依家天氣真係反復得好變態。
又會一夜之間，變得咁鬼凍嘅。
同老公預先講定佐，假設真係發生咩不可預期嘅天災，所有通訊方式亦都截斷佐的情況下，約定佐係屋企附近一個比較空曠的地方等待彼此，我亦都係屋企最當眼嘅地方擺佐一個細細嘅「救生包」，里邊擺住「兩支食水，少量乾糧，應急藥品，少量現金，電筒，收音機，」慎防有咩意外發生時，一拎就可以走人。
近排頻頻嘅地震新聞，真係令人好無安全感。
無論點都好，防患於未然，係必要嘅。
~~~~~~~~~~~~~~~~~~~~~~~~~~~~~~~~~~~~~~~~
雪櫃有一條皺曬皮嘅蘿蔔，咁再買多盒豬骨，加兩條甘筍，少少杞子紅棗，幾片薑，就咁煲啖湯水飲下。
好香好清甜~~~
上次屋企串燒，凈有啲雞亦。
都要處理佐佢。
先用少少生抽糖酒醃一醃佢。
然後凈鑊，唔洗落油，就咁干煎雞亦至表皮略見焦黃。
煎好雞皮，都大約有五成熟啦。
然後原鑊落啲蒜片同薑絲爆出香味。
屋企凈有一個大大隻薯仔，切埋，再切少少甘筍，配住嚟煮，都有大大一兜。
因為我個煲直接可以上火煮，所以我就將所有材料擺埋入兜，落上上篇文章提過嘅果支「紅燒汁」一大湯匙，少少酒，水，煮十五分鐘，搞掂。
我之前果個中等大嘅瓦煲洗碗時唔小心撞爛佐，剛準備買返隻，星期六返奶奶度食飯，奶奶俾佐依隻煲仔俾我，佢都係人啲送俾佢嘅，不過佢見係玻璃唔敢用，咁就再送俾我，哈，真係開心，咁就唔洗再買啦，依個都可以代替用到。
而且幾好用喎，佢聚熱能力好勁，熄佐火，個湯汁都總係度繼續滾佐好耐，幾好用。
我係下晏預先煮佐十五分鐘煮熟佢嘅，咁浸佐一個下晏，晚上食飯再開火熱返佢，入曬味，好好食啊。
而且開大火，一樣可以做到收汁，令醬汁結稠嘅效果，濃濃嘅薯仔汁愛嚟撈飯，一流啊~~
一個湯，一煲薯仔雞亦，凍凍嘅天，暖暖嘅餸，舒服~~
湯又煲好，餸又煮好，我見無咩事做，咁就搓面，蒸幾個饅頭仔俾老公夾花生醬練奶，做第二日早餐。
少少面粉，三幾下就整好，天氣凍，發佐好耐先發好，不過都叫發得幾靚，啲饅頭發得好靚，同埋好香啊~~~
切饅頭嘅邊邊角角位，見唔靚，就搓佐兩個包包。
估唔估得到係咩包？
我天馬行空地發揮創意，整佐咁樣嘅包包出嚟，原來效果咁好喎，無論係口感定味道，都非常非常一流啊~~~
下轉專門整一次依個包，到時再揭曉，個餡，係咩~~~
有無人就咁睇，可以估得到咧？
提示下
係甜味嘅
雖然睇落似蓮蓉豆蓉，不過可以好負責地話俾大家聽，唔係，唔係豆類~~
再睇下個包嘅形狀，點解切開可以係四方形咧？
究竟，個餡係咩嚟嘅咧？
哈哈哈。。。。。
沒有留言:
張貼留言