蘿蔔絲肉餡餅

依個係上星期煮嘅晚餐，假期後綜合症，連續幾日都無乜心機煮飯仔添。

某晚，甜椒炒肉片，又易整又好味。







炒多碟菜，點都要逼強哥食多啲菜~~

炒肉片嘅梅頭肉，附帶住好大一舊肥膏，切佐落嚟，用鑊慢火煎出油。

切佐幾粒蔥頭，變成蔥油。

煎好嘅蔥油都有一碗仔，擺住煮餸撈麵乜都得~~

另外凈抵少少嘅肉，剁碎。

雪櫃凈有一細細舊蘿蔔，切絲。

蘿蔔絲先用鹽拉一拉，擠出水份。

然後切少少蔥粒，落胡椒粉、蠔油、鹽、糖，拌好味道，整好餡料。

兩細舊仔發酵麵團，兩舊蘿蔔絲肉餡。

提早一晚包好，擺入雪櫃慢慢發酵。

第二朝煎熟佢。

因為係生肉，所以煎嘅時候比平時再長啲啲。

好鮮好鮮味嘅蘿蔔絲肉餡餅早餐，搞掂~~~