自家制---咸菜豬肚胡椒湯、五香肉丁南瓜煮

天氣又濕又凍，周身唔舒服。

費事行太遠，係樓下惠康買餸。可選擇不多，行佐兩轉，先決定買一個豬肚，一包咸菜，半邊南瓜，一罐五香肉丁，咁就湊齊尋晚嘅一個晚餐。

豬肚嘅清洗：

1，通常我會先剪走表面多餘嘅肥膏

2，將豬肚返到入邊，用生粉同鹽搓幾次。

3，豬肚用個鑊煎一煎走表面果層滑滑嘅嘢。

4，刮走綻果度一層白膜，返番到正面

5，用薑同酒，煮一煮定型個豬肚

因為手比較污漕，自己一個無人幫手，影唔到處理豬肚嘅方法，不過網上有好多處理豬肚嘅視頻，可以去搵下。

 

煲一個好暖胃嘅湯水。

材料：豬肚一個、咸菜一包、黑椒十幾粒磨粗粒（屋企無胡椒粒，就改用黑椒粒，其實用黑椒或胡椒都無乜所謂）

所有材料掉入高速煲，煲一個鐘。

煲之前省起雪櫃總有一舊仔煮餸凈抵嘅瘦肉，都掉埋入去一起煲，等啖湯濃啲。

 

煲好之後，我凈係落佐一啲啲嘅鹽較味。

強哥一飲即刻話「Perfect 」

飲完啖湯，周身都暖曬~~

咸菜嘅酸咪咪，胡椒嘅微微香辛，飲完真係好舒服。。。。

 

煲完湯嘅豬肚撈起切條，又係餸一碟

 

整佐一個醬汁「生抽、李X記蒜蓉、麻油、自製辣醬」配食。

依個醬汁好惹味㗎`~~

 

依餐真係快捷~~~兩個爐頭齊開工，唔駛點睇，係洗豬肚工序多啲啲，其它步驟真係超簡單。。。

 

煲緊湯嘅時候，去準備另一味餸。

南瓜半邊切大塊，五香肉丁一罐，蒜蓉少少。

 

做法：

1，先用油爆一爆蒜蓉

2，倒入南瓜，五香肉丁，加水，燜煮十分鐘左右。

3，落少少生抽俾咸味，落鹽我驚個咸味唔均勻，所以落生抽。

煮嘅過程，完全唔駛去翻佢，因為南瓜一熟好易爛，所以加水之後由得佢自己去煮，乜都唔駛理啦。

所以南瓜最好切大舊啲，咁煮好之後都總見得到個樣係度。

 

掛住打機，唔記得睇火，爭啲煲乾水添，好彩聞到味即刻衝入廚房，有得救。。。。。

 

好簡單嘅幾個步驟，一煲又惹味，又減肥嘅餸菜就搞掂`~~

 

一個晚餐，一碗湯兩味餸~~~

 

一個賣燒餅男仔的故事

一個堪稱簡陋的街邊小食檔前，擠滿了前來購買嘅人群。

依條街，有一個極之誘惑嘅街名，曰「墮落街」

想必如此情景經已持續一段頗長時間，因隔壁生果檔主，豎起的招紙中可見一斑，招紙中寫住「購買燒餅或睇靚仔的美女先生們請往左邊一點」

（生果檔個菠蘿切得真係好藝術~~~）

無錯，咁多嘅人擠係小食檔前，除為買食物，更為一睹靚仔之貌。

事情緣至網上突然舖天蓋地瘋狂被人轉載的一組圖片，話說某城市某條街的一個角落，有一個不起眼的小食檔，檔主係一個相貌英俊的年青人，每日都好認真地整餅售賣，與傳統中印象，整燒餅嘅人，多數係上佐年紀嘅人去做，而突然地，一個好後生且樣貌姣好的男性青年出現人前嘅時候，就俾到人一種好新奇的感覺。

附近都係大學校網，而依條街好快要被清拆，有附近文學系學生甚至為依為男青年做詩一首

名就叫做

「墮落街的帥哥燒餅還能吃幾回」

數不清在那里曾留下多少腳印

瘋狂的  平靜的  清醒的  昏沉醉倒的

單純中的一件是墮落街角的帥哥餅

每次經過  不自覺地笑望

高高的  瘦瘦的  精緻的  深沉的

當作一種不可觸及的消遣

我不知道還能吃幾次

不過我會儘量再去看望你

當作告別

（國內對於英俊男仔嘅叫法係'帥哥'）

開始被網友廣為流傳之後，漸漸多佐人專程走去一睹其人真面目，相對地都帶動本身生意嘅興隆。

由新聞中得知，依位燒餅哥哥，係因為屋企母親患病，借落好多錢睇醫生，未讀完書嘅佢，都唯有無奈地綴學出嚟打工，早早賺錢繼續幫母親睇病同還債，係佢眼中，職業無分貴賤，只要憑努力，賺到錢就無問題。

中國人嘅心理未至健全，見人生意好，隔離生果檔嘅老闆開始產生嫉妒心理，某日藉住一個藉口，話買燒餅嘅人流太多，唔覺意搞爛佢嘅生果，借下意，就叫自己老婆同個女，去撒潑，借下意打爛曬人啲搵食嘅工具同食物。

面對住潑婦兩名，身為男人嘅老實檔主，唯有好憤怒，又好無奈地睇住別人行兇，而自己毫無招架之力。

（非不能也，因不為也）

（因為每日基本上都有網友前往「參觀」，所以過程亦都被人影抵擺佐上網，網絡生活真係無處不在）

 

生意都係要繼續，嬲完，都係要收拾殘局。

 

依個時候總有顧客前來購買，男仔唯有無奈地話之「今日暫停營業」

 

依組圖片擺上網之後，被無數憤怒地依位靚仔哥哥的粉絲提出對隔離生果檔嘅抗訴，甚至有人話，要組團去生果檔前抗議。

有人即刻POST佐早前有網站影到嘅一張圖片。

可清楚睇到隔離生果檔嘅態度表情~~~

依張圖片，真係絕一絕~~~

漸漸地，多佐人更為關心依個燒餅哥哥嘅動態，多佐網站或者電視台請佢上去做節目。

 

 

甚至，因為佢一米八六嘅身高，有廠家請佢去做代言，拍廣告。

亦都有模特兒公司搵佢加入公司。

一個當初係街邊擺檔嘅男仔，命運是否由此正式揭開另一頁？

相信如果同樣事情發生係香港，多數人嘅所有情緒，都會被來緊嘅「明星夢」而飄飄然。

不過令人覺得讚歎的係，依個燒餅哥哥，年僅二十三歲嘅佢，利用佢本身已積累佐嘅少少知名度，獲得一個類似「小資金貸款」的機構撥發資金，係另一個街上，租佐一個門面，甚至去註冊佐自己嘅商標，搞好舖面形象，重新規範自己燒品種類。

從新聞中得知，依家佢已開佐自己嘅第一間分舖。

可想而知，依個後生仔，係為佐自己一個更健康與光明嘅未來在努力與規劃緊。

 

唔係因為佢靚唔靚仔，而係佢身上嘅果種淡定，穩重，理智，令我深深佩服。

好相信依個燒餅哥哥的將來，定必會係更精彩更美麗的。

 

全部真人真事，圖片轉載至網絡。

自家制---蝦膠讓豆腐

上次老爺從西貢街市買佐蝦膠返嚟俾我帶返嚟。

第二日就整佐嚟食。

本嚟想整炸蝦球，但屋企又無面包糠，蝦球又送唔到飯，咁就走去樓下買佐盒豆腐返嚟，整返個惹味嘅蝦膠讓豆腐做餸。

材料好簡單，豆腐一盒，蝦膠適量，粟粉少少。

蝦膠本身已有調味，唔駛再俾味。

豆腐切三角，我貪心，想食肉多啲，咁就挖個大啲嘅坑。

先係豆腐底落少少生粉，再將蝦膠讓入去。

落粟粉會將蝦膠同豆腐痴得更埋。

然後就落鑊半煎炸嘅形勢整香脆。

煎到兩面焦黃就得，中間唔熟唔緊要，因為會再燜一燜。

有凈嘅蝦膠就咁搓成粒粒煎返熟。

膠球熱嘅時候脹得好大粒，一凍就縮到扁扁。

睇下，煎得幾靚~~~

 

用蒜蓉，黑椒，蠔油，粟粉，上湯，豉油糖搞佐一個芡汁。。。。

淋上豆腐，開火焗一焗等豆腐同芡汁入味。

烚一朵西蘭花伴碟，搞掂~~

 

睇下，個蝦膠係彈牙好好味㗎。。。。

加埋惹味芡汁，正~~

 

蒸多碟飯，一飯一餸，搞掂~~

假期無早餐---芝士漢堡通、肉丁炒蛋湯面、麻辣炒米

連續嘅幾日假期，為令辛苦工作佐好長時間嘅強哥得到徹底休息，選擇最隨意嘅方式去度過。

由得佢每日瞓到自然醒，徹底咁俾身體一個放鬆嘅機會。

所以話，假期當中無早餐。實在一瞓醒，已至中午時分。

唔駛換衫出街，係屋企食晏。

實在有咩可以比衣衫不整，蓬頭垢面，隨意咁攤係梳發度食住嘢飲汽水睇戲咁舒服咧~~~

第一日中午、

諗起麥當當嘅某款芝士扭扭粉早餐。

自己係屋企又效仿一番。

材料不過係「蛋、漢堡扒、芝士」

OK，我得㗎。。。

去片~~~

漢堡扒費事自己整，係超市買現成。

芝士用熟芝士，一塊一塊果啲。

咁蛋~~

屋企無好似麥當當咁正嘅煎蛋器，又唔想為佐一餐半餐走去買一個返嚟。咁師奶當然有師奶嘅辦法~~

去片~~~

無錯啦，就係用洋蔥，橫切成一個圈，最好切厚身啲。

然後將個蛋打入去，慢慢煎熟~~

咁蛋就有一個靚靚嘅厚厚高身嘅形狀啦。。。。。

然後蓋埋個蓋，等佢慢慢煎熟。

提早一日買定半打生煎牛肉包，第二日煎返熱佢~~~

 

想煎得幾成熟自己控制

 

無扭扭粉，用快熟通粉。

煮嘅時候，連煎蛋嘅洋蔥都唔放過，掉埋入去一起煮一煮，加埋一扎甜粟，啖湯甜好多~~~~

 

然後趁熱，擺埋一塊芝士上去

趁熱撈勻佢，我係用熟嘅Mozzarella Cheese ，係好香㗎~~芝士融佐入湯水度，成啖湯變到好香好香嘅奶味，真係好正~~~

加埋幾舊叉燒~~~

掂~~~

好耐以前我聽過人講，從韓國傳過嚟嘅一种食法，打邊爐打到最尾嘅時候，放一餅即食面入去，面腍嘅時候，擺一塊芝士係面上邊，趁熱撈勻佐食，勁好味，依次一試，面食類加塊芝士入去，真係會香好多~~

 

第一日

生煎包+芝士漢堡通

 

嚟到第二日

得某網站送佐兩張美食展嘅門券，之前一日同老公走去入佐啲貨，其中入佐一罐大大罐嘅五香肉丁。

真係有少少後悔，先至入佐一罐，原來味道真係OK㗎。

而且超大罐。

肉丁就用佐三分一嘅量，打兩隻蛋，蛋落一細細碗仔水打散，乜都唔駛再落，將肉丁炒一炒熱，將蛋打落煎Pan度，撒少少荽莤碎，慢火焗返熟。

 

要蓋埋蓋，先至容易熟。

其實依味餸愛嚟撈飯都好正。。。。。

不過我係碌佐兩碗面，一人一碗~

 

第二日中午

肉丁炒蛋湯面

 

嚟到第三日，即係頭先啦。

今日天陰落雨，最適宜瞓醒食飽再上床睇戲再瞓過。

實在唔想出街。

想食炒米，好彩平時屋企都會存有少少依類貨。

即時想食即時有貨。

煲滾一煲水，將米粉浸腍身，然後停乾水，撈少少鹽同油，等佢有味同埋唔會痴埋一舊。

切少少甘筍絲，切半條麻辣腸，加埋一碗仔辣嘅五香肉丁，一個蛋，少少生菜。

 

自己屋企炒米絕對少油夠味。

炒米通常一對筷子就搞掂。

先將料頭全部炒出味道，然後先至倒米粉入去，落豉油同胡椒粉，上色同味道。

兩條筷子，雙手開工，拌啊拌，炒啊炒~~~

 

睇下，啲料同米粉，都混合埋啦~~

試下味，剛剛好~~~

話俾大家知我嘅一個小小習慣，食炒米，落少少靚嘅陳醋，正~~~~

再配埋一大大杯熱辣辣咖啡~~~

無得頂啊~~~

好啦，食飽飽，睇戲~~~

 

依次用嘅係一款東莞出嘅排粉，真係幾好口感，好易浸腍，炒又唔會斷，食落口感好，下次再買過。

獨沽一味---菠蘿生炒骨（食譜）

碟生炒骨係咪好得咧~~~

唔止睇落得啊，食落總得啊~~~

生炒骨係我同強哥嘅至愛，出街食中餐，生炒骨係例牌必選菜式。

屋企有罐菠蘿擺佐都好耐，要清一清佐佢，咁即刻諗到嘅，當然就係菠蘿生炒骨啦~~~

 

醃：排骨一盒，用豉油，糖，生粉，蛋液，胡椒粉，酒，醃一個鐘入味。

 

炸粉：以前嘅作法，我就會將醃好味嘅排骨，先過一層蛋液，再均勻地拍上木薯粉（用木薯粉炸出嚟會較粟粉更為硬身好味），然後落油鑊炸。

但係依次整嘅時候先發覺屋企木薯粉用曬無入貨，咁唯有臨時試下，用個天婦羅炸粉開粉漿炸。

 

因為唔想食落滿口都係粉，所以凈係掛佐薄薄一層粉漿，然後落鑊炸。

我用個細煲仔分幾次慢慢炸~~~

原來用炸粉炸出嚟嘅排骨，就咁食，都覺得好好味啊。。。。

不過想食落更硬身脆口啲，咁一定要再返鍋炸多十幾秒。

 

配料：就係常見嘅「洋蔥、青椒、甘筍、菠蘿」

芡汁：鹽、菠蘿罐頭水、茄汁、山楂餅、陳醋、少少麻油

 

炒：

1，先落少少油，炒一炒個料頭，炒出香味。

 

2，將菠蘿罐頭嘅水、茄汁、山楂餅開火慢慢煮融個山楂餅，用個柄不停咁攪，落少少鹽，倒入陳醋，試味，唔夠甜就落糖，唔夠酸再落茄汁或醋，然後加少少芡粉水，熄火後倒入少少麻油。

（我就無落糖，因為罐頭水同埋山楂餅本身都有甜味，落山楂餅係要個香味，我鐘意山楂餅嘅味道多於茄汁，所以茄汁只係想要個色水，個酸味我會從陳醋果度要，醋麻油依類嘢都係熄火後再落就唔會揮發）

3，熄火後倒入剛剛炸好嘅排骨同菠蘿以及其它料頭，兜炒至所有材料均勻地沾上醬汁，趁熱裝碟~~~

個芡汁我整得剛剛好，唔會太稀或太結，太多或太少，剛剛好掛曬係排骨度，完美`~

 

大大一碟~~~

 

無煮其它餸啦，獨沽一味，滿足~~~

 

自己整，起碼唔會好似出邊見到，紅通通，食得落口都驚一驚先~~~