樓下小食舖

樓下街舖，又添多一間賣魚蛋臭豆腐嘅小食檔。

位置的選擇其實上佳，就在正街上，人流夠旺，加埋附近幾間中學以及周邊的住宅，客源絕對豐富。

但是開張數月，每次經過看到的卻是門可籮雀的情景，隔離幾間小食檔，就做到停唔到手。

點解反差咁大？

你話新開張未聚到熟客，情有可原，但如果情況持續超過一個月，就應該從本身尋找問題的原因。

新開張未有熟客，咁就要從銷售手段上去尋找解決的辦法。

它家的售價與本港其它食肆並無太大區別，也是五蚊串魚蛋，七蚊舊臭豆腐，從價格上來看，小食檔並無特別優勢，看到一個大大張橫幅寫著「臭豆腐」三個字，看來主力小食是「臭豆腐」，附近的小食檔都沒有臭豆腐出售，那麼重點推薦應該落在臭豆腐之上，臭豆腐這樣東西，本來就是很主觀的一樣食物，除了要人知，還要人接受，要人接受嘅最簡單直接嘅方式，咪就係請人食囉~~

如果我是老闆，新開舖頭，最緊要係聚集人氣，一定要「捨得」，有捨先有得，可以在舖頭門前搞個試食活動，經過途人均可免費試食檔口小食， 又或者小檔初試營業，以特惠價格售賣數日，最重要是讓街坊記得，有咁樣一間小食檔。

 

其實依個都未算係依檔小食檔最重要嘅死穴。

小食屬於係「衝動型消費習慣」，多數唔會專登諗定今日要食咩小食，一般係行過經過，見到突然想食，就會買幾串嚟食下，所以小食檔嘅擺設方式就好重要，最好係將所有食物，就咁熱辣辣，冒著滾滾濃煙，名目張膽咁擺係舖頭前邊，等路過途人一眼可見，增加視覺作用，如有濃鬱味道更好，等味道不可抗拒地直鑽入鼻腔，增加嗅覺作用，雙重作用刺激之下，就會俾到好大衝動途人去購買，反正都係幾蚊串，食又食唔飽，過下癮，滿足下視覺同嗅覺嘅刺激要求，都無乜所謂。

如果買嘅人多，香港人嘅「羊群心理」猶為明顯，一遇多人排隊等候嘅食檔，都會有興趣去逼一逼睇一睇，等候嘅人越多，陸續來緊消費嘅人就越多，如果食物味道又確係唔錯，相信假以時日，必定能夠積累下自己客源。

而依間小食檔，最致命嘅係，因為小食檔不設堂食，本來就係買完就走聚唔到人氣，佢就更加應該將自己嘅食物擺係門口人睇到聞到以刺激購買慾望，反而佢哋將門口嘅小食車仔用無數招紙痴住，食物就係屋入邊製作，睇落門口冷冷清清，邊個行過會有想買嘅慾望啊~~~

 

做小食生意之前就應該明白，小食係利潤好細嘅一種產品，要靠嘅係量嘅積累去達到利潤嘅最高點，一日嘅人工舖租燈油火臘，靠嘅係一日長時間嘅銷售時間去維持，所以做小食生意，真係好辛苦嘅一個生意，無好大把握，都無好去嘗試。

依間小食檔，能否生存落去，睇個勢，實在堪虞~~~