整完油餃整水餃

 

真係幾鐘意食餃子啵，特別天氣涼涼地果陣時。

我整餃子就係好有心機架，務求整得最好味，一切細節都不可遺漏。

咁果日就整佐韭菜餃。

1，韭菜先用鹽出出水（咁包起上黎就唔會一邊包一邊韭菜出水啦）

2，肉的選擇一定係梅頭。

3，自己剁碎豬肉，剁好之后，加一個雞蛋，豉油，生粉，糖，少少五香粉，較好味。

友情感謝老公幫手剁豬肉。

剁好之后，開始包。

我偷懶啊，直接買餃子皮。因為個邊較硬，所以要備定碗水，濕濕個皮邊邊，咁易包好多架~~

我凈係識得三种餃子的包法。依個係其中一種。

好難用文字表述，直接睇圖。

 

我睇住時間包，平均二分鐘包五個餃子到啦，速度都算幾快架。

因為得二公婆食，包足夠食就好啦。。。

十幾分鐘搞掂晒~~

第日悶悶地，走去開間餃子舖，睇怕都難唔到我啵~~~

講一講我整醬汁。

1，先用油爆香蒜與蔥頭。

2，加老抽生抽水鹽醋較味。

3，加生粉水令醬汁結D。

最后加一大扎芫莤。

已經好好味~~~

煮餃子。

我煮餃係好食D架，個竅門就係水滾之后落生餃子，跟住水又滾之后就落凍水，又滾又再加多次凍水，第三次又滾之后，加最后一次凍水，滾佐之后俾佢係咁滾多一分鐘，就可以撈起啦。

唔同於一味死煮，咁樣滲凍水既煮法，使利用熱脹冷縮原理，令個餃子皮食起上黎更爽更滑。。。。

我食乜都鐘意落D花生碎落去，會香口好多架。。。

食餃子尤其需要。。。。

出邊食唔到我咁好味既餃子架，唯有自己整，先至最適合自己口味~~~