添丁

哈哈哈，今日係全家人都好開心嘅一個日子，四弟嘅囡囡今日出世了，有六磅重㗎，BB好健康，個樣總未睇得好出似邊個，最開心嘅人莫過於老爺同奶奶啦~~~

哈哈哈，開心過中六合彩~~




BB眼仔未開啊，真係好細好細，我因為感冒唔敢抱佢，不過可以想像得到，一定係好柔軟好柔軟。

見到咁樣一個人仔係面前出現，我個心都軟哂，遲下我又要去幫手湊B，先實習下，拎下經驗，第時自己嘅B湊起上嚟，起碼都叫有些少經驗。

因為B囡嘅媽咪係剖腹產，所以暫時都只能食啲流質嘅食物，咁樣唔會對腸胃造成太重嘅負擔，奶奶話想聽日炖啲花膠湯過嚟，我就叫奶奶唔好咁快炖依類咁補嘅嘢俾佢食，暫時清淡啲嘅流質食物先係對媽咪最好嘅保護，依個時候嘅媽咪可補充「豬肉、雞、蛋」依類比較性平嘅蛋白質恢復體力，同埋做手術嘅媽咪一定要記得，唔好咁快食魚湯，因為魚肉，特別係山班、生魚一類嘅魚湯，飲佐之後會令到開刀嘅傷口快速生長新肌，容易造成一條肉條，咁就好醜樣啦，所以記得啦，開刀嘅媽咪，唔好咁快飲魚湯啊。

嚟緊如果有時間，同大家分享多一啲座月時嘅湯水資料，同埋產婦自己本身要注意嘅事情，咁樣就算將來自己請陪月，都可以知道個陪月稱唔稱職嘛。