女士大補湯---雪耳當歸煲雞湯、孜然焗雞亦

依輪金融風暴真係令到我損手爛腳，心痛不已。

雖不致無米落炊，但肯定的會收緊開支，彌補心理損失。。。。

儘量係屋企食飯，真係可以慳返好多。

尋晚煲既係雞湯。推薦大家係超市買剝晒皮同肉的雞殼，平日煲雞湯都需要先將雞皮剝佐咁煲湯先至唔會咁流，而依種雞殼又有雞骨的營養，又免去剝皮的步驟，最最緊要係，佢夠平啊。。。

一個雞殼煲一煲湯，成本都係十幾蚊咋~~

因為我都係煲一餐的份量，所以一個雞殼已經足夠，如果屋企人口眾多，可以選擇買二個雞殼又或者加D豬展或者豬骨落去，個味仲濃啊。。。

尋晚煲依個湯水點解叫女士大補湯咧？

因為我加入佐「當歸」依味女士聖品~

話說當年，我婆婆三十幾歲開始，聽一個中醫說話，每個星期用當歸整一次食物，或者係當歸滾肉片湯，或者當歸剁肉餅，甚至係當歸煲飯，當歸對女士們的子宮有特殊療效，對於子宮的保養有非常非常好的正面影響，一個女性的子宮保養得益，除佐可以增加身體抵抗力，對於人既氣色同埋樣貌有莫大幫助。。。。一句講晒，可以保持健康與有活力的身體機能。

事實證明，婆婆多年進食當歸的效果，真係不同凡響。

點解？佢可以係五十高齡之時，追多一個舅父出黎,你都未話唔勁啊。

而我娘親，都有多年進食當歸的習慣，佢就係四十歲果年生佐我架~~

而今年我都三十歲的人啦。是時候，要調養好自己身體啦。。。

我娘親七十歲人，白頭發都無幾條架~~

尋晚煲湯的材料，主要目標係雪耳（大量補充膠質）同當歸，其餘都係隨便有乜落乜。

我求其落佐「紅棗、枸杞、玉竹、沙參、淮山、桂圓、意米」

好多人煲雞湯都會落薑，不過我就無需落薑啦，因為紅棗同桂圓都係燥熱之物。

、

睇下，煲佐好濃的一碗湯水啊。。。

當歸味重，我都只不過係落佐三片咁多，成煲湯已經可以聞到好重藥膳味啦，可能係我自細聞慣依陣味，我就覺得當歸味好香~~

各位女士，得閒都煲下當歸湯來飲下啦~~

PS.不過凡藥三分毒，適可而止的進食先至最聰明

 

尋晚又係食焗爐食物,焗佐一碟雞亦~~

焗多一碟蛋,只不過強哥唔食得蟹,所以將蟹肉轉成餐肉粒~

一樣咁好味~~

菜點都要食D既~~

炒佐一碟生菜~~

三送一湯~~豐富好味又廉宜~~

 

南乳焗雞槌、孜然焗甜粟、素炒油麥菜

一种食材略略改變下形象，配料上沿續傳統，個效果可以變得更加好~~

買佐一盒雞槌，從個尾度剪開一個口，將皮往下推，令個雞槌睇落更似一個錘仔~~

而且因為煎開佐肉，可以更加入味，視覺上的改變，增加食物的趣味~

而醃料就用佐傳統的「南乳大半舊、黑糖一匙、玫瑰露、生粉、老抽適量上色」

提早一日開始醃，醃佐一日，個味完全入晒~~

晚上入焗爐，二百度火焗佐二十五分鐘~~

因為已經足夠味道，焗的時候完全乜都唔需再落~~

焗熟就得~~

睇下焗出黎既雞槌，似足一個個錘仔~

個味又香噴噴，焗到個皮好干身，食落脆卜卜~~

因為本黎同強哥係話要焗孜然雞翅，依家又轉佐焗南乳味，為免佢扭計，焗雞槌的時候，用錫紙包住幾舊粟米一起焗熟，食之前再開火焗農個表面，再洒D孜然粉，辣椒粉同幼鹽~~

滿足下個大細佬既口感啦~~

無論大人或者小朋友，都要適量食多D青菜同水果，所以再炒多一個油麥菜~~

樣樣食D，幾開心架~~

一人一蛋一碗飯---蟹肉焗滑蛋

今日中午搞搞新意思，焗佐一碟蛋~~

先睇下個效果，焗出黎既蛋，面微微D焦黃，雞蛋獨有煎香之后的香味，撲鼻可聞~~~

創意來自尋晚食凈的蟹肉。

食凈幾隻體形較細的蟹，本來拆佐肉係準備想炒飯既，幾隻蟹，拆得一碟仔仔的肉~~

個殼就真係一大堆啦~~

尋晚飯煲多佐，今日凈番一碗仔。

唔想食炒飯咁熱氣，索性蒸番熱佢啦~~

咁有飯無送，點算咧？而且食晏之啵，唔想食得太流，於是，用佐一個雞蛋同少少蟹肉，清清D焗佐一碟野~~

作法：1，一個雞蛋，加一匙豉油（我用佐蒸魚豉油），一細細匙鹽，一細細匙油，三分一碗水，撈勻。

2，蟹肉加少少蔥同胡椒粉撈勻

3，將步驟1的蛋液倒入步驟2當中力略撈一撈

 

4，焗爐開二百度火，焗十分鐘~~（因為我個碟好細同埋好薄，所以十分鐘已經足夠，如果碟大咁時間需要相應增加）

幾分鐘就搞掂~~

色澤金黃，蔥蛋香味撲鼻，因為係慢慢焗熟，蟹肉的味道足以滲入蛋度，互相配合得好香，而且唔會過火，人蟹肉依然都係好滑~~

 

睇下入邊，真係外焦內滑架~~~

愛黎撈飯，一級棒！！

 

 

 

 

雪耳木瓜核桃湯+醬燒豆腐+薑汁芥蘭

自細都好鐘意就咁生食核桃，唔知是否如此因素，自細我就擁有一頭濃密黑亮的頭發。

除佐生食，油炸核桃的味道，簡直可以稱之為極品。

香口酥脆的感覺，無論花生或者腰果都遠遠無法比及。

鐘意買原隻核桃黎食，享受慢慢剝開的過程，好多人以為，若果剝到呈黑色的核桃仁一定係劣品，通常棄之不用，其實真係走寶啦`~

如下圖左邊黑色果隻咁睇，雖然黑麻麻，干爭爭，但係細睇下，個肉係白色架，雖然個層黑色表皮會有略略「喼喼地」，但係入邊白色肉汁，絕對甜到流~~

一斤核桃入邊都未必會遇到一隻咁樣黑色果肉的，下次如果有機會，真係要試下，唔好走寶啊。。。。

尋晚煲既靚湯，其實核桃係主角。。。

材料「木瓜、雪耳、豬展、紅棗、核桃」

睇下，煲出黎D色水幾靚~~~

落少少鹽調味已足夠~~

因為核桃本身帶有油脂，所以煲出黎D湯睇落好油咁，但係因為係用佐木瓜做配料，飲起黎D湯水有濃郁的生果味，根本飲唔到油膩感覺~~

 

感覺近年食得太肥膩，對身體始終無益，所以以后會多設計一D低脂食物，為身體著想嘛~~

尋晚就整佐一個豆腐煲，買佐二件佈包豆腐。係街市買真係平，都係二蚊一舊咋~~

作法：1，先將豆腐切邊，落油鑊慢火煎香。

2，原鑊落油，落薑蔥爆香個鑊

3，跟住落煎好的豆腐，落少少水，落豉油，糖，同埋一大匙豆醬增加香味，燜到收汁之前，贊少少米酒，熄火之后再擺一D蔥段落去炒勻，轉過細細砂煲仔。

砂煲仔再開火焗二三分鐘~~

成煲野靚晒~~

雖然無肉，不過因為落佐豆醬，咁樣的一煲豆腐煲，絕對好送飯~

再炒多一個薑汁芥蘭~

芥蘭喜甜同酒味，薑味同佢最配，所以炒芥蘭，我通常會先將較硬的芥蘭頭切落黎，為佐入味，將佢切十字刀開花，炒的時候，落薑絲熱鑊，跟住先將芥蘭頭落鑊炒一炒，然后將芥蘭葉都落埋炒，炒到所有菜都轉成綠色之后，落一匙鹽，一匙湯，加少少水燜一燜，起鑊之前贊D米酒，熄火，焗多一分鐘~~

上碟~~~

清爽脆口~~~

係脆架~~芥蘭小朋友多數唔鐘意，大個之后會慢慢變得接受~~

咁晚無乜肉啊~~

 

青紅蘿蔔湯+叉燒炒河

尋晚炒河粉食。

炒粉面有一個好處，配料始終不過係配料，屋企有乜就落乜。

買佐一舊叉燒做肉。

再切埋D甘筍絲同洋蔥絲。

買佐薄D既河粉，貪佢容易入味D。

先較定一個醬汁「生抽，老抽，黑糖，胡椒粉」

將醬汁撈入河粉到搞勻，最后再滴適量香油令粉更油水更香D

因為河粉已經撈勻醬汁，炒的時候，先炒香配料，再將粉倒入兜香兜干即可~

另外煲做一個青紅蘿蔔湯。

依個天時飲就最適合啦~~

為佐令湯水融D，落水剛剛浸過D材料就得啦。。。

高速煲一個鐘~~

靚湯出爐~~

一碗湯，一碟炒河~~

搞掂~~

剩餘面包大改造---煎面包餅

一般的街坊餅鋪會有半磅裝的方包出售，一包大約四件左右，滿足小家庭一餐的需要，但是在很多地方都不會有如此貼心的包裝，好似超市所售的方包，多以六到十件包裝，小家庭或是單身人士則未必能夠在一二天之內食完，隔佐一夜的方包，無論口感或味道都絕對的差強人意，這時真是棄之可惜，食之無奈~~~

另外，吃凈的面包無論如何，唔好擺入雪櫃裏，因為雪櫃會吸收面包裏的水份，擺響雪櫃一晚的面包，會變得又幹又硬，加大難吃的力度，所以面包的存放，應該處於室溫當中，會更恰當。

強嫂屋企也不例外，經常都會有隔佐二天的面包尚未食完的結果都係棄之不用，雖然浪費，卻實在是無可奈何之舉。

日前在某檔美食節目上學得一招處理面包頭的方法，將之同樣套用於隔佐夜的面包身上，今早試佐效果。。。

成績報告如下~~

1，隔了二夜的面包，即硬且幹，將之撕碎置於容器內~~~

2，加水或者鮮奶將佢化開

3，加蛋、砂糖、面粉、少少油撈勻

4，較到少少「傑傑地」咁既程度

睇下，早餐三寶。。。

面漿+麥皮+咖啡

5，熱鑊落油，倒入面漿慢火煎香

微微焦黃即可~

趁熱擦少少牛油落去~~

原來咁整出黎的餅仔，真係掂咯啵~~

因為加佐面粉，令到個餅仔會有D煙煙韌韌的口感，加佐雞蛋煎香之后都依然可以食到雞蛋的香味，同埋面包本身香香的酵母同奶味，綜合一齊，可以好好味架~~~

以后D面包唔會再浪費啦。。。。

早餐煎面餅+簡易披薩仔

依家物價高企，金融前景又見堪虞，早上係街度食個早餐，閒閒都要二三十蚊一份，依家咁既時勢，慳得一蚊是一蚊嘛。。。所以依家變多佐係屋企整早餐俾相公，等佢舒舒服服食佐餐戰糧，先至開開心心去開始一日的江湖博殺。

依個煎餅仔自細阿媽就係咁整俾我食，依家照搬過黎整俾相公食~~

材料：雞蛋、面粉、椰子粉、黑糖、牛奶、發粉（泡打粉或者酵母粉都可以）

我通常用酵母粉等佢慢慢發酵，提早一晚整定個粉漿，第二日直接從雪櫃羅出黎就煎得。。。

如果趕時間的話，用泡打粉都可以，只不過係我唔多鐘意泡打粉的味道。。。。。。

 

作法：將所有材料撈勻，奶或者清水都可以，唔可以太稀就得啦

發酵完成之后直接入煎PAN度煎熟即可~~

似唔似叮當至鐘意既豆沙餅啊。。。

呵。。。其實個味都好接近架，如果整細舊D，中間再夾一舊豆沙，就完全係出邊賣緊果D所謂「銅鑼燒」啦~~

不過為佐口感上更香口一D，通常我都會擦D花生醬同練奶。。。

 

好好味的一個煎餅仔就完成啦~~

 

-----------------------------------------------------------------------

另一個我經常整黎食的早餐。

買厚切D既方包黎整就最好啦。

可以提早一晚整定D配料，鐘意食乜就準備乜。

我通常就鐘意用「洋蔥、青椒粒、腸仔切片、披薩用芝士」

切好D配料擺係雪櫃，第二朝起身直接羅出黎就用得。

 

舖法好簡單。

1，擦醬汁係底，我鐘意奇妙醬做醬底，或者蕃茄醬都得

2，先舖一層腸仔，再舖一層芝士片

3，跟住再舖一層洋蔥同青椒，繼續又舖多一層腸仔片同芝士

4，入焗爐之前面度再洒一層芝士粉（香D），焗到個面包邊都變脆口，D芝士同腸仔都熟佐，就OK啦~~

（我舖披薩料的步驟係一個整披薩的朋友教咯，先醬汁，后舖片狀肉類同芝士，再放粒狀配料，再擺片狀肉同芝士，再落粒狀配料，最后面再舖多一層芝士，咁樣食起上黎，口感會好D）

入焗爐的時間，衝杯咖啡同麥皮，咁披薩仔焗好羅，D咖啡同麥皮，都剛剛好飲得~~

一份好味又廉宜的早餐，就係咁簡單`~