面目全非而不自知。。。總奇怪的問我“首歌幾好玩，係未要咬咩啊？”

 

~~~~~~~~~~~~~~~~~~~~~~~~~~~~~~~~~~~~

前幾日的晚餐補錄。

本來上午已經買夠晚餐的菜式，但突然發現雪櫃裏還有一細舊烚熟的五花肉，睇到五花肉就自然聯想到“蝦醬豆角炒五花肉”。

饞念一生，是無論如何都揮之不去了。

 

冒著街外三十二度的高溫與高掛的太陽，都係換衫又再跑去附近的一個菜檔仔，買佐一把豆角回來。

 做法：

1，先將五花肉切薄片，可惜太少了，只切估佐薄薄的幾片，無事，反正這道菜的主角都唔係佢，然後將切成薄片的五花肉煎幹出油。。。

我係鐵鑊裏煎幹佐再倒入瓦煲，因為瓦煲要煎幹真的要好耐。

 

 

2，開火將瓦煲加熱，趁熱，將豆角倒入快速拌炒，並加進蝦膏調味。

喜歡食爽脆的就炒至斷生即可上檯，喜歡軟一些的可以炒好之後蓋上蓋燜陣間。

 

因為蝦醬已有足夠的鹹味，所以就沒有另外再加別的調料，喜歡味道鮮一些的話，可以在起鍋之前加一小勺的糖進去調味。

 

 

因為瓦鍋的煲暖性強，所以通常用煲仔直接炒煮的菜式，上檯之後還會發出“滋滋啫啫”的聲音，也因此，用瓦煲直接炒的菜式，就將之命名為“啫啫菜”

用佐豆角去炒，理所當然的就叫做“啫啫豆角煲”

可惜豆角買少佐，吃得未夠過癮，過幾日得閒，再煮過依味餸來繼續滿足。。。

 

依排勝瓜好平，買佐一條大大條，都係兩個半咋。

依日就買佐一條勝瓜就季。

整一味魚肚粉絲浸勝瓜。

材料：1，勝瓜滾刀切

2，魚肚浸軟之後切段

3，粉絲一束冷水浸軟煎段

4，家樂雞精一塊

5，姜數片

6，肉碎適量，用姜沫鹽與生粉少量糖醃好味道。

 

作法：

用油爆香姜片，倒入肉碎略炒至半熟，倒入絲瓜拌炒，然後加適量的水煮，放一粒雞精（或高湯，放高湯就不使落水），倒入魚肚一起略煮。

依個時候，可以睇到湯水變得濃白起來。。。。。

 略煮之後，起鍋前加入粉絲拌炒一陣間即可裝碟。

依味餸唔使打芡，因為係用上湯浸，咁就要有少少湯水。

----------------------------------

好喜欢睇廚房中煙霧繚繞的模樣，應了我心目中對“人間煙火”的完整想像，有一種踏實的平凡的安全感，非言語能解釋，只係一種滿滿的，充斥四肢百骸的，幸福與滿足感。。。。

 

 

一味極之鮮味既夏季好適合既餸菜 。

本來買佐兩舊節瓜要滾湯架，睇到咁大份餸，唔敢再煮羅，兩味餸足夠。。。

 

尋晚去飲，如果用尋晚既鮑參翅肚換我依兩味小菜，我真係會要依兩味小菜，而放棄有姿勢而無實際既鮑參翅肚。。。。。

 

 

我始終認為，一個人的幸福，不是因為他（她）擁有了什麼，而係因為佢「想」要，而得到佐，之後既滿足感。。。。。

 

食晏時間---蒸水蛋、榨菜蒸肉絲

 

好耐無整過榨菜蒸肉絲。

反正都係要蒸飯，索性就整埋依味蒸既小菜。

買佐梅頭肉，依個部位既肉質較腍，愛黎蒸會更好味。

豬肉切絲，然后用「蠔油、麻油、生粉、糖、老抽」醃入味。

搾菜我係買既台灣榨菜，無咁咸，所以切佐絲之后唔使浸水，直接可以同肉絲撈勻。

 

 

上汽之後蒸十五分鐘。

 

蒸餸幾時都係最簡單最方便最好味。。。

依味小菜，好惹味，好適合熱天無乜胃口時食。。。

 

都係要蒸野羅，索性蒸多碗仔水蛋。

我蒸水蛋，水同蛋的比例係1：1。

先將蛋打落碗，然后用蛋殼載水，咁就可以取到1：1既準確量

水通常我會用暖暖地既水黎開蛋，然后落一細細匙既生粉，少少鹽同胡椒粉，發散佢。

 

 

一隻蛋，通常蒸五六分鐘好啦，我蒸得過佐少少火，有DD老。。。

 

 

不過凈係個面同邊邊有少少老，中間位，好滑架。。。。

 

 

蒸野我先擺飯入去，蒸得十分鐘到，擺榨菜入去，凈返幾分鐘既時候，擺蛋入去。。。。

咁最后，三碟野一起蒸好。。。。

 

 

買佐11蚊豬肉，一半蒸佐榨菜，另一半今晚滾湯用。

依餐計計埋埋，都係十蚊雞有找姐。。。。

飯蒸多佐。。。。。

兩個人食。。。。。

食唔晒添。。。。。