自製菠蘿果醬

早餐時不時會買方包返嚟，節省時間又方便。

方包可發揮嘅食法好多好多，隨意咁煎個蛋幾片餐肉一夾就係最佳三文治，或者擦少少牛油少少砂糖又香又滑又脆，再唔係，少少樽裝蒜蓉拌牛油，擦係焗好嘅方包上，再焗返幾下，真係快靚正。

強哥好鐘意買各式果醬配面包食，不過超市買嘅樽裝果醬絕大部份含有防腐劑，所以如有可能，我多數會自制果醬擺住。

可以做果醬嘅材料隨手可取，隨個人鐘意，好似今日咁，買佐一個好熟嘅菠蘿，本嚟係打算做生果食，諗諗下，好耐無整果醬，咁就即興，整個菠蘿果醬出嚟。

所需材料簡單到不得了，如下圖所示：

「菠蘿、檸檬、砂糖」

係㗎，就依三樣咋~~

做法：

1，菠蘿去皮去芯（芯又硬又唔甜，所以唔要）

我磅佐一磅，去佐皮同芯，個菠蘿凈返大約350g，我唔想食得太甜，所以就用佐大約90g嘅白砂糖。

2，將菠蘿剁碎。

我費事開攪拌機，直接用針板剁，又快又正，用攪拌機往往攪得太碎，剁比較好控制粗粒。

3，將菠蘿同砂糖倒入平底鑊度，切半個檸檬榨汁倒入去。

（加檸檬係增加酸度同埋檸檬嘅香味，凈抵嘅檸檬皮擺入雪櫃，可避味）

4，然後開火煮，我用中火。

5，大約十五分鐘左右，開始收汁變結，個菠蘿亦都變得透明同埋有光澤，咁就搞掂啦。

已經可以聞到好唔同嘅香味啦。。。。

 

簡單的幾個材料，簡單的幾個步驟，就搞掂一個無添加劑嘅天然健康果醬~~~~

即刻焗塊多士，試下味~~~

唔`~~酸酸甜甜，正~~~

 

天凍時，用二大匙嘅菠蘿醬開返個暖水，就係好正嘅一杯菠蘿熱飲啦~~~