豬頸肉炒辣椒

今界既香港政府擁有最短視既一班幕僚。

還富於民---食糖不甜，食鹽唔咸既一項措施。

所謂長貧難顧，幫助，唔係話俾一個包佢咁就算係對佢好，食完依個包之后，點樣咧？繼續等政府下一次泒包？餓都先餓死啦。

所謂「還富於民」之下最大得益係邊個？政府羅，個個贊佢好，得個幾粒糖仔，可以做D咩？真係咁大筆錢，不如慢慢研究下，如何提升整體社會質素，如何更有效幫助提升社會低層既生活質素，如何更好促進香港繼續發展，係要個社會整體提升佐，先至會有可能人人享受到最好既生活，唔係話俾個一二次錢，就真係能夠改善到大部份人既長久生活！

「派電費每戶1800元」不如用依D錢研究下如何改善本港發電限制，可以減低發電成本，繼而長久地可以俾香港市民以更低廉既價格享受電力。

有D效果唔係一二年可以睇得到既成效，個政府就唔打算去做，因為無人因此而拍手掌，短期達到人人有份既措施，就爭住黎實施，真係有咁短視與無能既政府，我唯有係個肚入邊細細聲講句---「妖！~」

我唔在乎依家自己有無享受到咩實惠，我只想我既下一代，下下一代，可以生活得更輕鬆，更幸福。。。

-----------------------------------------------------------------------------------

依幾日刨書仔，無心煮飯。

細細個開始，我張床就一定要近窗，因為如果真有外星人，我要第一眼可以同佢打招呼。

如果外星人會俾願望我，我希望係「可以穿越時空」

借佐本書黎睇，認真研究下。

如果無外星人既幫助，可以自製時光機器，都幾好喎~~

今日又整佐豬頸肉，本來係同翠肉瓜炒既，睇到雪櫃仲有幾隻青椒仔，就索性同青椒仔炒做一碟，香香辣辣，都幾開胃。。。

仲炒佐個韭菜，不過今日既韭菜應該叫「嬤嬤菜」，因為實在同「嬤嬤」一樣咁老，好難嚼~~

另外用濃湯寶加D白菜肉丸肥牛，滾佐一煲仔湯。。。

簡簡單單，二菜一湯。

最后

飯后一隻蕉

便便靜悄悄~

甜肉

如果你係廚房新手，如果你一直覺得廚藝不佳，如果你從來無一种主打送，咁，你就一定要試下我家傳既鹵水肉。

一种「驚艷感覺」的肉。

點解一定要學整依味肉？

1，材料簡單：豬肉+砂糖+生抽（少少老抽）+清水

2，操作簡單：豬肉清潔之后同上述材料一起落鍋，燜至收汁。

就係咁簡單幾個步驟，無需事前腌肉，無需好複雜既處理，只需要俾少少耐性，同埋最好用底下圖片所示果個部位既肉。

就係咁，洗干凈既豬肉擺落豉油水度，就由得佢啦。

無問我要落幾多糖同豉油，我都係憑感覺，但係糖既份量應該要比普通煮肉要落得多D，因為依种豬肉，主要特點係「咸中帶甜」

所需只係耐性，燜至收汁。。。。

平日可以一次整多D，擺落雪櫃，幾時想食就羅一件出黎蒸番熱佢（我唔鐘意用微波爐，所以通常都會蒸或者焗），建議成件整番熱佢再切片，因為咁樣可以保持肉質中間既濕潤軟滑。煮既時候可以留番多D汁，個汁羅黎撈飯，簡直可以用「不可思議既美味」黎形容。

依种肉，我屋企叫「甜肉」

因此，甜與香，係佢既特點。

平日可以整多D，羅黎送飯，或者面，再或者整包既餡，都絕對一流。

最享受既，莫過於連著皮，肥瘦相間既果一細舊仔部位~~食落既感覺，二個字：

「銷魂~」

 

家常便飯---梅菜蒸肉餅+臘味蘿蔔絲+豉椒炒蟹

天又凍啦，往年整日話，依家已經不知「冬」滋味，咁今年，就真係凍到飽啦，今日又繼續發出寒冷警告，好彩厚衫都未洗，拍拍塵，繼續著。。。

感覺到天氣有少少凍，根本唔想出街，睇到雪櫃仲有D食物，東拼西湊，整佐三個菜。

以前茹素，凈係會用香菇炒蘿蔔，依家唔係自己一個人食飯，為遷就身邊人既胃口，加佐D臘腸同臘肉一起炒，香好多~

雪櫃有少少免治豬肉，剁佐DD甜梅菜，蒸佐細細一碟仔梅菜肉餅，強哥既至愛，為節省能源，飯通常都會同餸一起蒸，順手落佐二個咸蛋蒸熟聽日早餐送粥食。

老爺響漁排網佐D蟹俾我，我用豆豉蒜蓉薑蔥炒佐碟蟹，而強哥係過敏性體質，唯有我自己享用啦~~

二公婆係燈下，家常便飯，又係一餐~~簡單~

創意---和風菠菜

初初學整食，的確係乜都夠膽嘗試，依個菠菜卷，就係果陣時剛剛叫做入廚有小小小小興趣，係出邊食過，番到黎之后，憑想像加創意自己整出黎既。

作法：1，將菠菜一斤，落水灼熟，跟住過一過冰水。

2，擦D麻醬，（事后證明全無需要，因為整既過程麻醬會全部流失晒）

將一斤既菠菜好似扭毛巾咁，扭成二條大蛇。

3，跟住底舖一塊壽司簾，上邊再舖一層保鮮膜，將扭好既菠菜放係上邊，卷實卷成一圈，就可以擺響雪櫃，幾時想食幾時切。

4，睇下，因為扭實佐菠菜，切既時候就唔會散開啦。

最后整佐一個酸味味既醬汁黎配合依個

「砂糖一匙+生抽一匙+橄欖油半匙+香油半匙+檸檬汁數滴 」

食之前加少少炒香佐既花生碎響個面度，會香口好多，夏季整依味涼菜，勁開胃~~

當時仲煲佐一煲青紅蘿蔔粟米湯做湯底，整佐D鹵水肉，食佐一大碗既烏冬。

呵。。。睇番自己以前整食，真係幾有心機。

榴槤雪糕

依個係舊年整既雪糕，最多榴槤果陣時賣佐個榴槤，點知太熟，索性就羅黎整佐雪糕。

其實係屋企自己整雪糕係非常非常簡單，簡單到不得了既一种甜食。

首先材料一：最好選好熟好熟果种黎整，一黎佢既香味比較濃郁，二黎比較蓉蓉爛爛，方便雪糕的制做。

材料二：就係忌廉啦。我通常會要甜忌廉黎整雪糕，可以唔使另外加糖。

作法：1，先將榴槤整到蓉晒。

2，將甜忌廉打發（如果係淡忌廉，就要係依個時候同時加砂糖落去打）

3，將榴槤蓉加入到打發佐既忌廉度繼續小心撈勻。

睇下，基本上撈勻佐就得啦。

4,跟住將佢倒入一個容器度，擺到冰格度雪一個鐘左右。

5，一個鐘之后將佢羅出黎，大力再撈一撈，再擺番雪櫃度，一個鐘之后再一次羅出黎，再重複一次撈一撈佢，之后就可以長擺響雪櫃度五個鐘以上，咁就幾時想食幾時食啦。。。

自己整雪糕，就係咁簡單，想食咩味既雪糕，就響打發佐既忌廉度加入咩材料，方法基本不變，自己整雪糕，個味香D，感覺新鮮D~~

好快夏天就黎啦，又要準備入定貨，狂食雪糕啦~~

 

最驚係影雪糕像，好難整到個形靚，整得靚得黎，如果唔影得快手D，又好快會融，一融，就會好影響影出黎既視覺效果，所以我后來整雪糕，都好少會影低，影得比較接受D既，都係果次整榴槤雪糕啦~~

炒飯一碗

真真正正第一次入廚，煮出二送一湯再加一白飯，都係一年半以前既事。

以前最叻都係煮公仔面，人煮我煮，個個都話我煮既公仔面特別香過人，因為一直住響屋企，家中廚房所有事務，都由媽咪掌權，我根本無從插手，不過絕對相信天份與遺傳依家野，阿媽係印尼華僑，自細就識得整好多好多點心同與別不同既菜式，黎我D屋企玩既小朋友都絕對係一飽口福之后先至捧住個肚番屋企，所以雖然我自細無乜機會入廚，但耳濡目染之下，對於食物既配搭同味道既掌握，都多少會有一個基礎既認識，對於我以后自己入廚，都會有好大幫助。

係婚后，因為面對生活的所有細節，知道必須做好為人妻既角色，生活絕對唔會係一世既風花雪月，因為無咁既條件，因此好快就適應同調整好自己既心態同行為。

學習入廚係首當其衝既第一事。

好清楚記得第一次煮既菜式「瑞士雞亦+蕃茄蛋+肉碎炒豆腐」。

基本上，入得到口之餘，仲得到了先生好熱烈既迴響，所有送菜都掃清晒，咁就俾佐我好大好大既信心，都好幸慶，電子產品的盛行，令到我有機會，將第一次及至以后的每一次嘗試都好好記錄佐落黎，睇到自己廚藝既不斷成熟，心上既成就感，真係無以言表~~

入廚一事，對我而言，真係享受大於一切所有感覺，不過因為入廚年齡尚淺，仲有好多好多食材我根本未曾接觸過，但係我都好相信，一個人只要有足夠既興趣同實踐，都絕對會有達到心中目標既機會。

其實我無乜好特別既目標，最希望既只不過係可以煮到二餐美味既食物，俾辛苦佐一日既先生收工番到黎，可以好開心好放心咁食餐飯，再遠D，未來有佐BB，可以令到個小朋友可以有足夠既信心同其它小朋友講「我阿媽整既食物係最好味咯」咁我就真係於願足矣~~

通常周末我都會外出食飯居多，（我仲有打算，以后有佐小朋友，都會每個星期帶佢出街食D正野，等佢知道，乜野係好味既食物，乜野先至謂之好野，我覺得依個世界乜都係假，唯有食落個肚既野，先至係最真實既）

今日中午簡簡單單整佐個炒飯，晚餐再食好D。（其實關於食好D既概念，真係唔係話「貴，先至係好野」，真正尊重食物本身既特質，最大程度發揮佐食材既特點，我都認為會係一個好野）

今日中午，一個炒飯，一杯咖啡~~（自細習慣佐炒飯炒面一定係要配咖啡先至叫完美）

尋晚就煲定一煲飯，雪佐一晚，今日羅出黎整既炒飯，所以乾爽得黎，粒粒分明，主要材料係「蛋+午餐肉+五香肉丁+自製XO醬」

所有材料先煎香煎熟，再炒飯，因為係用易潔煎pan 黎整，所以落好少好少油，以上所有材料既搭配未夠最完美，當所有材料都炒香之后，再倒入切碎既芫莤，依個時候，成煲飯真係香得無得頂~~

飯多佐D,最后二個人都係食唔晒~~

凈係食炒飯未夠開胃，我最鐘意配依种甜甜辣辣既魚仔罐頭，依家我同先生都頸食得辣，D送真係無辣不歡！

直接擺響煲仔度整番熱，唔使洗多一個碗~~

可能係因為一開始學整食就係用電磁爐，所以根本習慣佐用電整食，搬入新居之后，因為係跟樓送既廚房裝修，所以一開始我都嘗試用煤氣整食，火力既控制同埋熱度都令我無法耐受，阿強哥就好細心咁幫我訂佐一個假雲石既平台加係個煤氣爐頭之上，咁我就可以同時有煤氣，又有電磁爐用啦。。。開心~~

真係好推薦用電磁爐整食，用明火整食，存在一定既危險之餘，熱天響廚房工作，真係熱不可擋，用電整食，乾淨衛生好清潔之餘，因為有自動斷電功能，所以好安全，同埋真係無乜熱度，就算熱天整食，都好舒服。

睇個側面，我設計咯。。。

今日中午既一餐，一飯一送一咖啡~~

拉番所有窗簾，熄晒所有大燈，開番一個細細座地台燈仔，簡單既一餐，快樂一天既開始~~

今日新煮意-----秘制私房泰式豬頸肉

今日小妹整既燒豬頸肉，睇落係咪好靚咧~~~唔單止好睇，而且仲非常好味~~

作法唔難，只不過需時較長。

好多人一聽到整泰式野就開始頭痕，無它，因為所需材料實在太多，步驟太過繁複，為佐可以食到好味既泰式食品，又可以簡化步驟，我試佐好多次，得出依种方式最簡單，而個味又最好。

腌肉材料：豬頸肉+豉油+少少醋+黑砂糖（我試過用白糖，片糖，冰糖，最后發覺，用黑色砂糖整出黎既味道最香）。

將上邊的材料同豬肉撈勻，腌一晚。

因為係尋日腌落，仲有半邊蘋果，所以剁碎佐一起腌，好似個肉既口感更加爽~~

俺到今日，可以開始整啦。

做法非常簡單，只需要將腌好既豬頸肉入焗爐二百度火焗三十到四十分鐘，中間需要羅出黎擦二次老抽令佢上色。無它啦，就係咁簡單啦~~

切開出黎睇下。。。。極度香噴噴~~

係咪好似叉燒咧？我就覺得無論係從口感或者味道，都較之叉燒，更勝一籌~~

好啦，個肉整好，凈低就係整依味所謂「泰式燒豬頸肉」的精髓---醬汁啦~

醬汁材料：青檸檬一個+檸檬葉適量+砂糖+蒜蓉+小辣椒

將所有材料剁碎，檸檬榨汁，就OK啦~~~

食起上黎，檸檬汁獨有的酸味同檸檬葉獨一無二的清香，加埋蒜蓉異樣的辛辣，一啖爽口既豬頸肉一啖味道清香酸甜的醬汁，一流~~

今晚依個豬頸肉，整得好好味~~

除佐豬頸肉，仲整佐一個「沙茶粉絲白菜煲」，極度難食，就唔介紹啦，我同阿強哥根本食佐二啖就無人再郁佢啦，失敗~~

好彩~~通常我都會整三個送，所以一個唔掂，都還有另一個青菜頂上。

「翠玉瓜炒肉碎」

清甜~~

今晚就係咁~~~

 

元宵快樂~菠蘿雞亦煲

非常難過，現在，我們已經進入一個極力尋找幸福的年代，因為一切豐富與便利的物質，都輕易可得。小時候我們家每周只有周日會“加送”，買隻雞或鴨，多數時候食鴨的居多，因為鴨比雞更便宜，所以偶爾吃一回雞，最愛的是那最滑嫩的雞亦，而我只能分得一只，所以總是珍而重之的留到最後才舍得吃掉。果陣時覺得，雞亦係世上最好食既野。
現在，很少買整只的雞做來吃，因為家裏只得二個人，買回來吃不完，隔餐又不好吃，（強哥不吃隔夜的菜，就算只是一碟炒青菜，只要是新鮮的，也是好的，所以我們家的菜都是一餐清空，歷害吧），而市面上，冰凍的雞翅，雞腿，雞扒，雞骨架，整只雞拆散了整個部份成批的賣，方便是方便啦，適合我們這樣的小家庭，可以選擇性的購買，可是，總感覺，缺少了舊時吃雞的感覺。
很多時候，感覺比實際來得重要。
 
今天依舊是買的雞亦。
最百變的雞翅，有雞的感覺，卻省卻了剁雞，味道百變，價格廉宜，經濟實惠。
我們這個代，放棄了整雞。
 
一，菠蘿雞亦煲
材料：雞翅八只，菠蘿一小罐
作法：1，雞翅先用“醬油+糖+胡椒粉+玫瑰露酒”腌一個小時入味。
2，可用鍋煎香煎脆表面，我用焗爐整，比較沒油煙，效果一樣。

過程中我刷了二次老抽在面，令出來的效果更香更漂亮。
（悄悄偷吃了一口，正~~如果不是一早答應強哥用菠蘿燜，我直接就咁樣食吃，更香口好味。。。。）

3，烤好的雞翅取出斬成二半，作用是待等下燜的時候可以更入味。
我用的是罐頭菠蘿，貪方便，而且罐頭裏的汁拿來燜非常非常清甜，比清水的味道更香。（強哥是菠蘿狂人，超級酷愛菠蘿）

4，斬好雞翅之後，另取鍋，用油爆香切好的姜，倒入雞翅與菠蘿略炒，再倒入罐頭裏全部的菠蘿汁，視雞肉的量而定，我還另外加了一點點的清水，另外還加了點鹽進去一起燜，醬料就只是鹽一樣而已，因為前面雞翅本身已經有腌過別的材料，足夠味道啦。。。

 

跟住就可以載到個煲仔度，略略燜二燜就可以食啦~~

二，燜讓青椒
年後家中不可避免的留下好多好多的應節食品，其中水果就是一個，家中還有好多好多的橙子與蘋果，為了盡快解決水果，連菜裏都想到怎麽加入做菜。
今天做的讓青椒，我就加入剁碎的蘋果蓉，取其夠清甜，口感夠爽脆。
材料：豬肉糜適量，青椒適量，蘋果半個，青蔥適量。
作法：1，將蘋果剁碎，青蔥切段，加上胡椒粉，雞粉，糖，少量醬油與豬肉拌勻。
2，然後將青椒洗凈，中間挖空，將上個步驟的肉用筷子塞進青椒裏。

3，然後可以下鍋煎至青椒表面焦軟，我依然用的是焗爐，方便吶，省油，無煙。

4，另起鍋落蒜與姜沫，加入醬油與糖還有少量喼汁（喼汁味道偏酸，希望醬汁中帶點酸味解解膩），煮熟醬汁之後倒入烤好的青椒略燜即可上碟~~
又是下飯的菜`~
偶爾吃到一二個辣得我眼冒金星~~

今日買佐一個白菜芯，新界出品，我好鐘意食，依家賣到十四蚊一斤，真係好離譜，菜價真係越來黎越貴~~

因為菜好新鮮，所以我凈係用佐蒜蓉去爆香油，跟住炒熟菜，最后落D鹽即可~~

全家福~~元宵佳節，好似無乜特別~~

不過今日元宵咁大個借口，當然要買番D平日想食又唔多敢食既野，阿強哥收工之前就去佐「東X堂」買佐我至鐘意即呢款蛋糕，~

佢個蛋糕本身非常鬆軟，最好味係中間果層忌廉，加佐椰汁，食落有忌廉本身豐富的口感之餘，總有陣陣若隱若現的椰香味，最特別係佢總加佐D西米響忌廉入邊，，配合上邊個層厚厚的芒果，似乎，食緊甜品「楊枝甘露」~~

 

祝所有人，元宵快樂~~