麻婆豆腐

未識得欣賞之前，覺得花椒帶來的麻，係比辣更令人感覺辛苦嘅一種感受，係後來食多佐四川菜式之後，漸漸由麻嘅感覺之中，品嚐出花椒果種獨特嘅香氣，對於麻辣嘅感覺，開始接受，到至鍾意~~~

尋日整佐一味又麻又辣嘅四川傳統菜「麻婆豆腐」

關於麻婆豆腐，傳說佢係始創於清同冶初年，當時成都北郊萬福橋有一間陳興盛飯鋪，主廚掌灶的係店主陳春富之妻陳劉氏。佢用鮮豆腐，牛肉末，辣椒、花椒、豆瓣醬等燒制而成。佢烹制的豆腐，麻、辣、燙、嫩，味美可口，十分受人歡迎，哋人越食越上癮，名聲漸傳開，又因佢面上有幾粒麻子，故傳稱為陳麻婆豆腐，後來簡稱「麻婆豆腐」，流傳至今~~

做法同材料都比較簡單，家中製作都好方便。

做法：1，我會先用花椒爆一爆香個鑊，然後撈起花椒棄之。

咁樣做係等個油入邊有佐花椒嘅香味，變成佐花椒油，燜煮排骨或者雞之前，咁樣整個花椒油落出，整出嚟嘅餸都特別香㗎~~

然後準備配料：蒜蓉同四川陴縣嘅豆瓣醬。

蒜蓉可準備多少少，因為會先用一半嘅蒜蓉爆香，另一半生蒜後加，咁樣會有生熟兩種味道嘅蒜蓉味，會香好多。

2，爆香一半蒜蓉。

3，醃好味嘅免治豬肉倒入鑊炒至轉成白色炒散開。

4，倒入生蒜同豆瓣醬炒勻個味

 

5，加少少水，倒入豆腐，加少少豉油較味，燜煮一至二分鐘。

 

6，餐廳會回少少熟油落個豆腐度，等佢香口啲，我唔想食得咁油，就無做依個步驟，我會係熄火之後，落一大扎荽莤或蔥，同埋少少磨成粉嘅花椒粉。

最後一步再落啲花椒粉，絕對有畫龍點睛之妙處，生嘅花椒粉另有一种好直接嘅香味係度，同一起鑊嘅花椒油，有相互呼應嘅作用，係必不可少嘅~~~

 

我會先乾燒一陣個煲仔，等佢和暖之後，再倒入豆腐上檯食，咁樣食到尾，煲豆腐都係暖笠笠㗎~~~

豆瓣醬嘅惹味，豆腐嘅嫩滑，花椒淡淡的麻意由舌尖慢慢鑽入喉嚨嘅感覺，香艷得嚟，好刺激~~~

試下~~

 

再碌多個芥蘭，搞掂~~~