今日新聞指，廣州電視台因應上級部門要求，為配合亞運嘅舉行，調整廣州形象，全線節目要求改以普通話播出。
再一例證實，中國人的「言語自由權」係徹底地被剝削的。
地方語言係本地文化的最直接表現，如果地方執政者係其它地方人士，不諧粵語，對粵語無特殊感情，以小部份人，用個人狹隘的思想境界，去否定一种幾千年積累落嚟嘅文化精髓，進而對自己所不熟悉的事物一律抹殺，咁同一個劊子手有乜分別。
一個民族所以得以傳承，得以區別，得以存在，最主要嘅因素，就係佢有無自己嘅文化存在緊。做為當權者，連容納百川的胸襟都欠奉的時候，實在唔敢奢望佢哋可以明白到文化係需要一种百花齊放的態度去傳承俾後世子孫，先至唔會令到一個民族徹底地淪陷乃至消失。
諗返今日嘅香港一代，除佐身上嘅名牌，口中嘅最潮，手中嘅最爆，剝開依一切之後，可以發現，佢啲係一無所有，空空如也，不知所謂，做一日人，過一日辰，歸根究底，最主要原因，就係根本無一種健康的主流文化去引導所致。
經常聽到一代不如一代，實情確實如此，一個根本係裝滿佐草嘅頭腦，如何能夠有足夠嘅能力去教育，甚至去影響下一代可以有更出色嘅表現，因此，我悲觀地預測，等待未來嘅人類，將係一個面目全非，人人如白癡，生活係高科技環境下的精神弱智。
牢騷發完，講返主題。
~~~~~~~~~~~~~~~~~~~~~~~~~~~~~~~~~~~~~~~~~~~
之前一日，食凈一碟仔豉油雞。
食凈嘅豉油雞，再蒸過會變得淡而無味，所以，就用少少薑蔥爆香個鑊，再倒入少少甘筍切片炒一炒，最後倒入食凈嘅雞，落豉油俾味，起鑊前倒入一大扎嘅蔥段，又係香噴噴嘅一碟餸啦。。。
懶得洗多個碟，直接原鑊上檯~~~
近排都係蒸飯多，程度快過用電飯煲好多。。。
蒸出嚟嘅飯粒粒分明，口感煙韌。。。。。
食凈少少白菜仔，一個擺到變腍嘅青椒，一半截仔甘筍，全部切一切，加埋用蠔油炒埋，又係一大碟，清甜又惹味。。。。。
兩餸一飯，雪櫃清哂，舒服~~~
有網友問返，我點樣儲存用凈嘅食材，同大家分享下我自己嘅做法。
通常我會用一張廚房紙包住佢，然後擺入保鮮盒或者袋入邊，放入雪櫃最底果層，無咁凍嘅果層，可以保鮮得極好，我試過擺放一個星期都無問題。
因為好多材料都只不過用一部份，凈返嘅掉佐好嘥，所以咁處保鮮保存，幾時用都無問，最緊要，係一啲都唔會浪費。
下圖係一截仔甘筍同半邊青椒。
蔬果類一次食唔哂，最緊要係無濕水保存，要用嘅時候再清洗。
薑啊蔥啊荽莤等，都可以咁樣處理。
額外想提一提，廚房紙同抹手紙，我會分開使用，因為抹手紙嘅紙質同消毒嘅處理方法都不如廚房紙咁多功夫，所以用係吸油或者食物接觸嘅作用時，我係唔會用抹手紙去處理嘅。
因為我知道好多家庭會將抹手紙同廚房紙混用，其實唔係咁好㗎。
沒有留言:
張貼留言