西芹自細我阿媽就好少買嚟食,所以依家嚟到我自己,都無乜意識要買嚟食。
依排西芹好平,都買佐一包,西芹我好驚有好多粗粗嘅纖維,所以都會刨走表面嘅粗粗纖維,咁食起上嚟,會爽滑好多㗎。
咁就醃佐啲雞柳,加埋紅椒,用XO醬俾味,雜七雜八,炒埋一碟。
強哥話想食煎魚,咁就係樓下買佐包秋刀魚,最易整嘅就係鹽燒秋刀魚啦。
一包有三條,一次又食唔到咁多,就整兩條好啦。
超市無幫處理過嘅魚,所以買返嚟要自己處理。
其實處理秋刀魚好易咋。
(以下圖片可能會引部份觀眾情緒的不安,請在家長指引下觀看)
第一步:
買返嚟,衝衝水,浸浸水,好快就解佐凍一啲啲,咁就用一把剪刀,從底下,鰓果度嘅中間,剪開到魚肚一半嘅位,然後將個鰓扯出嚟,一扯,就連腸都可以一起扯埋出嚟。
鰓一定要扯走㗎,因為最污糟就係鰓啦。
第二步:
然後就用水衝乾淨個肚仔。
睇下,衝幾下,就乾乾淨淨了。
其它地方就無乜要處理啦,洗乾淨個表面,好易姐,三幾下,一條秋刀魚就搞好了。
第三步:
係個魚嘅兩邊,輕輕畫幾刀,等魚更易入味。
第四步:
落一匙鹽,均勻地抹係魚嘅全身都魚肚度,醃一個鐘。
第五步:
落少少油,煎至魚身乾脆金黃熟透。
我覺得,中國式地煎煮蒸燜炒,係優勝於西方習慣嘅烤同焗好多好多。好似依味魚,我試過焗爐焗,試過電爐烤,試過炭爐燒,綜合所有方式,都係用普通中式嘅鑊中式嘅方式煎,用嘅時間最短,煎得皮最香脆,入邊肉汁亦都保留得剛剛好,所以多數時間,我都係鐘意用中國式的方法去烹調食物,又方便又好味。。。。
因為秋刀魚本身都有好多油脂,所以煎嘅時候,落細細一匙嘅油就足夠,慢慢越煎就會有越多油走出嚟㗎啦。
區區幾個簡單嘅步驟,就整好一味香脆好味嘅「鹽燒秋刀魚」啦
所以話,整依味餸,係懶人嘅餸嚟嘅。
其實唔洗再落檸檬咩啦,就咁鹽俾啲咸味,魚本身帶有淡淡嘅果皮味,煎香之後,已經好好味㗎啦。
啲秋刀魚好肥,特別係近肚腩嘅地方,煎香之後,啲魚油伴住咸咸哋嘅魚肉,一啖咬落~~
強哥豎起大拇指「正」~~
一餐飯,話咁易~~
沒有留言:
張貼留言