再接再厲之「炸饅頭圈」（下集）

上回講到，炸完糯米團之後，凈返有少少麵漿。

咁棄之認真係可惜，留低絕對有計仔。

順勢，落多幾匙麵粉，俾多少少酵母粉，少少蘇打粉，少少牛奶，然後將佢搓成一個麵團。

（落蘇打粉，係因為要低溫發酵一晚，時間稍長，酵母長時間發酵會形成酸味，所以要落少少蘇打粉嘅緘性去中和返個酸味）

無需搓得好光滑，形成一個麵團即可。

搓好後，無需等候，直接將麵團壓成一大塊麵餅，然後用適當工具，將佢壓成一個個圓圓圈。

工具嘅選擇隨意，總之一大一細兩個圓已足夠。

將麵粉用盡，搵一個大碟，灑少少乾粉，將壓好嘅麵圈擺上去。

係室溫當中，發酵一個鐘，然後擺入雪櫃一晚，第二日早上再取出即時可用。

睇下，係雪櫃低溫發酵佐一晚嘅麵圈，發起好大啦~~

又係好簡單地，用低溫將麵圈炸至金黃浮起即可撈起，一個都係炸分兩鐘足夠~

食用時，淋少少練奶伴食~~~

其實炸嘅時間真係好短，幾分鐘就炸好全部~~~

咁就又一個早餐搞掂啦~~

因為係發酵佐一晚，所以麵團非常鬆軟，而且因為有蛋嘅緣故，食起口感好鬆化，徘徊於麵包與饅頭之間嘅鬆軟程度，炸得香噴噴，伴以香甜嘅練奶同食，非常一流~~