美味的早餐---鹵肉包、芋蓉包

特登鹵多佐好多甜肉，為嘅係整一個鹵肉包。

鹵甜肉做法可參考我以前食譜。

左邊係鹵肉包嘅餡「鹵肉剁碎+甜鹵汁+香蔥+香麻油」

右邊係阿媽整俾我嘅芋蓉，阿娘親手自己整㗎。

芋蓉做法「原隻大芋頭煮熟之後壓蓉，加豬油同砂糖不停攪至起膠質感即可」

無乜特別花款，只不過係用豬油去增加佢嘅潤滑度，用砂糖俾味，食到係最原汁原味嘅芋頭香味。

天氣熱，面粉用佐半個鐘已經發得好靚好好。

我包得其實都好醜樣，唯有慢慢進步啦。。。。

發得真係好好啊，全部都擠埋一堆咁，睇到勁開心啊。。。

包包的基本係饅頭，做法可參考我以前寫過食譜：「饅頭的製作」

我個鑊其實幾大下㗎，所以啲包包，一個個其實係好大一個㗎。。。。

睇下蒸好嘅包包。。。

芋頭蓉嘅。。。。

老公一試之下大為驚艷「比豆蓉總好味啊，自己整嘅餡？味道好正好正啊」

連不嗜甜食嘅我，原本諗住食半邊，點知一食停唔到口，成個都食哂~~~

芋蓉因為係自己整嘅，絕對無添加劑同莫名其妙嘅香料，個餡有濃濃純純嘅芋頭香味，咬落一啖，先係面粉嘅清香，跟住而來嘅，係一股淡淡嘅芋香味，慢慢由喉處再滲返出嚟俾個味覺細細欣賞，感覺非常美妙。。。。

難怪強哥對依個包包，贊不絕口~~~

我一世人都對甜食麻麻，所以最鐘意食嘅，係香噴噴嘅甜肉包。

其實煮餸主要都係咸味為主，甜味為輔，雖然個肉叫「甜肉」，實情只不過係咸中帶甜，因為人嘅口腔好易被糖份欺騙，有佐甜味嘅咸餸，會令到成味餸感覺上更為鮮美，所以煮葷菜，俾少少糖份，係絕對地會令到味餸菜添色不少。

好似依款鹵肉包，面皮嘅香軟加埋餡料嘅咸香，配以面粉微甜嘅感覺，一啖咬落，真係比叉燒包加佐臭粉後誇張的鬆軟，總來嚟得吸引得多。。。。

酒樓嘅叉燒包同我自己整嘅鹵肉包，我一定會選鹵肉包。。。。

以前依個餡，我會用荽莤去配搭鹵肉，但依次我轉佐用香蔥，我發覺用香蔥更好，有一股蔥嘅香味之餘，蔥只有錦上添花之勢，係唔會喧賓奪主地搶去肉嘅鮮味，以後，我再整鹵肉包，都會用蔥去配搭。。。。

一次整十幾個，擺入雪櫃，可以食好幾日哩。。。

尋晚同強哥外出撐檯腳，食飯之前周圍先行一轉，走去買啲小食返屋企，每次見到琳琅滿目的小食擺埋一堆嘅時候，意志力係最低薄的，忍唔住手，依樣一啲果樣一啲，最開心嘅事，莫過於此，殊不知，將師奶本色盡顯無遺。

再行前少少，又到一間老字號餅舖，整餅師傅都有返咁上下年紀啦，再過多幾十年，唔知依類傳統手工作坊，總有無得延續我啲嘅口福咧。

最愛係燒餅，香噴噴豆沙燒餅係我最愛，點會放過熱辣辣即見即食機會~~

即刻整返兩件同強哥一人一件，先嚟個飯前小點~~

 

心諗如果將里頭嘅豆沙轉成我阿媽整嘅芋蓉，燒餅嘅味道一定更加完美。