小菲菲俠自煮樂

23 1月, 2013

足月

因為係剖腹嘅關係,過程簡單又愉快,情緒因而無乜太大波動,可能亦因為情緒一路保持開心狀態,身體嘅恢復情況也比想像中的快。

生完「大哥丞」後嘅第二日已經可以行得走得兼且面色紅潤,中氣實足,第五日醫院嘅姑娘話我知傷口恢復得好好,聽完後即刻衝涼洗頭,一個星期唔到已經可以落街食飯買嘢,全身充滿力量,全無傳聞中產婦應有的所有體弱氣虛之感,連懷孕之前會有的種種小問題,產後身體機能亦好似得到修復,身體狀態更勝從前。

人生第一亦係最後一次嘅座月經歷,簡單,愉快,輕鬆,全無遵循傳統做法,所有座月婆唔應該嘅都做齊哂,當然每個人嘅身體狀態各有不同,我自細就自詡為「打不低的鐵金剛」,因此對身體嘅狀態有把握之下,先可以置傳統而不顧,不建議其它JM在無把握無親人支持嘅情況下自己亂咁嚟,必竟華人社會,對於傳統說法,還是有所保留~~~


因為我係一個窮媽,睇住阿仔狂啜成個鐘都無乜貨仔餵得飽佢嘅肚仔,大而無用的雙乳最終只能淪為餐前小點或者安撫奶嘴嘅作用,而後經歷一系列巧合之下嘅不愉快事件,逼於長輩的壓力,滿月之後,轉為全奶粉的粉媽,實在心有所憾,卻無何奈何。

無論如何,小朋友嘅健康成長先係最緊要,如今嘅奶份配方亦相當接近人奶的成效,未必見得全奶粉嘅小朋友健康狀況就會差得去邊,屋企多佐一個人仔,生活節奏完全變化,為佐配合依種變化帶來情緒上嘅緊張狀態,我都唯有不斷自我催眠,放鬆啲,開心啲~~~

好彩身邊有一個極度負責同埋全功能型嘅好老公,一收工返嚟,就幫我手湊下BB,餵奶換片衝涼乜都搞得掂「強哥,你是最強滴!!!」

某程度上強哥亦都好好咁緩解佐我心理上嘅壓力,因為知道面對所有湊仔上嘅難題 ,我唔係一個人去面對,有一個人始終係我身邊一齊,果種幫助與安慰,真係無敵。

BB今日已經足有四十日,托賴,都叫健健康康,除佐肚餓或是空虛寂寞冷,基本上不吵不鬧,係易湊型嘅小朋友,當然,未知遲下如何。 

發幾張近照。

可能係因為面仔細細嘅緣故,對眼顯得特別大。

比起初初,面仔肥潤好多~~