下飯菜---辣炒肉碎咸酸菜、沙茶炒椰菜

買佐盒免治豬肉，都係13蚊，已經足夠整個早餐同埋一餐飯。

豬肉先用「雞蛋、薑蓉、生粉、鹽、麻油、豉油糖、酒」

醃好味。

然後將免治豬肉一分為二。

將少少椰菜刨絲。

 

一半免治豬肉，同椰菜撈勻，咁就整好一個菜肉餡。

可惜唔記得買蔥，咁就用佐少少荽莤代替加埋入去。

 

咁就整佐個菜肉餡嘅包包啦。

 

蒸佐一大碟。。。。

 

早餐蒸返熱二三個，美味~~

擺係雪櫃，食二三日都無問題。

新鮮嘅菜肉包，話咁易啦。。。。。

本嚟係想買小棠菜整菜肉包嘅，點知小棠菜都唔靚，唯有轉買椰菜，味道無咁香，不過頂住檔，都接受啦。

 

用佐一半嘅免治豬肉，另一半，搭配住其它餸炒。

係潮州雜貨舖買佐一舊咸酸菜。

 

咸菜剁碎碎，用少少薑蓉爆香鑊，少少辣椒干炒出香味，再炒散醃好味嘅肉碎，倒入咸菜炒出味道，落糖中和個咸酸味，炒到聞到香味，就可以起鑊。

因為咸酸菜本身已有咸味，所以要用少少糖去中和佢過咸過酸嘅味道，薑同咸酸菜嘅味最格，所以我會用薑蓉去爆個鑊，落佐乾辣椒，食起上嚟少少辣辣啲，最開胃。。。。

依碟小菜，如果送粥，最一流。。。。。

實在太惹味。。。。

我係預先炒好佢，咁強哥收工返嚟，食飯之前我再開火回鍋一次，個味道好似隔夜再炒返熱咁，總好味啊。。。。。

 

整菜肉包用佐少少椰菜，凈返果啲，就愛嚟同蒜蓉炒，加沙茶醬俾味，落埋凈抵嘅少少免治豬肉，又爽又香又清甜嘅沙茶炒椰菜，就搞掂啦。。。。

一餐飯，將當日買嘅材料全部利用到，一啲無浪費，又好味，又平靚正，師奶其實係最家庭當中最佳嘅統籌師嚟嘅，哈哈哈~~