我幾鐘意食綠豆沙嘅。不過煲綠豆沙真係幾麻煩，要煲嘅時間又長，又要睇住火唔俾佢滾瀉。
就算係用快速煲，都一定要企定定係側邊聽住，一有唔妥即刻熄火，最驚係綠豆會塞住個出汽口，一個唔覺意，爆都得啦。
不過，依家強嫂介紹一種好簡單，好安全嘅煲綠豆沙嘅方法。
做法：
1，首先將綠豆洗乾淨。
由阿媽傳落嘅傳統，我屋企煲綠豆沙都會落少少糯米，所以洗綠豆嘅時候，順便落埋少少糯米落去。
2，用屋企嘅「暖水壺」，將洗凈嘅綠豆倒入去，然後再倒入剛剛煲好嘅滾水入去，水量浸過綠豆面少少就得，唔好太多水，因為綠豆會發大。
3，然後就將綠豆浸過夜，或者早上返工之前浸落，咁晚上收工返嚟，就煮得啦。
其實依個煮法，係類似「真空煲」嘅原理，用暖水壺嘅保溫效果，去焗住入邊嘅綠豆，等綠豆變腍身。
好多年前讀書要住校嘅時候，晚上就會落少少一扎米同滾水入保暖壺，咁第二日早上起身就有一煲粥食㗎啦。以前用嘅保暖壺係入邊係水銀壺果啲好傳統嘅壺，基於安全考慮， 依家市面都無佐果啲保暖壺，都係用嘅全不銹鋼嘅壺啦，雖然材料唔同，不過個原理係一樣嘅，睇下，焗佐一晚嘅綠豆，一摸，已經係好腍身㗎啦。同埋糯米，已經腍到開佐花咁，如果落嘅唔係綠豆係米，依家已經變成一壺粥水，食得㗎啦。
4，因為凈係焗佐一晚嘅綠豆未夠沙，所以要再開火，加返熱，煮個十分鐘左右，就全部爆開變成綠豆沙啦。
我就浸佐少少海帶，煮嘅時候，先掉海帶入去一起煮。
煮佐十分鐘左右，啲糯米已經全部融佐入綠豆沙入邊，再落埋片糖俾味，綠豆嘅清香同埋沙沙嘅口感，融佐嘅糯米增添佐一份滑滑嘅感覺，煲一個綠豆沙，就咁簡單~~~
唔計焗住嘅果一晚時間，實際開火煮嘅時間，都只不過係十幾分鐘度，個保暖水壺嘅保溫性越好，焗出嚟嘅綠豆就越腍身㗎啦~~~
依家煤氣費咁貴，咁樣嚟煮綠豆沙，可以慳返唔少㗎~~
希望可以幫到你啦~~~
（同樣做法，適用於煲粥，只需要將綠豆轉成米，焗一晚，第二日一早，再擺入煲滾返幾下，就變成好滑嘅粥啦）
~~~~~~~~~~~~~~~~~~~~~~~~~~~~~~~~~~
前晚嘅晚餐，買佐舊牛柳。
切粗條狀，用牛肉嘅燒汁去醃佢。加埋少少薑絲。
然後就用蒜苗去炒，簡單又好味~~~
（不過我都係鐘意牛展果種爽嘅口感多啲）
木耳多食有益。用木耳炒碟油麥菜，清爽~~~
搞掂~~
沒有留言:
張貼留言