升級版蕃茄湯+豪華版蕃茄蛋

 升級版蕃茄湯：

因為除佐蕃茄，總落佐「蘋果一隻、紅棗杞子少少、雪耳少少」

先用依啲材料做個湯底。

做法：

1，先將蕃茄係煲度炒溶，蕃茄一加熱就好易炒溶㗎啦，先將蕃茄炒散，可以令啖湯嘅蕃茄味更濃。

2，然後落其它材料落煲度，加水滾半個鐘左右。

其實依個算係滾湯嚟嘅，唔洗煮太耐，半個鐘左右足夠。

3，最後將蘋果等雜物撈起，將搓好嘅肉丸放入湯度，肉丸一浮起可以熄火食得`~~

 

蘋果太甜，我落佐三分二個就足夠甜味，依啖湯，酸酸香香，好開胃㗎~~

老公話，好味過羅宋湯添~~

 

本嚟係諗住整個蕃茄蛋嘅，點知免治豬肉買多佐，加上前幾日係網友度睇到佢整蛋角，自己好多年未食過，細個時阿媽無乜煮意時，就會整一碟蛋角，包保大人細佬都鐘意，咁依日，我又嚟懷舊下細個時媽媽嘅味道。

咁就整佐一個「豪華版嘅蕃茄蛋」，因為個蛋，由蛋餃所制。

兩個人，唔洗整太多，用佐三隻蛋。

做法：

1，蛋落少少胡椒粉同油少少少少鹽俾味，然後將蛋打散。

 

2，免治豬肉就普通咁醃法，用糖生抽生粉水薑蓉蔥蓉撈勻味道。（豬肉要攪至起膠）

一般嚟講，一碗蛋液，一碗肉，一個平底鑊，已經可以煎到。煎法好簡單，係平底鑊倒一大湯匙嘅蛋液，略略煎定一個圓型，然後抿少少肉上去，一返一半過嚟，就變成一個半圓蛋餃，再細火煎熟入邊嘅豬肉就可以。

豬肉最好抿薄啲，咁先至容易熟透。

 

細個時見過阿爸阿媽配合煎蛋餃，總得意，用一個大勺，落少少油，係煤氣上加熱，然後倒一湯匙蛋液，轉一轉個勺身，等蛋液均勻地沾係勺上形成一個漂亮地圓形，趁總有少少生蛋液的時候，放肉上去，用筷子一返過去，就變成一個漂亮地餃子形，然後再擺入鑊度，阿媽慢慢煎返熟佢。

咁樣整有一個好處，隻隻蛋餃都可以保持係一樣嘅形狀同大細。

影埋相，俾多一個製作嘅方式大家參考下。

 

然後嘅做法，就好似蕃茄蛋咁嘅做法啦。

 

我通常會先將蕃茄炒散，因為蛋餃已有咸味，所以依個蕃茄，凈要甜酸味，所以炒散蕃茄後，我凈係落多少少白醋增加酸度，少少白糖，咁就較好味啦。

 

跟住將蛋餃倒入去，一起炒炒入味，裝碟~~

 

係要咁樣甜酸新鮮嘅蕃茄味，配上煎得香香嘅蛋餃，味道先至係一流中嘅一流~~~

強哥原來係第一次食蛋餃，食到佢，停唔到口~~~~

咁鐘意食，以後再整過，有幾難。

 

奶奶俾嘅魚塊總有少少，加埋脆肉瓜又炒埋一碟，又係好豐富好滿足嘅一餐~~~