年三十返奶奶度做團年。
年廿九提早整定要帶返去嘅扣肉。
買佐好多舊五花腩，本嚟大大舊嘅，一烚再焗之後，變成細細舊仔，真係縮水得緊要。
依次用嘅新焗爐去焗扣肉皮，似乎無以前光波爐焗得個皮咁靚，下次轉用另一個大焗爐整先得，依次嘅皮無爆得咁鬆化，失敗~~~
自己屋企人食，就買靚啲嘅豬，專程走去大埔墟買本地農場養嘅健康嘅豬肉，飼養過程無用抗生素，無合成飼料，無落哮喘藥，食落肉味濃過內地運過嚟嘅豬，貴係貴少少，但係絕對甜味，而且肉質滑嫩，非一般可比。
咁靚嘅肉，無需太多功夫，最簡單嘅做法「白烚」嚟食最恰當。
就係咁簡單，落幾塊薑同少少酒係水度，煮到熟為止。
唔想薑味太重，煮到一半將薑撈起就得。
我試過，同樣用係街市肉檔買嘅內地運過嚟嘅豬肉，肉味無咁濃，而且有時唔好彩，會有一陣好臭嘅「尿味」，而且烚好嘅肉質，瘦肉部份會好鞋。（我試過掉過幾次豬肉啦，就係因為好大一陣尿味，我絕對頂唔順果種味道，就算係citysuper 或者tast都試過咁唔好彩）
然後將烚熟嘅腩肉，-切薄片，整個醬汁伴食。
醬汁我就用佐「頭抽、蒜蓉、檸檬葉、青檸汁、糖、七味粉」
較好個味。酸酸香香，伴以新鮮腩肉，解膩之餘，勁好味~~~
肉質一啲都唔會鞋㗎~~~好滑嫩~~~
然後用XO醬炒佐一個蒜蓉菠菜。
炒菠菜避不免會有少少澀口嘅感覺，我屋企嘅做法，係炒嘅時候，落少少少少砂糖落去，咁果陣苦澀味，就會消失㗎啦~~~
食飽晚飯，先至施施然，整佐兩底芋頭扣肉，都整到深夜十二點幾㗎~~~~
沒有留言:
張貼留言