小菲菲俠自煮樂

31 3月, 2010

住家小菜---蒜蓉元貝蒸南瓜

上個星期樓下間超市一包包元貝做特價,咁又買佐包返嚟試下。


尋晚用佐一半,最底擺南瓜,南瓜上邊擺粉絲,跟住係元貝,最面係李X記嘅蒜蓉,會香啲。



隔水蒸8分鐘



倒頭抽,撒蔥花,淋熟油,搞掂~~



西芹切條條,甘筍切條條,辣辣腸切片片,炒埋又一碟~~~


清清啲,兩味餸,一個晚餐`~



 


 


30 3月, 2010

突然地想食韭菜餃

味道其實係保存記憶嘅另一种方式.


就好似到依家,只要聞到咖啡溝酒嘅味道,一定會腍起我婆婆.


婆婆到最後幾年,已經唔多食得落飯,,咖啡、煙、酒、蘇打餅,係佢唯一嘅食物。


好多人都話,食煙飲酒於身體無益,但一生人,以煙酒度日嘅婆婆,卻以九十三嘅高壽過世,臨走之前,總錄抵臨終遺言,叫後輩切莫傷心,佢能夠以此高壽過世,且膝下兒孫滿常,已經無所遺憾,叫我啲一眾晚輩,係婆婆嘅靈堂之上,要笑住送佢最後一程。


回記起果時,永遠一瞓醒嘅婆婆,會先點起支煙,隨著袅袅輕煙,伸下懶腰,廚房永遠有一大壺衝好嘅黑咖啡,婆婆有一個鐵杯,一聽到婆婆起身嘅聲音,舅母就會倒一大杯咖啡入嚟,然後再溝少少酒入去,婆婆床頭櫃永遠有存貨係度嘅咸餅干,我哋小朋友鐘意浸牛奶嘅果款蘇打餅,婆婆就最鐘意浸入咖啡度,一啖帶住酒味嘅咖啡,二三片浸腍嘅餅乾,係婆婆嘅早餐同宵夜不變嘅節目。


每次一入到婆婆嘅房間,果種若隱若現嘅煙味,伴住淡淡嘅咖啡酒香,每個人一入到婆婆間房,就自不然地,降低聲量,奇異嘅味道,配以大人嘅氛圍,果種感覺,直到依家,留俾我嘅記憶,係一個好鮮活,味道嘅記憶。


想講嘅係,一種味道,係可以令你剎時回憶到某一個特定嘅心情或者事件,就好似尋日,已經買完餸返嚟,路經一間餃子舖嘅時候,聞到韭菜餃嘅味道,好突然地令我腍起,同阿媽一起包餃子嘅感覺,係好突然地,好想好想食韭菜餃。


於是轉個頭,再去附近嘅細街市買肉買韭菜買餃子皮。


點知果檔舖頭嘅餃子皮,唔點點講好,全部痴埋一起,而且好薄好薄,包一包又爛,咁嬲起上嚟,索性全部掉佐。


自己搓面整餃子皮。


用普通面粉,溝佐少少高筋面粉,落少少鹽,加水,和成一個麵團,醒十分鐘左右。


然後均分成兩大舊。


每舊係中間,用手指整個窿,然後雙手係咁係窿入邊滾下滾下,咁就整大個圈圈。



 


將圈圈扯斷,展開就成為一條圓柱形。



 


然後再用手「揪」出一粒粒嘅面粒,大細差唔多大。



 


再搓成一個圓片,最好係外邊薄,中間厚。


咁一個餃子皮,就整好了。



 


包包下,見餡好似唔夠,即刻去炒個蛋加埋落去,咁又變多佐。。。。



 


新鮮即整餃子好易捏口,唔需要好似外買嘅餃子皮咁濕濕水先包得實個口,我直接一邊搓皮一邊包,軟腍腍,手感好好,包得好舒服。。。。。



 


一邊聽住收音機一邊整餃子,唔知整佐幾耐,不過一啲都唔覺得辛苦,最開心係,包完之後發現,個餡同餃子皮,剛剛好全部用盡~~~



 


睇下,應該好易區分得出,邊啲係餃子皮,邊啲係自己搓面整嘅皮。。。。



 


另外,總有細半蘿蔔,切絲絲,包餃子預先留佐少少肉出嚟,咁就求其滾個味精湯嚟飲下。


半煲水,一粒雞精。


水滾後落蘿蔔絲,煮至蘿蔔透明後落豬肉,啖湯,都好甜㗎。。。。



 


而且加佐豬肉之後,啖湯變成濃白色添,即刻飲一啖,蘿蔔味好濃,好清甜啊。。。。。



 


熱勝勝嘅餃子,酸咪咪嘅醬汁,清甜甜嘅湯水,舒服`~~



 


 


27 3月, 2010

煎Pan版英式 Muffin之火腿蛋漢堡(食譜)

麥當當嘅火腿蛋漢堡?


嗯,都幾似喎~~~


食一啖,口感都完全一樣喎~~~~


 


不過,唔係麥當當極極極有可能添加佐大大大量防腐劑嘅產品,而係強嫂新鮮手工即整即食嘅包包嚟㗎~~~~



 


依款包包係我較多會選擇嘅一個,我好鐘意佢煙煙韌韌的口感,但係睇到新聞,懷疑佢哋嘅包包擺佐成年都無變化,極有可能係添加佐大量防腐劑之後,就完全唔想再去幫襯。


其實依款包包一直都識得整,只不過實在懶得搓包包,而且食得又唔多,所以多數都係出街食算數。不過依家有咁樣不利消息出嚟,想食,都係要落手落腳,自己整包包啦。。。。


做法,容我一一道來~~~


先講材料:(四個包包嘅份量)(不過我整佐三個,咁個包包會厚啲)


高筋面粉:125g 


低筋面粉:25g


乾酵母:2g


糖:2.5g     


鹽:1g


油:一細湯匙


水:100-110g


 



 


做法:


1,將所有材料混合好。


2,可以睇到下圖咁,個面團係好濕嘅,所以趁佢總好濕嘅時候,係咁順時針,大力搓來搓去,搓大約五分鐘,目的係令佢快速起筋。


3,然後用個膠刮,將面團搓成一個圓,跟住大大力扯住面團嘅一頭,將面團甩向面盤度,不停咁甩,大約要甩十五分鐘,直至面團可以搓出薄膜同唔太痴手可以成一團。



 


搓面合共用20分鐘。


手都酸~~~~


柔到咁樣略略可以出薄膜就可以了


我介紹係比較家庭式嘅簡易做法,好多功夫,可免就免,費事搞得太多嘢,腍起都唔想食啦。



 


4,因為天氣較涼,所以我就將揉好嘅面團,隔著少少暖水,發酵40分鐘,等佢變大變大變大大~~~



 


我又是心急啦。


發到咁大,就當佢OK。



 


5,然後,用少少早餐食果種麥皮,用個石舂,舂到粉碎。



 


6,將發酵完成嘅面團,分割成三舊。本嚟係可以分成四舊,不過我想老公早餐可以食飽啲,所以就寧可佢厚啲,分成三舊啦。


7,將分割好嘅面團,撲少少步驟5嘅麥皮粉係周身。


8,平底鑊亦都撲少少粉,開火熱一分鐘。跟住將步驟7嘅面團,擺上平底鑊,進行第二次發酵。(二十分鐘)


補充下,步驟8嘅時候,可以將個面團,用個鑊產,輕輕壓一壓扁佢。


咁就完成佐「面團嘅揉搓同發酵」



 


好啦,睇到平底鑊的面團變大佐啦,咁就當佢二次發酵完成。


可以煎了。


我煎嘅方法,合共都係需時20分鐘。


1,唔洗預熱,直接電磁爐開火,300度火,開住蓋,煎5分鐘


2,面團翻一次面,都係保持300度火,蓋埋個蓋,訂好時間,乾焗10分鐘


3,面團再翻一次面,都係蓋埋個蓋,300度火,焗五分鐘。


即係話,除佐第一次開火果五分鐘係唔洗蓋,其它15分鐘,都係要蓋埋個蓋去焗。



 


20分鐘,個包包,就焗好了。


唔洗焗爐,用平底鑊,又方便又快,清潔又容易~~~


買唔到高低筋粉,可以去超市買一盒盒黃黃啲包裝,二十幾蚊盒果隻「面包粉」,果個牌子嘅面包粉較得幾好,焗出嚟嘅面包效果都好好㗎。



 


所以我唔多鐘意整面包就係咁,辛苦過整中式包包好多好多,如果我食得面包多,買個面包機都好啊,但係我面包食得又少,買返嚟總要搵個位去擺,算罷啦,偶爾想食,都係「雙手解決」罷了。


言歸正傳,整好嘅包包,用個叉叉,係中間係咁叉下叉下一圈,就可以將面包分開啦。用叉叉開嘅面包,比較可以有不規則嘅鬆軟效果,食起上嚟口感會好好多。。。


當然,都可以用刀切嘅。。。。。



 


提早一日整好個包包,第二日早上,再將包包係平底鑊烘一下,然後煎一塊火腿,煎個蛋,擺一塊芝士,衝杯㗎啡麥皮,搞掂~~~



 


口感同味道比起麥當當果款,有過之,而無不及㗎~~~


最重要係,食得放心嘛~~~~


26 3月, 2010

誤打誤撞的美味---蒸豉油雞(食譜)

前一日食佐一半雞。另一半,強哥話,要食清淡啲。


要「蒸豉油雞」


其實係口誤,佢係想話「整豉油雞」


我笑強哥好創意,清淡豉油雞,蒸出嚟。


因為習慣中嘅豉油雞,都係相當於用豉油鹵水出嚟嘅作法,真係未聽過有蒸嘅豉油雞。


不過腍腍下,好突然地靈機一觸,腍到一種真係蒸嘅豉油雞。


儘管去試下啦。睇下想像同事實,是否同樣美味。


咁豉油雞,多數表皮色澤金黃,蒸係好難上色嘅。所以首先要解決上色嘅問題。


於是我決定,先用老抽,抹係雞身上,擺係近風口處,風乾一個鐘,等雞皮上色。


少不免,加埋幾塊薑,避一避腥味。


尋日天氣好涼爽,又大風,個雞雞好快就風乾上色啦。


 


所以做法第一步:上色。



 


上佐色嘅雞雞,就依原計劃,「清淡啲」,蒸。


第二步:隔水蒸二十分鐘



 


蒸好嘅雞雞,攤凍少少,再斬。


做好準備,只欠隻雞。


第三步:斬雞



 


當當當,雞斬好啦。。。。


睇下,蒸好嘅雞,雞皮金黃滑嫩,係咪好似豉油雞咧`~~



 


蒸雞會出好多水,倒入一個碗仔,留返第二日滾湯,就係最佳嘅濃縮雞汁啦,食得無嘥嘛~~~



 


因為隻雞只係表面抹佐一層豉油,除佐雞味,係無乜咸味嘅,所以,為佐讓味道更豐富,我決定,用蒸魚嘅方法,去俾依味「蒸豉油雞」增添味道。


 


做法第四步:煮熟一湯匙嘅油



 


第五步:斬好件嘅雞,淋上少少蒸魚豉油,舖上大量蔥段,將煮滾嘅熟油,淋上面,碌熟蔥段。


區區幾個步驟,搞掂~~~~


蔥嘅味道滲佐入底下嘅雞,同雞嘅鮮味,相得益彰,依味「蒸豉油雞」,我俾自己80分。


另外二十分,係因為用嘅係普通冰鮮雞,雞嘅口感食起上嚟,符合香港人對雞果種「好滑」嘅要求,但係對於食慣佐新鮮走地雞嘅我嚟講,多少,都係爭佐啲嘅。



 


之前一晚炒佐半斤菜,另外半斤,是夜,炒埋~~~



 


簡簡單單,清清爽爽,一菜一蒸雞~~~



 


 


25 3月, 2010

內地雲南旱情告急

雲南某個村內嘅孩童,要飲水的時候,係要跳入咁樣一個黃泥坑一般的坑內取水。


 



 


唔係湯水,而係佢哋真真實實要飲落肚嘅水。


這般的混沌,也不能計較。


在生命面前,感受已經係最次要。



 


如果旱情已這般嚴重,有關當局都唔採取人員分流或其它救災嘅實際方法,將災情嚴重嘅人,轉移去附近嘅省份暫做避難,莫非要等人真係渴死,先至事後反省?


據知發生災情,已持續有幾個月嘅時間啦。


聽到係災情咁嚴重嘅時候,雲南都依然會照搞「潑水節」。


早幾個月前同阿媽計劃係想四月份去雲南旅遊,但行程都要夭折,實在唔想支持當地政府,係咁樣嘅情況下,依然用珍貴的清水去做咁唔實際嘅做法。


 



 


香港人,慳啲用水吧。


住家小菜---客家黃酒煮雞

係網上睇到一個雞嘅食譜,剛好材料我屋企都有,咁就依版照做,都整佐一碟出嚟。


原來味道真係好好味好好味。



做法:


買佐一隻雞,一分為二,一半斬件,就愛嚟整果個「客家黃酒煮雞」



然後準備材料


「香菇、薑片、蒜頭、紅棗、客家黃酒一碗仔」


客家黃酒係一個客家朋友鄉下自家釀嚟食嘅,有一次我試過話好好飲之後,果個朋友就托親戚買佐好幾樽送嚟俾我慢慢飲(我得閒都會嗲下一杯仔酒,好滋味㗎),客家黃酒係糯米釀嘅,酒精濃度好低,甜甜哋,女仔飲好適合,天凍時飲落,周身都暖笠笠㗎。



 


題外話:有個朋友送佐包紅菇俾我,原本煮依個雞腍住試下紅菇嘅,聽聞好香好滋補,點知我浸嘅時候,發現個水全部變紅色,我好驚係咪染色上去嘅,最後都係唔敢食,掉佐。


有無人知道紅菇浸佐後個水咁紅,係咪正常㗎?



 


轉返正題,做法好簡單.


1,先用油,爆一爆香薑蒜同香菇同埋紅棗



 


2,然後倒入雞塊,慢火翻炒至肉變白色,倒半碗嘅黃酒入去,開細火焗一焗。



 


3,因為雞本身會出水,所以只要開細火,雞係唔會燒到乾㗎。


第一次落佐一半黃酒煮佐大約五分鐘,然後將最後嘅一半黃酒倒入,再落生抽老抽去俾個咸味(如果覺得太甜,可以加少少鹽去中和)。


加佐調味之後,就可以開中火,繼續燜大約十五分鐘左右,咁依味餸就煮好啦。



 


依味餸,係完全唔需要落水㗎,就係靠酒同雞肉本身嘅水份去煮熟個雞,因為無落過水,所以雞嘅鮮味都無衝淡過,唔洗擔心酒味太重,因為客家黃酒本身嘅酒精含量係好低好低,加上烹煮嘅過程,熱力一早將酒味全部揮發無佐,食嘅時候,凈係食到好香好香嘅味道,而且都唔會醉人嘅。



 


晚上俾電話阿媽,話我用黃酒煮雞,好香好好味,叫阿媽又試下咁整,阿媽即刻話俾我聽,依味餸唔好食得太多啊,因為好熱氣㗎,太滋補啦。。。。


哈哈哈,原來咁補㗎依味餸,咁,耐唔耐食下好啦。。。。


轉頭話俾強哥知「老公,阿媽話依味餸好熱氣喎」


老公「咁聽日食清淡啲好喎,剩下果半邊,清清哋,蒸個豉油雞好啦」


·¥!%#¥·¥#……#%¥


清淡=豉油雞?


總要係蒸嘅?


老公,好高難度姐~~~



 


炒多個白菜,強哥猛咁話「真係估唔到,加少少煙肉落去,個青菜會變得香咁多嘅」


當然啦,你老婆對味道,有天份㗎~~~



 


一只雞一餐食半邊,一斤菜一餐食半斤~~~


一半一半,加埋咪就係一個完整囉~~