見好耐無食過馬拉糕，咁尋日下晝就即刻整底出嚟啦。
心思思又搞搞震，唔想蒸，想睇下焗嘅效果。
咁又唔想開焗爐喎，咁就直接擺上火去燒。
咁就搵果個比較「易清潔」嘅玻璃碗去焗啦。
馬拉糕嘅粉漿做法可參考以下網址「馬拉糕做法」
不過我依次好隨意㗎，無磅啲材料，係咁隨手落份量，主要材料「低筋麵粉一細碗仔、糖幾湯匙、牛油一湯匙、蛋兩隻、發粉一細匙、梳打粉二粒米大咁多多」
因為太結，總落佐啲水，等粉漿稀啲。
就咁隨意，撈好嘅粉漿擺係室溫發酵一個鐘。
然後碗抹一層油，將發好嘅粉漿倒入去，上火燒25分鐘。
焗好啦~~~
真係。。。。。。
痴到阿媽都唔認得啊。。。。
不過應該睇得出，發得幾靚啊，全部呈蜂窩狀~~~
所以我點解一開始要用依個「易潔潔」嘅碗去焗依個點心咧，咪就係因為考慮到可能發生嘅狀況而做出咁嘅決定囉~~~
玻璃碗真係好，浸下水就洗得乾乾淨淨，好似咩事都無發生過咁~~~
雖然個底係痴佐啲，不過上層嘅糕點，食落依然係咁香嘅，而且口感同我想像中嘅效果係一樣㗎，相較於蒸嘅馬拉糕，佢更乾身，而且充滿彈性，加埋黑糖嘅香味，今日早餐整返熱佢俾強哥食，強哥總以為「咦，咖啡味㗎，好香啵」~~~
下次都係咪咁懶，一於轉用焗爐去上下火焗，效果必定更好~~~
衝杯咖啡伴食，一流~~~
~~~~~~~~~~~~~~~~~~~~~~~~~~~~~
尋晚食韭菜花。
又加埋甘筍絲一起炒。
有網友問我，點樣切得啲甘筍絲咁齊整同幼身。
通常我會切一截仔甘筍出嚟，去皮之後，用一個果皮刨，如下圖所示咁，先橫切一片片出嚟。
咁樣就可以得到全部一樣厚度嘅甘筍啦。
然後再將切好片嘅甘筍，搭埋一起，再豎切，咁就成為好均勻嘅一條條甘筍絲啦。。。。
咁樣切法，速度又快，出嚟效果又靚㗎~~~
但係咁樣切法嘅甘筍絲較為幼身，不宜炒得太耐，所以炒餸之前，略略先用油炒幾下就裝起，等所有其它材料炒好之後，再放返入鑊兜幾下就可以上碟啦~~
有時我鐘意食粗條啲嘅甘筍，會比較有口感，咁就要用手工去切先得啦~~~
五花腩炒韭菜花~~~
買佐一條五花腩，切佐肥嘅部份先炸出油，再用炸出嚟嘅豬油，愛嚟同韭菜花一起炒，豬油炒韭菜，永遠最美味，只需簡單地俾啲鹽去調味，已經可以食到最天然韭菜的香，同甜~~~
買佐兩條節瓜，之前滾湯用佐一個，凈返一個。
尋晚用一扎芫荽，加埋少少魚肉燒賣，配埋滾一個湯。
芫荽加埋落湯度，真係啖湯會變得份外清香~~~
一餐好簡單嘅飯餸~~~
沒有留言:
張貼留言