小菲菲俠自煮樂

20 3月, 2013

芥菜排骨煲+皮光肉滑蒸水蛋

話咁快丞哥已踏入三個月人仔階段,算係好易湊嘅一個小朋友,個半月嘅時候已形成習慣,夜晚十一點飲完最後餐奶,一覺瞓到早上七點自動波起身,飲完又再瞓多兩個鐘,四個鐘餵次奶,好簡單。生活極之有規律,二個月之後好少喊,通常扭計都係因為眼瞓,訓練到佢習慣佐床同廳嘅分別,依家佢一扭計要瞓覺,擺佢上床,拍幾下佢嘅搏頭,就即瞓著。除此之外,醒嘅時間,總是微微嘴笑笑口,一日對住佢,不自覺地,都開心埋一份。

因為丞哥嘅規律性,我嘅日常生活極好安排,早上餵完丞哥換完片,就開始準備強哥嘅早餐。

依日早餐整佐煎肉餅。

強哥至愛。





晚餐整個潮洲人嘅家常菜---芥菜排骨煲

用佐一斤大芥菜,一磅排骨,少少乾蔥頭、蒜頭、薑一細舊拍碎。

排骨先用「生抽老抽、糖、白酒」醃一個鐘入味。





煮就好快,排骨先用少少油,煎至表面金黃,中大火啲都唔怕,因為遲下總要燜,唔洗驚唔會熟。


將蔥頭蒜頭薑,倒入去炒出香味。



然後倒入芥菜,加雞汁較味。

雞汁已有咸味,所以我無額外再俾鹽。

兜勻味道。


轉入煲仔度,開中細火,煮多15分鐘。



搞掂~~~

最好味唔係排骨,而係縮哂汁無哂苦味嘅大芥菜~~~



蒸多碟水蛋。

早餐嘅煎餅仔有凈攪好味嘅免治豬肉,加埋入水蛋一齊蒸,好味好多。

皮光肉滑話咁易。

蛋同水按1:1.5嘅比例較好蛋液,撈入肉碎,落少少鹽,水滾後擺入鑊,開中細火蒸12分鐘,搞掂。


撈飯一流㗎~~~