廢物再利用之春卷皮包乜乜乜

晏晝強哥話返嚟食飯，無準備無材料。

雪櫃食凈幾張買新鮮春卷皮，擺係雪櫃兩三日，再唔整嚟食又係要掉㗎啦。

咁晏晝就搞掂埋果幾張皮。

平時包春卷，我會用「芽菜、木耳、肉碎」依類料，咁依家屋企得啲乾貨，為佐增加口感上嘅青春感覺，我見雪櫃有幾朵西蘭花，咁就切佐個頭落嚟。

刨走佐外皮嘅粗纖維，將心切成條狀。

睇下，西蘭花頭切絲，甘筍切絲，浸少少木耳，一扎粉絲，少少免治豬肉。

分別炒熟佢哋，幾豐富，咩顏色都有，睇落好開心嘅色彩~~

擦一層甜醬係底，然後舖上自己鐘意嘅材料，卷起包好。

好大一個啊。。。。

將佢一開二~~~

不過隔佐夜嘅皮，真係無咁好食啦，都係新鮮買返嚟即整即食要好味啲。。。

咁耐我唯一發現係油麻地嘅一間地舖，有依款春卷皮賣~~~

買十蚊雞嘅春卷皮，已經多到一次食唔哂~~

凈返果啲材料，加上魚露炒埋，小菜一碟~~

碌個面仔伴食，搞掂~~~