住家餸---酸辣炒蓮藕丁

上個星期日傾盆大雨之下，邊度都懶得去。

連落去樓下買啲餸都懶。

又唔想食公仔面。

雪櫃凈返二棵娃娃菜，加少少煙肉同佢炒埋一碟，開多罐午餐肉，一個罐頭湯，都叫有餐飯食下。

加埋煙肉，清清甜甜，有碟菜食下`~~

煎午餐肉，食多無益，唔食又好壓抑~~~

罐頭湯~~

好滿足㗎啦，落雨天時唔洗出街都有飯有餸~~

~~~~~~~~~~~~~~~~~~~~~~~~~~

前日，買佐幾截仔蓮藕，好嫩㗎，唔係好大粒，愛嚟炒就最好味。

炒一個好惹味嘅「酸辣炒蓮藕丁」

蓮藕切細粒浸住水，等佢唔會變黑色。

凈有半載甘筍，掉埋落去。

其它味料有「薑蓉、蒜蓉、干辣椒」

做法：

1、落油爆香「薑蓉、蒜蓉、干辣椒」

2、倒入甘筍同蓮藕，拌炒二分鐘左右。

3、落少少豉油整色整水

4、落少少鹽同醋同砂糖較味。

5、略拌炒一分鐘之後熄火起碟。

因為醋遇熱會揮發，但如果太遲落又唔入酸味，所以要落佐醋之後再炒一炒入味，要預佢會揮發啲酸味，所以醋嘅份量要稍多少少。

我用不銹鋼鑊去炒，所以啲蓮藕唔會變黑，如果用生鐵鑊去炒，啲蓮藕同鐵銹產生化學作用，會變黑麻麻，唔靚~~

同大部份蔬果可以生食一樣，蓮藕生生哋食都無問題，所以唔洗炒太耐，要保留佢果份爽脆嘅口感。

甜甜酸酸，香香辣辣，咬落脆卜卜，勁惹味嘅一碟餸~~~

強哥收工時，外賣盒燒鴨返嚟。

開得飯啦~~~~

好難得係都市見到彩虹~~~

前日望到啊。。。

好靚~~