小菲菲俠自煮樂

31 5月, 2010

晏晝

依輪強哥唔係太忙,晏晝都會返嚟食飯,我自己都要食嘅,所以咪就順手炒埋啲小菜,煮埋個飯,食得舒服啲,晏晝煮佐,夜晚就可以接埋老公收工,再行下街,食飽飯先至返歸.難得佢依排無咁忙,當然要拍下拖......


依日嘅晏晝煮佐一個叉燒韭黃炒蛋.



青椒甘筍叉燒絲雜炒,燒肉汁俾味.



加埋一個爽脆脆嘅青瓜.......


食少啲飯,食多啲菜...



另一日晏晝,整佐一個讓豆腐.



好好味架....



炒埋一個椰菜.



咁又一餐....



飯後西瓜.


熱天多食啲西瓜好好㗎,補充水份自不在話下,西瓜有極好嘅消暑降火作用,所以耐唔耐,都會買返個嚟食下。。。。。。



 


 


28 5月, 2010

屋企BBQ

上個星期有幾日真係幾涼爽下,所以同強哥又心思思係屋企BBQ。


個爐真係買得有價值,本以為依類小玩意,買返嚟最多玩一二次就會擺係度唔玩啦,點知原來我一路低估佐強哥對燒嘢食嘅興致,周不時一遇上天公作美,有得籍口嘅時候,強哥都會同我提出燒嘢食嘅請求。


其實燒嘢真係幾簡單嘅一件事。除佐豬肉串同雞亦我會稍作醃制之外,基本上其它食材都唔多洗去理,食之前洗一洗切一切就搞掂,所以燒嘢,係隨時可以開始嘅一件事。



以前強哥同大多數香港人一樣,燒嘢,就係肉加蜜糖。。。。


係就係外脆裡嫩,但一味嘅甜,真係。。。。。。


我唔係好接受咁嘅味道。


所以我一路都係按自己屋企嘅習慣去醃燒嘢,不過依一日,雞亦只係簡單地用豉油糖酒去略略醃過味之後,燒嘅時候,都用佐少少蜜糖,好耐無整過蜜糖雞亦,就整俾強哥回味下啦。


用佐靚嘅荔枝蜜,加少少老抽,較佐一個汁出嚟。


燒佐幾隻蜜糖雞亦,強哥自己享用。。。我唔係太鍾意食雪藏雞亦。



果晚燒嘢,一共燒佐十串豬肉,六隻雞亦,一塊牛扒,二條粟米,一條大茄,二條脆肉瓜,一盒羊架,邊燒邊食,食佐成二個鍾。。。。



聽住歌仔,幾罐啤酒,邊燒邊食邊講下是非,兩公婆係屋企嘅平價享受,婚姻生活,平凡中,自有一種快樂。



燒粟米,乜都唔洗落 ,燒好之前,擦少少蜜糖醬,落 七味粉,好味。。。。



燒羊架,就咁燒,逼到啲油走哂出嚟,羊膏滴落發熱管,聽到滋滋嘅聲響,聞到特有嘅膻味,灑上一把孜然,一小撮的細鹽,最後再來上一點點的辣椒粉,幸福到,講不出聲。。。。。



超好味,燒羊架。。。。



最後,再嚟多一件燒茄子。。。。


就將茄子擺係一邊由得佢自己發燒發熱,食到咁上下,將佢對半切開,擦少少燒汁,俾李X記蒜茸,再加少少七味粉,正到不得了。。。。。。



 


燒完成身汗,兩公婆夾手夾腳清理乾凈現場,齊齊舒舒服服去沖返個香香涼,然後,繼續其它更精彩嘅節目。。。。。。。


 


 


27 5月, 2010

韭菜豬肉煎餃+香菇豬肉水餃

由橫堅撇捺點,構成了字,由字組成了詞,由詞結合成為句,由句整合成為一本書。


前段時間看過一本散文結集,編輯在序上,用了大量的贊美之詞去介紹作者用詞之精美詞彙之豐富,說得此書似乎驚心動魄,奶是驚天地,泣鬼神之作。


當然馬上取閱。


才翻閱得二三個章節,便已決定放棄。


不錯文中確實大量出現平日少見的詞彙組合,但這絕對無法構成吸引我繼續追閱的原因,實在是,作者儘管使用了大量華麗的詞藻,可惜,都無法掩飾它內容的空洞。


一本好書,適當的形容詞可以予人無限的想像,但是過度的使用,只會是過猶不及。


一本好看的書,不由字的複雜程度決定,只要內容足夠精彩與豐富,好書,自然會帶動閱讀者一路追隨。


~~~~~~~~~~~~~~~~~~~~~~~~~~~~~~


這一天,突然地想吃餃子。


馬上跑去買材料。已經買齊了韭菜與肉,最後去買餃子皮的時候,才發現餃子皮已售馨,幸好還有雲吞皮出售,即刻買了一斤回來。


睇下,用雲吞皮包制的餃子,與餃子皮做出來的餃子,其實並無太大差異。



 


雲吞皮與餃子的材料與制法是無異的,區別只在於一個制成了圓形,一個壓成了方形而已。


餡料方面,準備了一碗免治豬肉,用糖酒醬油生粉先攪拌起膠,另準備一碗韭菜剁碎,另一碗香菇椰菜甘筍。


分別與醃好味的免治豬肉撈好,韭菜裡加點五香粉,香菇餡裡加入胡椒粉。


即成為餃子的餡料。



食物其實與書籍的道理是大同小異的。


好吃的食物,其實不在於外形的精緻程度,食材本身的搭配與味道的調配,才是吸引饕客的唯一理由。當然,在味道之余,適當地調整外觀的造型,當然地有錦上添花之妙。


所以,盡量地,將雲吞,包得更加形似一個餃子。


而口味方面,做了兩種處理。


一種是煎的。


從來沒有煎過餃子,只是分析過生煎包的制法,想著煎餃與煎包的作法,邏輯上來說,應該是大同小異的。


所以,首先:


1.熱鍋置油,將餃子底部先煎脆,變焦上色。



就是煎成這樣,底脆脆的,不過還完全沒有熟,只是皮脆而已。



2,然後落 少少水,熄細一點火蓋上蓋子,這步是要令內裡變熟



3,最後,開蓋,再大火收乾水,并且將餃子最後煎脆。。。。



幾個步驟,就完成一個外脆內嫩的煎餃了。


香香脆脆,好好味。。。。。



其餘的,水煮至熟。



無論外形像是雲吞也好,餃子也罷,一於用上吃餃子的方式與材料。


準備了蒜香糖醋沾汁與花生碎(作法以前寫過,不復述)。


其實表象是怎樣的又有什麼重要,本質上,它的味道口感已經滿足了心理需要,就已經很足夠。


這樣一餐,滿意。。。。。。



 


 


 


24 5月, 2010

食河粉

上個星期某一日食河粉。又係好簡單好易整嘅一餐。


買條青瓜,買返嚟擺入雪櫃等佢冰啲爽啲,食之前切片,再開返個沙嗲醬,就咁簡單。。。。



買佐一條叉燒,成條買,返嚟自己係鑊度煎一煎返熱再切片,好味。。。。



煮兩大碗河粉,一人一大大碗~~~



兩個人,簡單又清爽的一餐。。。。



 


 


22 5月, 2010

我囡囡無佐特異功能

“我囡囡無佐特異功能”


依句說話,係十幾年之後撞到一個世伯,佢同我講返,當年父親不無遺憾地同佢講起依件事。


依位世伯做佐阿爸秘書好多年,屋企嘅事,私底下阿爸都會同啲同事分享下,好彩係咁,先至可以在多年之後,得曉一些從來不知道嘅父親對我嘅感情。


要到依家先知道,當年自己嘅一個“惡做劇”嘅胡言亂語,原來阿爸係接受並相信佐。


~~~~~~~~~~~~~~~~~~~~~~~~~~~~~~~


當年住嘅係五層高無電梯嘅樓,一家人住係三樓。


好多人習慣一入到梯間就開始係袋度將成抽鎖匙拎出嚟擺係手度,唔同嘅一抽鎖匙都會有好大分別嘅金 屬碰撞聲音,我承認自己有異於常人的聽力,我座係屋企,任何一個人只要將抽鎖匙一拎出嚟,就算未開始行上樓梯,就算離得較遠嘅地方,只要我記得嘅聲音,就算係好輕微嘅細細聲,我都可以清楚地聽得到并且記得係邊個鄰居嘅鎖匙聲,然後我會好八卦咁即刻話俾阿爸聽“阿爸,XXX返緊嚟”


然後過得幾分鍾之後,鄰居就會響起開門嘅聲音,最常做嘅,係阿爸或者阿媽剛剛到樓下未行上樓,我 就先開定門,等佢哋一返到嚟,我就跑過去開門迎接。


我會同阿爸阿媽講,話我有“特異功能”我話我可以感應得到邊個返佐嚟,(小朋友都會希望得到大人嘅認同心理,在我身上表現得猶其明顯)


初時阿爸同阿媽都以為係撞彩,為佐證實自己唔係講大話,任何時候只要有人返嚟,我都會同阿爸阿媽講一聲,依個行為,持續佐好耐好耐,後嚟玩得多佐,開始覺得厭,漸漸地,再唔會主動幫阿爸阿媽開門,所謂地“特異功能”嘅事,亦都不了了之。。。。。


~~~~~~~~~~~~~~~~~~~~~~~~~~~~~~~~~~


一直無同父母解釋返,自己當年只不過係因為聽力較佳先至可以清楚知道邊個返緊嚟,而唔係我所謂嘅“特異功能”,我認為以大人嘅判斷能力,應該可以知道我係講緊大話,直到最近,先知道當年自己嘅惡做劇,原來父親雖然從來唔多問我啲乜,但係私底下,原來父親真係相信佐,我係有依方面嘅“特異功能”~~~~


~~~~~~~~~~~~~~~~~~~~~~~~~~~~~~~~~~


父親做科學研究幾十年,佢相信事實係需要得到準確的數據支持先可以成立,(即係好死板的一個人)所以一直以為,權威同莊嚴的父親係無可能會接受我咁兒嬉嘅“童言戲語”。


多年之後再提返依件事,突然地令我對父親嘅印象,多佐一份“童真”的感覺,依種感覺,好微妙~~


假若父親依然在世,我諗,我都繼續會保留依個小秘密,就讓父親,依然認為


“我囡囡,無佐特異功能啊”~~~~


 


21 5月, 2010

夏季需要開胃餸--菠蘿排骨

基本上隔日就會同阿媽講次電話,偶爾一次係電話中同阿媽呻過話想食粽,又懶得自己包,點知過得兩日,阿媽即刻拎住十幾隻粽嚟我度~~~


知道我鍾意食新鮮整出嚟嘅粽,所以提早一晚預備好材料,第二日一早起身即刻包好煮好,晏晝之前就送到過嚟俾我,送到過嚟,一摸上手,總係和暖架,依種有阿媽錫嘅感覺,真係好幸福好幸福。。。。。


近年阿媽身子弱佐好多,不過都成七十歲人啦,身體機能退化係預料中嘅事,我都唔想阿媽咁辛苦,但係老人家,如果你乜都唔俾佢做,反而會令到佢覺得自己係咪真係無哂用,心理上嘅老態,比起容顏上嘅蒼老,更加容易加速身體機能嘅退化速度。


阿媽個樣好後生,試過有幾次座東鐵時俾東鐵職員叫停查證件,以為佢未夠年紀又用佐長者優惠八達通添,一睇證件,都唔信阿媽原來真係七十歲嘅人,次次阿媽都好開心咁同我講返,可見女人無論去到幾多歲,對個樣,都係會介意~~~


我覺得心境對於容貌真係有好大影響,阿媽直到依家都好注重護膚品同好鍾意扮靚,買衫總多過我添。。。。。


所以早排我同阿媽講,叫佢做多啲運動,如果佢身體好返好多,身體情況允許下,我會陪佢返印尼探下幾個姨媽同阿姨(阿媽一共有12個兄弟姐妹,勁)。


有佐依個目標之後,近排阿媽開始肯食醫師俾嘅調理身子嘅藥物,同積極佐做下運動,積極嘅心情絕對會對身體機能有正面嘅影響,希望阿媽身體會越來越好,我成日同阿媽話,七十歲未算老,只要身體允許,我都會陪阿媽周圍去行下睇下。。。。


~~~~~~~~~~~~~~~~~~~~~~~~~~~~~~~~~~~~~


因為唔知阿媽會突然嚟,所以買有晚餐嘅餸,咁阿媽嚟到,我晚餐會同阿媽出街食,咁晏晝,就將晚餐要煮嘅餸煮埋佢,反正強哥都要返嚟食飯,三個人,煮兩味餸,好簡單姐~~~


我買有菠蘿同排骨,咁就煮一味菠蘿燜排骨啦,又快又開胃。。。。


做法好簡單


1,先爆香幾片姜。



 


2,將排骨倒入鑊,翻炒至表面變色少少熟。



 


3,落酒糖豉油胡椒粉水,燜煮十五分鍾左右。



 


4,留返有少少汁係度嘅時候,將新鮮菠蘿倒入去,再炒多一二分鍾左右,等肉汁都有菠蘿嘅香味,然後埋個芡,開大火等佢收汁,搞掂裝碟~~~



 


阿媽話,比佢整得總好味添啊。。。。


超開心。。。。。


我買佐成兩個菠蘿,切好一舊舊分幾個細袋裝好擺入雪櫃雪住佢,咁幾時想食嘅時候,就解凍一包仔,愛嚟炒肉片或者牛肉或者鴨或者同魚燜,都一流。。。。



 


另外,用XO醬炒佐一個豆苗。。。。


阿媽話“乖啦,要記得經常食深綠色嘅菜啊。。。。。”



加埋一碟仔酸菜,強哥一返到嚟,嘩一聲“好豐富啊”~~~~



 


 


20 5月, 2010

超失敗一餐飯

上個星期去沙田俾啲嘢舅母,撞正跑馬,舅父例必係馬會駐場,想同佢兩個飲茶都唔齊人。


舅父同舅母加埋都超過160歲啦,兩個老人家,結婚都超過60年啦,總成日會嗌交,我一去到,舅母又係度同我呻,我唯有做一個好好嘅耳朵,聽下就算啦。。。。


其實聽阿媽講返,後生時,舅母同舅父感情都好好架,因為自出生起,兩家人就係隔離鄰居,係青梅竹馬兩小無猜的最真實版本,舅母同舅父可以話一生人都係日日對住,接近80年咁滯,係早幾年,舅母中佐一次風好返之後,就成日記起後生時同舅父相處嘅唔愉快嘅嘢,就成日抄出嚟鬧返舅父,唔知係咪上天,將舅母所有快樂嘅記憶都收返佐去咧?如果係,個天就太搞嘢啦。。。。。


返嚟果陣,舅母又俾佐包佢自己剛剛浸好嘅咸酸菜我,真係好開心。阿媽近幾年都無自己整過酸菜啦,出邊買果啲都唔同味,都係自己屋企人整出嚟嘅味道純正啲,食返嘅味道,都係同一樣樣嘅。


酸菜可以用好多種芥菜去整,香港都係依類大大把嘅芥菜,所以整出嚟嘅酸菜,都係大大一份。。。。。


自己屋企整酸菜,絕對唔會亂咁加其它化學哩,所以色澤同味道,都係好地道。。。



我最鍾意食隔餐嘅酸菜,所以先炒好,擺住 係雪櫃,煮面時落啲落去,會好味好多。。。。



 


係豬肉檔買豬紅,可能太足料,個豬紅腥味十足,嘩,真係超腥啊,腥到我落佐勁多胡椒粉同沙茶醬都蓋唔住,食到我,真係反哂胃口。。。。


食佐兩啖食唔落,放棄。。。。



切佐條辣腸,同年糕一起炒埋一碟。。。


辣到咧。。。。眼水都標埋,都唔知點解。。。。


食兩啖,放棄。。。。。。


搞乜鬼啊,兩味餸都唔食得嘅。。。。。



 


最後,唯有出街食過。。。。


搞笑。。。。


 


 


 


 


19 5月, 2010

新手不可錯過的一個排骨食譜

因為口味係好個人嘅一件事.


所以無一味餸係可以取得全世界人嘅認同,了解到依個事實之後,我發覺到要享受烹調嘅樂趣,更多時候需要自己嘅一份信心同隨意,相較之下,與其去顧慮它人嘅想法,倒不如,堅持同完善自己嘅能力,去影響它人嘅諗法直至認可自己嘅做法,要嚟得更輕鬆一些.


煮餸同做人或者處事,其實係一理曉,百理通嘅.


~~~~~~~~~~~~~~~~~~~~~~~~~~~


我嘅短處係無耐性同無記性,亦都從來唔打算去糾正或者改變,為此我好需要為自己揾到一個合理嘅理由去解釋自己嘅放任並籍此得到釋懷,因此,我得出以上嘅結論,希望可以用"隨意"為所有行為做出最合理的解釋.


~~~~~~~~~~~~~~~~~~~~~~~~~~~


所以好隨意嘅我,係好驚需有要精準量化嘅食譜,單位需有要精確到毫嘅地步嘅時候,我多數時候會選擇投降.


所以多數時候我係無辦法俾出一個精準數字嘅食譜,


如果整慣食嘅人,基本上睇一個食譜 ,只需要睇下材料就基本上心中有數,但係對於初初入廚嘅人嚟講,份量嘅多寡,又真係好有需要俾返個參考嘅.


為佐照顧真係廚房新手嘅朋友,無意揾到一個好簡易,好精準數字嘅食譜,試整佐一次,覺得味道真係幾好,所以擺上嚟俾大家參考下,有興趣可以試住整一次,基本上,好難會失手


----------------------------------------------------------


首先,準備煮食基本嘅材料同工具.


一個鑊,任何鑊都可以.


一扎蔥,一粒八角,一個湯匙.



 


用同一個湯匙為計量單位,準備:


紹酒一湯匙


白糖二湯匙


生抽三湯匙


陳醋四湯匙


清水五湯匙


一二三四五,就較好味啦.



 


排骨一磅,直接擺入調味度,開中火煮至收汁.


我用佐雪藏排骨,易肣好多,調味咁多嘅時候,雪藏骨都完全無哂雪味啦.



 


因為我用嘅鎮江陳醋好靚,煮出嚟嘅排骨色澤好靚,味道真係好正,無論係甜度或者咸酸度,都恰到好處,又簡單,又好味,


任何廚房新手,都一定可以整得成功嘅一味餸,試下........



另外,用菜仔同魚片同年糕,以蠔油俾味,簡單地炒埋一碟.....



鮮甜好味尼......



加埋隔夜湯,一個無難度嘅一餐,就搞掂........



 


17 5月, 2010

家常便飯--蠔油茄子煲+韭菜碎碎蛋+冬瓜湯

茄子係我鍾意食嘅食物之一.


不過食過好味嘅茄子,多數需有要先用油炸過.


油炸過嘅茄子更易入味同埋食落先唔會生水.但係一嚟健康著想,油炸始終未有健康陰影,二嚟油炸,需要大量嘅油,好浪費.


所以通常整茄子嘅餸菜,為佐令佢易入味同埋唔會食落生水,我多數會先蒸佢幾分鍾,有油炸之後嘅效果,又健康啲.


茄子二條,滾刀切,隔水蒸五六分鍾.



 


準備配料"荽莤蔥同蒜蒜"



 


做法:


1,免治豬肉用油鹽糖酒清水醃好味,落油入鑊,炒香蒜蒜,倒入豬肉炒散.



 


2,倒入蒸好嘅茄子,落蠔油同水略燜入味.


3,倒入荽莤蔥,少少麻油埋尾,最後裝入燒熱嘅瓦煲,搞掂.



 


買佐同真嘅一支蠔油試下,咦,味道幾香下,而且愛嚟煮餸,好帶得出餸菜嘅鮮味,如果就咁碌菜點嘅,我都係鍾意用返李乜記舊裝果款,不過煮餸,依款蠔油,幾帶得出鮮味,唔錯......



 


好惹味嘅一煲小菜....


蠔油茄子煲



 


韭菜切碎碎,蛋煎碎碎,肉碎碎,炒埋,鹽俾味,搞掂~~



 


去濕湯水"冬瓜,豬骨,生意米,赤小豆"煲夠火候,鹽俾味....


真係幾去濕架,去佐好多次廁所,眼袋都消佐好多添.......



 


埋位,開飯~~~



 


夏季最令我歡喜嘅係生果.


其中以荔枝為我最愛.


妃子笑係最先上市嘅品種,與別不同嘅清香滋味,荔味并非最為濃郁,但勝在肉厚汁豐核細,食起上嚟非常地過癮痛快,


要食就趁依家,過一排,糯米糍,白臘,黑葉相繼上市之後,妃子笑就慢慢退出,要食又要等待來年的此時.


細個時多數食售價較為廉宜嘅白臘,所以心目中認定荔枝最基本嘅味道就應當如此.


相較之下,稍嫌妃子笑味道稍淡,糯米糍過於香甜滑流,多食味滯難頂,唯獨是最平最犯濫嘅白臘黑葉一類荔枝,反而最令我滋滋有味食之不厭.


每年嘅夏季,心理上認定,係由荔枝嘅上市為開始的標準,以荔枝嘅收市,為句點.


盧菇都係我幾鍾意食嘅生果,細細品味之下,先欣賞得到佢果份清幽雅意,淡淡地散發著自己獨有的魅力,叫人無意之中深深吸引,一發不可收拾.


最好係買皮略帶深色,表示完全成熟,會更香甜,而且剝皮之後唔會有生澀漿汁沁出.


夏季,係盡情享受水果歡愉的季節........