小菲菲俠自煮樂

27 11月, 2012

早餐分享之---平底鑊煎Pizza

其實只要俾少少巧思,早餐只需要少少麵粉,少少配料,已可做出千百種變化。

早餐最緊要快手,簡單,好味,無負擔。

整Pizza其實唔係想像中咁複雜,味道更是可以天馬行空,隨心所欲。

今日早餐,整Pizza,唔洗開焗爐,一個平底鑊,足以走天下。

睇下外形,係咪似模似樣?



24 11月, 2012

蜜味蔥頭生焗骨

廣東菜,簡單,易做,美味。

學識佐,又一道見得人,出得場面的宴客餸。



21 11月, 2012

粉絲炒菠菜

今日要係屋企等份快遞,又唔知幾時送到,所以無出遠去買餸。

開罐辣辣炸魚罐頭打發強哥。



20 11月, 2012

蘿蔔絲肉餡餅

依個係上星期煮嘅晚餐,假期後綜合症,連續幾日都無乜心機煮飯仔添。

某晚,甜椒炒肉片,又易整又好味。





17 11月, 2012

芝士煎餅仔

多食芝士補鈣效果一流。

所以依日早餐,又整煎餅仔,所用餡料,就係芝士為主。

用Mozzarella碎芝士,芝士本身奶香味重,有拉絲煙靭嘅效果。




睇開嘅人都知道,我早餐整嘅煎餅仔,多數會係頭天晚上整落,擺入雪櫃低溫發酵一晚,第二日早上取出煎香即成,方便又簡單。

區別隻在於餡料嘅不同而已~~~

依日整芝士餡。

好簡單「Mozzarella碎芝士、略煎香過嘅煙肉碎、蒜鹽少許、芝士粉少許」

撈勻即成芝士餡,三兩分鐘搞掂嘅事。





餅坯略略講一講。

平時屋企有咩麵粉我就用咩麵粉嚟整,高中底筋粉我都一樣咁整,煎出嚟只有少許口感上嘅區別,所以對麵粉嘅要求不大,普通中筋粉我平時用得最多。

整餅仔所需材料極少。

我屋企得兩個人食,所以一次整,只需要「六七湯匙麵粉,一匙白砂糖、薄薄一細茶匙乾酵母、一細細匙油。」

落少少室溫暖水,逐少加入麵粉度,慢慢搓成一個麵團。

水嘅份量無一個準確性,我都係邊搓邊落水,因應粉嘅唔同,天氣嘅唔同,落水嘅份量都唔同,靠嘅係手感。




我整嘢真係好求其,我無話搓得幾靚,隨便搓成一個麵團,搓佐五六分鐘度,就搓好。

無需話好似整麵包咁,要搓到麵團起薄膜又點,無啊,求其搓好就OK喇。

對材料份量又無好精準嘅需求,多啲少啲,都基本上無乜太大問題。




因為係要擺入雪櫃低溫發酵一晚,所以麵團無需要等佢發起先包餡,我一搓好麵團,就直接分割包餡。

因應麵團嘅份量同自己想食嘅大細,我分割成四份,咁就可以煎四個餅仔。

有時咁樣一個相似大細嘅麵團,我懶得煎咁多次,索性整成一個大餅,都一樣無問題,悉隨尊便。





然後好似包包咁,將麵團搓扁。



放入大大量嘅芝士餡~~~



無需擔心餡太多會走出嚟,麵團本身具有的伸縮性,可以好輕易將芝士包好。

無需包得太靚,只要保證到個口封好唔會漏餡出嚟就無問題。



包好餡嘅包,壓一壓,碌一碌成一個扁圓嘅生餅坯,搞掂~~~


如是整好四件餅仔。

表面洒啲生粉,包好保鮮膜,擺入雪櫃(平時擺汽水果格),低溫發酵一晚上。

第二朝早,提早十分鐘拎出嚟透透氣,就煎得。


係咪好簡單咧`~~~



關於煎餅嘅技巧,以前寫過好多,依次集中再提一提。

通常依類餅仔,無論大細,我通常都以三四分鐘煎好一個為標準。

只要時間掌握得到,三四分鐘足夠哂,煎得太耐,餅皮會過硬過乾,影響佢食用嘅口感 ,就不美了。

通常我會先開大火,落少少油,餅嘅兩邊,最短時間之內,先煎至金黃色(一邊大約十五秒)




然後轉返細火,落一湯匙清水,等水蒸氣儘快將餅煎至熟透發酵,大約用一分半鐘左右。


最後一分鐘,開住蓋,將餅兩邊煎至香脆,搞掂`~~



十分鐘之內,四個餅仔,加埋一碗麥皮,一個靚早餐,就搞掂。



香香濃濃嘅芝士香味,加埋鬆鬆軟軟,外脆內綿嘅餅皮,如此一個餅仔,永無失望~~~

16 11月, 2012

快手晚餐之---白汁肉丸意

全日無落過街,晚餐唯有倉底有乜食乜。

「罐頭白汁、冷凍肉丸、意粉一包」

足夠一個晚餐。



15 11月, 2012

芝士白汁西蘭花

家裡總會備有一些罐頭湯以備不時之需。 

除了煮湯,做為芡汁也是非常方便的。




像是想吃白汁西蘭花,不用備齊所有材料,直接開罐頭,取二大勺,已足夠應付。

 

取兩大勺加適量的清水,煮開。

 

再加「蒜鹽、胡椒粉」略為調味(可加可不加)




倒入預先烚熟的西蘭花,與白汁兜勻。



懶得開焗爐,想快些開飯。

 

直接將芝士舖在西蘭花之上。

 

反正要的也是芝士的香味。




加蓋焗一二分鐘至芝士融化。


芝士加上白汁的香,配上西蘭花的清甜~~~

 

非常非常可口~~~

 

煮好之後,無需換碟,直接原鍋上檯,少洗一個碟嘛~~~





雖然沒有烤香的芝士面,但有煮至焦黃香脆的芝士白汁底,一樣美味~~~



買一小小一塊的梅頭肉。

 

煮甜豉油肉。

 

做法看慣我博客的人大約都知道了。

 

略略提一提「梅頭肉一塊、片糖少許、生抽老抽適量、清水」,混在一起,燜至淋軟收汁即可。

 

肉無需做任何處理,洗凈生的直接下鍋。



因為肉很小,所以直接在小瓦鍋上燜煮,燜了半小時,不揭蓋焗多半小時,肉已完全酥軟,連肥膏部位都入口即融呢~~




用瓦鍋收的汁液,特別漂亮,而且感覺上比用普通鍋燜煮的,更入味咧~~~~

 

同樣的,肉直接切了片,裝回小瓦鍋里,直接上檯,少洗一個碟~~~



熱辣辣原鍋原菜原生態,開飯~~~


14 11月, 2012

一人午餐之小棠菜烘蛋卷飯

對飲食的要求很簡單,「適量與新鮮」就是最基本的原則。
所以家里煮的飯與菜,儘量餐餐清,絕少會吃隔餐的飯與菜。
我是飯桶一枚,任何時候,熱辣辣的飄著飯香,油靭彈牙的米飯,配上少些許可口小菜,對我而言就是滿足。
這日的午餐,煮了一小小杯的米,一兩左右的米飯,配個小菜,足夠了。




13 11月, 2012

蘿蔔腩片

蘿蔔又香又甜又百搭。

隨便和腩肉加在一齊燜煮,同樣地滋味無限。





12 11月, 2012

雜食

週六晚強哥約佐幾個舊同學食飯,我就自己隨便打發一個晚餐。

果然,週日嘅早上,好快肚餓,不容強哥瞓懶覺,十一點過啲就將佢叫醒,陪我落街食嘢。

感冒佐幾日,未清得盡,總有些許頭重腳輕,所以落街食完嘢,去超市補佐啲貨,就翻返屋企休息,成日煲戲,過此一日。

原本買佐啲壽司諗住下午茶時間食嘅,點知一路行,貪心又買佐其它西餅,下午與強哥一路煲戲,一路食西餅零食,壽司擺係雪櫃,俾人遺忘。

晚飯索性唔整咁多嘢,油鹽水烚碟菜。





烚菜烚餃子,好合理~~~


加埋未食得切嘅壽司,雜七雜八,乜都有啲,又是一餐`~~




開始有啲風,座響屋企,真係有些許涼意,煲佐啲糖水,暖下個胃。

簡單落啲紅豆,少許糯米,一塊陳皮。

用瓦煲慢火煲嘅紅豆沙,真係不同凡響。



慢火煲一個鐘嘅紅豆沙,果皮已悉數融於甜湯之中,糯米為其增添自然的稠滑口感,紅豆得保粒粒分明,一啖吞落,卻又軟綿起沙,是母親至愛嘅效果,下次要專程煲一煲俾母親大人享用。



09 11月, 2012

簡單兩味

秋冬總有好多合時好味嘅菜蔬出場。

其中依款大肉芥菜,又係我至愛。




用薑絲與蒜蓉,加埋臘腸臘肉,加少少麵豉,炒好後轉入煲仔,熱辣辣食起上嚟,滋味~~~



買佐條好肥美嘅游水黃立倉,因為我自己唔多鐘意食魚,所以識得整嘅款式極之有限。

原本見條魚咁新鮮,諗住蒸嘅,不過實在唔多想食蒸魚,咁就改為整糖醋。


條魚撲少少生粉。




煎香煎熟。

然後落鑊爆香薑同蒜,落生抽同少量水,煮滾後落糖,條魚擺返入去略燜煮,最後落白醋,埋個芡,搞掂。



簡單又開胃嘅糖醋魚,我至愛嘅味道~~~

魚腩位豐富嘅油脂,最最銷魂~~~~



開飯~~

08 11月, 2012

青菜豆腐也好好味

只要烹煮得宜,青菜豆腐,也可以好好味。



簡單如一味臘肉炒芥蘭,都能飄香滿屋。



講講媽媽教我炒芥蘭的方法。



做法:1、先將臘肉下鍋逼至油脂盡出。



2,倒入洗凈摘好好的芥蘭,及一把的薑絲入鍋。(炒芥蘭不宜與蒜同炒,與薑搭配只有更美)



3、將芥蘭炒熟之後,加鹽調味,起鍋之前,沿鍋邊淋上些許米酒,倒入幾粒的白糖,快速翻炒,出鍋。



最後倒入的白酒是增加香氛,加入一點點一點點的白糖,作用是可以去除芥蘭些許的澀味。



簡單的一道炒芥蘭,也可以好好味。




07 11月, 2012

秋冬食蘿蔔

天氣一涼,胃口就特別好。

周日早上十點幾醒,涼意讓我係晨咁早嘅時候,好想食一碗熱辣辣米飯。


強哥繼續有佢瞓覺,我就起身,睇下雪櫃有咩可以煮嘅。

有半條蘿蔔,一盒仔免治豬肉,一包早前剝好嘅粟米粒。


先將免治豬肉,用「生粉、米酒、胡椒粉、鹽、糖」醃好味,攪至起膠,然後擠成一粒粒待用。




06 11月, 2012

簡單兩味

依排隨便買斤芥蘭,都絕無失望,又淋又甜。

愛嚟炒臘肉,薑絲炒,又香又好味。





雪櫃凈有幾個雞亦,同香菇燜埋,又一碟餸 。



簡單兩味,開飯。