晚餐之簡單小炒、早餐快速薄餅

食椒，唔係一種粗口。

而係一种健康嘅選擇。

 

依類好厚身，全無辣味嘅大椒，全身由上到下，由外至內，都係滿滿嘅維它命C嘅存在。

食一啖大椒，就相當食佐一啖維它命C㗎啦。

所以尋晚，就食椒。

兩個大椒，加埋一舊雞扒，雞扒用薑絲生粉豉油糖醃好味。

 

兩個椒，切好已經有大大一碟。

食物嘅處理，我多數鐘意以條狀現身。

較之滾刀切，感覺條狀更易入味同埋好入口。

 

洗落油將大椒炒出香味，盛起另外置碟。

倒入雞扒，煎至熟透，（無落水，乾煎）再倒入青椒略為拌炒，俾少少鹽較味。

真係可以好香好香，椒比肉更好味~~~~

買佐盒豆苗。

又買到豆腐皮。又切條狀。

兩塊早餐用嘅火腿，又切絲。

少少蒜蓉。

 

少少雞湯煮熟，清爽，好味。

愛嘅就係咁樣嘅清同甜。

多菜少肉嘅兩味小炒，搞掂~~~

 

~~~~~~~~~~~~~~~~~~~~~~~~~~~~~~~~~~~~~~~~~~~`

食飽飽飯，準備第二日早餐。

三湯匙嘅麵粉，少少乾酵母，搓成一細細舊嘅面團，再擺入個碟度，等佢發酵。

發起嘅面團，（係室溫發佐半個鐘）就咁原碟，包好保鮮膜，擺入雪櫃，雪一晚。

 

第二日早上，睇下，雪櫃入邊低溫繼續發酵嘅面團，真係發得好好。

咁樣先係室溫發好嘅面團再做低溫處理，食落會有一種煙煙韌韌嘅口感，我用嘅就係普通整中式包包嘅面粉，用整中式包包嘅方法去搓面團同發酵。

其實意大利薄餅嘅祖師，咪就係我啲中國嘅包包嚟~~

所以唔需要將薄餅複雜化，只需要將包包嘅餡擺係面，蒸改為焗，餡嘅材料稍做變化，咁就整到一個薄餅出嚟㗎啦。

 

第二朝早上，將發酵完成嘅面團，同提早一晚準備好嘅材料。

係麵團底舖佐茄汁，落少少火腿粒粒，青紅椒，甜粟，一層芝士，再舖多層台灣中式腸，最後面再舖多厚厚一層芝士，搞掂。

入爐200度火焗20分鐘。

 

衝多杯㗎啡，一個好正嘅早餐，噈咁完成~~

 

相比出邊餐廳食過一啲真係不知所謂嘅薄餅，有天壤之別~

起碼個餅底唔會好似面包咁，鬆泡泡~~~

而且自己食，當然係料足足啦
`~`

 

提早一晚準備好材料，第二朝只需做少少嘢，就可以享受到一個正正嘅早餐啦~~~~