香噴噴胡椒沙葛肉丁包（食譜）

又到強嫂整包嘅時間。

因為早幾日整佐一次饅頭，留有少少麵種，所以今日雖然天凍凍，都係繼續用曬啲麵種佢。

麵種係咩？麵種即係上一次整包，發酵完成之後，我留返一細舊嘅麵團，擺入雪櫃，可以擺半個月左右，半個月之內，再用少少暖水加麵粉開返個面種，就又可以做發酵用，再整包包啦。

用麵團培養出嚟嘅麵種，有普通乾酵母無嘅香味，而且整出嚟嘅包包，口感上有少少煙韌的感覺，唔會好似泡打粉整出嚟嘅包包咁，鬆泡泡，好似食緊綿花糖咁，好恐怖。

睇下，整佐一大碟嘅包包。。。。。

 

整佐兩款包包，一款係甜嘅，一款係咸嘅，有濃濃嘅胡椒味，加埋沙葛爽爽脆脆，非常惹味㗎~~

 

原本係想整臘腸卷嘅，不過買餸返嚟，係「裕記」門口見到有新鮮到嘅沙葛喎，即刻買佐一個返嚟，一個大大個都係兩蚊個咋。

好新鮮好多汁，我就咁生食，都無起渣添~~~

沙葛皮可以用手就咁剝開~~~

我將佢切成粒粒，整包包。

 

依個沙葛胡椒肉丁餡嘅做法好簡單。

1，先將肉炒散，落豉油糖胡椒粉俾味。

 

2，熄火後，倒入切好粒嘅沙葛，蔥粒、浸腍嘅粉絲，可以試下味，唔夠味可以落少少鹽，沙葛本身有甜味，唔洗落太多糖，最後記得，落多啲胡椒粉落去，辣少少都唔緊要，驅寒嘛，而且沙葛同胡椒嘅味道，係最格㗎，唔信你整次嚟試下~~

粉絲我應該用韓國薯粉，粗身果啲會好啲，因為粉絲太幼，食唔太出粉絲嘅存在，下次改進。

咁就整好個餡啦。

 

用佐半斤左右嘅面粉，發成大大一團。

我發現，以前貪心，發得過大，咁發得太大，食起上嚟，就會鬆泡泡，所以依家我就唔會發得太過份，見佢發起至倍大即可。

因為天凍，所以我會將搓好嘅面粉擺入有暖水的鑊入邊發酵，速度會快好多㗎，我發佐半個鐘左右就發好啦。

一開始講過嘅「面種」，其實就係下圖嘅依個發好酵嘅面團，如果我下次要再整，可以依次就留返一舊仔面團，咁下次就可以再用返當酵母用。

不過唔想依排食得太密，所以下次再要整，都係用返乾嘅酵母啦。

 

將面團分割成細份，我每個包包都會落好多餡㗎。

因為面團本身有彈性，所以包嘅時候，一邊包一邊將餡塞入去，儘量包多啲餡，咁先至好食嘛~~~

包佐十幾隻，有甜有咸~~

蒸佐十五分鐘，發得剛剛好。。。。

 

依次整包包，真系好香好香。。。。

 

包嘅皮好有彈性，好香嘅面筋味，一啲酸味都無，而且，香噴噴嘅胡椒味加埋沙葛嘅爽甜，俾到足足料嘅餡，一啖咬落去，正~~~

強哥收工返嚟，我去炒菜，先塞一個包包俾佢咬住先，強哥都係第一次食依個餡嘅包包，一試，即刻贊「正」~~

我都係第一次整依個餡，以前都係阿媽整俾我食，依家自己整，都好有阿媽嘅味道~~~

遲啲俾個電話阿媽，話我整到佢嘅味道啦~~~

沙葛胡椒肉丁包，你都試下~~~

另外，上次提過嘅果款包包~~~

好多人都估中佐啦~~

個餡就係「年糕」啦`~~~

切成粒粒嘅年糕，愛嚟做餡，原來效果係咁好喎~~~

就咁四方形包起佢~~~

 

蒸好後，依然都係得出四方形㗎~~~

年糕加熱之後會變得好軟身，軟軟糯糯嘅口感，配以外邊鬆軟嘅包皮，非常非常一流~~~

所以依次再整包，都整多幾個嚟食，超好味，下次整埋俾阿媽試下~~~

 

哈哈哈，所以，個答案，就係「年糕」~~~

補充下，我用嘅麵粉係街市雜貨舖都可以搵得到嘅。

如果蒸出嚟嘅包包好黃，好大機會係因為包包發酵過度，下次縮短發酵時間試下情況有無改善。

 

整包包嘅基礎，係整饅頭，可以參考我另一個整饅頭嘅文章，入邊有介紹我係點樣整饅頭嘅，如果饅頭整到啦，包包都絕無難度啦。

全手工制饅頭