早餐分享之---平底鑊煎Pizza

其實只要俾少少巧思，早餐只需要少少麵粉，少少配料，已可做出千百種變化。

早餐最緊要快手，簡單，好味，無負擔。

整Pizza其實唔係想像中咁複雜，味道更是可以天馬行空，隨心所欲。

今日早餐，整Pizza，唔洗開焗爐，一個平底鑊，足以走天下。

睇下外形，係咪似模似樣？

為佐減省早上製作嘅時間，同其它早餐嘅煎餅仔一樣，麵團預先一晚搓好就擺入雪櫃低溫發酵一晚。

麵團用的是發酵麵團「高筋麵粉+酵母+清水」，搓好即成。

1、時間嚟到第二朝，將麵團取出，已略略發起，變厚身。

如果鐘意食厚批底嘅，可以依個時候直接落鑊煎熟，我就鐘意薄批，脆卜卜。

2、所以將略略發起嘅麵團，用麵杖搓薄變大，搓薄之後，略略等佢醒一醒，大約五分鐘左右喇，依個時候可以將爐頭開著，開細火熱一熱個平底鑊。

3、麵團醒佐五分鐘左右，可以落鑊煎。我就用佐細火，每邊各煎二分鐘左右，唔洗落油，乾煎。

4、批底兩邊煎好略顯焦黃，咁樣，個批底就完成。

餅底整好，可以舖餡。

1、底醬可以增加味道同埋可以令到食材緊貼批底，為方便，我直接涂「奇妙醬」，香甜美味。

2、涂完底醬，落滿滿一層芝士。

3、芝士之上，舖上任何你方便嘅食材，屋企有早前炒好嘅麻辣肉燥，咁我就落佐洋蔥粒同埋肉燥。

4、最後再舖返一層芝士，咁樣芝士就可以頭尾呼應，滿佈成個Pizza，食嘅時候成口都有芝士香。

最後一步最關鍵，將舖好餡嘅餅底，擺返入平底鑊，淋少少水，蓋埋蓋，利用水蒸氣，焗大約三分鐘至芝士融化。

我就會最後將芝士面向底，略略煎幾秒鐘，再翻過嚟，效果會好好多，不過依步略需技巧，唔熟嘅話，最好不要嘗試。

比其它款嘅早餐煎餅需時略長，但味道，絕對值得花多少少時間去整。

強哥當然地贊不絕口，最愛嘅，係煎到金黃香脆嘅餅底，配上濃濃芝士香，衝埋杯啡，依個早餐，無得頂~~~~

完成，有興趣，試一試吧~~~

酵母圖片