瓜菜一餐---涼瓜炒蛋、芥蘭炒肉碎

熱天都係食清淡啲好~~~

買佐斤芥蘭，唔係成條灼熟，而係炒。

由細阿媽就教過我，芥蘭一定唔好用蒜蓉炒，芥蘭加埋蒜蓉會好臭，炒芥蘭一定要配薑，少少酒，鹽，少少糖，咁樣炒出嚟嘅芥蘭就一定會好好味。

我總落埋少少肉碎，炒芥蘭，比白灼，多佐好多滋味，同埋爽口好多㗎。。。。

要先炒腍芥蘭骨，最後先炒葉，所以我切好嘅芥蘭會分開擺~~

記得啦，炒芥蘭，最佳拍檔就係「白酒、糖、鹽、薑絲」

 

涼瓜炒蛋。

強哥最鐘意食我阿媽嘅涼瓜炒蛋，佢話特別好味。

阿媽就專程嚟我度教過我煮法。

真係有少少要訣要記得㗎。

首先，涼瓜凈要表皮薄薄一層，要斜片切出嚟，入邊嘅白色厚皮一定唔要。

炒法：

1、先落少少油，爆香涼瓜片，盛起備用。

2、蛋打散，落鹽，然後將涼瓜倒入蛋液，油多少少，燒紅個鑊，將蛋同涼瓜倒入，由得火去煎到蛋略略焦黃，先翻面，再煎香另一面，咁蛋嘅香味先會出嚟。

煎成一餅餅，咁又可以食到蛋嘅焦香，又有涼瓜完全唔苦，凈係有少少香香甘甘嘅味道，會係好甘香嘅一味餸。

我失敗佐，因為屋企凈返兩隻蛋，通常要三隻蛋就最好，蛋液唔夠，炒出嚟唔夠香，而且油我唔敢落太多，炒得蛋無咁香。。。。

個涼瓜我炒嘅時候火太細，炒得太耐，變黃，唔靚。

如果阿媽炒嘅依味餸，色香味有100分，我最多得40分。

有待進步~~~

兩味餸，清清哋，幾好㗎~~~