蜜味蔥頭生焗骨

廣東菜，簡單，易做，美味。

學識佐，又一道見得人，出得場面的宴客餸。

做法：

排骨簡單地用「生抽+米酒」醃入味。

我醃佐大約二三個小時，睇個人時間定，其實一二個小時足夠入味。

亦唔需要用什麼鬆肉粉，不用過多的調味，簡單的醬油與酒足夠。

排骨主要選帶軟骨的部位，較為鬆軟，容易軟淋。

排骨煮好後會縮少好多，所以我整一次，大約用一磅左右的量，足夠一餐的滿足感。

依味餸嘅配料好簡單：

「蔥頭+蒜片+薑片+辣椒乾」

蔥頭可以適量多一啲，燜煮過後好香好香，與排骨伴食真正一流。

薑片與蒜片不用太多，辣椒乾可以增加香味，我用嘅係阿媽自己哂嘅大紅椒，唔辣，僅取其味。

就新鮮嘅紅色長形辣椒，唔多辣果款，洗凈去芯之後，串起一串，掛係通風處晾乾身即可。

平時愛嚟燜肉炒餸，都可以增加色澤與風味。

繼續，鍋里置油，將料頭爆出香味。

料頭爆出香味後，將排骨倒入鍋中，淋少少白酒入去，翻炒至轉色。

乾炒，唔洗加水。

然後轉成中細火，蓋上蓋子，慢火焗熟。

其實只要火候掌握到，排骨本身有一定的水份，焗煮的過程，會釋放蒸氣，可以將排骨焗熟，又唔會燒焦。

焗佐大約十分鐘之後，揭開蓋，再翻炒一下，以免痴糊底。

而且水份開始收乾，醬油的色澤也開始出佐嚟。

睇下，個底係唔會痴底㗎。

其實唔關個鑊係咩牌子咩材料事，最關鍵係使用得當，咩鑊都可以做得到同樣效果。

翻炒過後，可以再轉成更細啲嘅火，繼續焗多幾分鐘，嚟到依個時候，排骨無乜水份喇，人最好係側邊睇住火，得閒就翻幾下，以免痴底。

然後準備一個醬汁。

「蜜糖+老抽二三滴+生抽一小匙」

焗煮了大約十五分鐘之後，揭蓋，利用鍋內的餘溫，將上步的甜醬油倒入，快速地翻炒至上色。

讓甜味掛在排骨的表面即可，不用炒太久，蜜糖炒耐佐會發苦。

如果唔識掌握時機，最穩妥的做法係先落豉油炒至排骨上色，熄火後，再放入蜜糖拌炒兩下起鑊
，就不需要好似我咁樣，先調好一個蜜醬，以免炒過火，失佐甜味變苦味。

咁樣蜜糖獨有的的蜜及香，先至會好新鮮地掛在排骨的表面，增味不少。

一碟極其惹味的蜜味蔥頭焗生排，就完成了。。。

與父親當年做出來的味道，足有八九成相似，成功~~~

大家不妨試做一回，即簡單，又美味，好送飯，更下酒~~

炒多碟菜，開飯~~