沙嗲豬扒意（食譜）

尋晚預先整好粉漿，今日早餐煎餅仔。

尋日收拾廚房，將超過幾年無用過嘅嘢一氣解決佐佢啲，如果一樣嘢咁耐都無用過，就表示佢嘅存在形同虛設，可以放手讓它走~~~

其間俾我搵到一個心形嘅模型，煎蛋煎餅仔都可以用得著呱，咁就可以留抵，今日煎餅仔，用佐果個模型，煎佐幾個心形餅仔~~~

粉漿我落得厚佐啲，好難熟，下次要再練習過~~~

知道依幾日會有大雨，所以星期日同強哥拖架車仔出去買佐好多物資返嚟，以備不時之需，所以依幾日就算落大雨唔想去街買餸，都有得食物可以煮~~~

尋晚，用佐盒豬扒，整佐一個好好味嘅「沙嗲豬扒意」~~~

早上先醃好味。

準備醃料：

「洋蔥、生粉、生抽老抽、糖、少少鹽、咖喱粉、炒香芫莤籽粉各一匙、清水」

豬扒用刀背拍鬆

同醃料充份混合

擺入雪櫃，醃六七個鐘等佢入味~~~

晚上食飯之前，烚一朵西蘭花，跟手烚熟意粉。

意粉烚好之後，熱鑊落油，爆香大量蒜片，倒入意粉，落印尼甜豉油膏炒好味道。

意粉快將炒好嘅時候，將豬扒落煎PAN，兩邊各煎三分鐘。

豬扒快醬煎好時，擦一層用油同甜豉油膏混合嘅醬汁，再開大火煎至汁稠上色~~~

兩邊齊開工~~~

三幾下工夫搞得掂~~~

將炒香嘅意粉擺碟，面再舖多塊豬扒，淋多一大湯匙「印尼沙嗲醬」，撈勻食，香噴噴，無得頂~~~