「食譜」南乳粉蒸排骨、涼拌西蘭花

上個月強哥剛剛CUT佐份保單，已經買佐都成十年時間，退佐其實真係覺得好嘥。但係發覺到原來內里包含嘅所謂醫療保險同埋儲蓄人壽險，其實另有乾坤，同初買時嘅美好願望係根本大相逕庭，發覺貨不對版之後，果斷斬纜。

其實退保嘅其中一個主因，係跟單嘅agent根本無心跟進，因為佢都係接手其它人強哥份單，所以應該就無啖好食，因此佢嘅無心裝載與敷衍態度，亦都可以理解，不過其實如果佢當時積極少少，真係俾多少少少少嘴頭，解釋清楚一啲好基本我哋需要知道嘅問題，強哥根本唔會CUT單，好大程度，係佢嘅敷衍態度令到我啲真係無信心繼續落去。

買保險其實係對屋企其它人嘅一種負責態度，所以我係好認同需要有一份醫療保障俾自己同屋企人，早排睇到新聞，指政府會推出自願醫保計劃，覺得真係合時，同埋都覺得好有咁嘅需要。

我覺得係要咁樣先會形成一個健康並長遠嘅醫療制度去保障我啲可以得到更高質素嘅醫療環境，同埋依個醫保最新推出之際，頭半年購買嘅人，都可以終身享受保費七折優惠，算埋落嚟，保費都絕對平過出邊嘅保險公司好幾倍，如果計埋有退稅優惠，總抵玩啦。。。

~~~~~~~~~~~~~~~~~~~~~~~~~~~~~~~~~~~~~~~~~~~~

今日早餐，整佐兩件厚切方包，煎滑蛋，兩塊漢煲扒。

早晨全餐。。。。

我自細唔鐘意飲奶，不過依家都開始要飲返啲奶，但係飲一杯就瀉一次，唯有希望我個腸胃儘快適應佢啦。

用奇妙醬代替牛油，味道又香又開胃，比食一大啖油，點都好好多啦。。。。。

因為係厚切方包整嘅，原來半邊都咁鬼大份，要強哥幫幫我手先食得哂。。。。

 

晚餐食肉。

排骨先用少少酒同糖，豉油少少，生粉水醃一醃味。

蒸肉粉係荃灣行街見到即買，內附兩包醬汁。

按說明書，將兩包溝埋。

然後排骨同粉撈勻，醃味一個鐘。

荷葉半塊，拖拖水。

荷葉擺入蒸籠，底下舖薯仔。

然後將醃好味嘅排骨舖上薯仔面。

快速煲煲二十五分鐘。

腍哂。。。。

啲粉同排骨都煲到軟綿綿，超好味啊。。

排骨味道正好，唔會太咸，又有香味，係啲粉稍嫌咸佐啲。

不過南乳味，真係超正。。。。。

最好味，係底下嘅薯仔，縮哂肉汁，無得頂啊。。。

死啦，上次隨便見到就買，下次想搵返唔記得係邊條街買嘅添，個味道真係唔錯㗎，下次再去荃灣好好搵一次。

一件排骨，已經可以送埋成碗飯咁滯。。。。

正！！！

 

整埋一味涼拌西蘭花。

煮好後過冰水。

咁會食起上嚟爽脆好多。

涼拌汁好簡單「蒜蓉、麻油、花椒油、雞粉、鹽、清水」

撈好，然後撈入西蘭花度，搞掂。。。。

清清哋，好食得到西蘭花嘅清香同甜味。。。。

好滿足嘅一餐飯。。。。

 

 

 

 

洋蔥與雞尖尖、肉碎加芥蘭粒粒

街市多數會見有紫色同白色兩種洋蔥。

我個人就覺得，紫色洋蔥會多汁同甜啲，不過洋蔥味就淡啲。

白色洋蔥就吭啲，不過味道會濃郁好多。

各取所好，我有時買紫色，有時買白色嘅。

除佐味道，總有口感。

洋蔥唔同切法，炒好後會有唔同嘅口感㗎。

有無發覺洋蔥其實會有一條條嘅坑紋，如果打橫嚟切，即係切成一個圈一個圈果個款咧，炒起上嚟，口感會脆啲。。。。

如果係順紋嚟切咧，炒幾下就會變得好腍啦~~`

咁鐘意腍啲定係脆啲，甜啲定係味重啲，就憑個人喜好去選擇。

今晚炒佐兩味餸。

尋日凈有啲啲梅菜同肉碎，先炒香佢哋，落一匙沙嗲醬俾味。

然後倒入切佐粒粒嘅芥蘭，適量薑絲，炒熟即可。

沙嗲醬同梅菜都已經有味，無需再額外俾鹽。

好惹味嘅一碟炒芥蘭。

上次買佐少少雞亦尖，準備整鹵水拼盤，鹵水無整到，凈返啲亦尖，多又唔多少又唔少，咁就一於同啲菜炒埋一碟。

先炒香啲青椒洋蔥甘筍。

然後再將事前醃好味（豉油糖酒）嘅亦尖同薑絲細火煎熟。

煎至兩面金黃之後，落少少水，少少甜豉油，炒熟。

最後倒入配菜拌炒幾下，裝碟~~~

簡單又快手。。。

總好香添。。。

兩味餸一碟飯`~~

 

 

「食譜」電磁爐整煲仔飯+蕃茄雞蛋麵疙瘩

買有光波爐嘅網友應該都好熟悉依款跟爐送嘅「廚寶」

光波爐個玻璃大兜依家已經變成魚仔嘅屋企，哋配件都俾我遺忘得七七八八，今日掃一眼見到個廚寶，覺得廢置係度好嘥，諗一諗可以點用。

多手試下擺上電磁爐，哈哈，原來得㗎喎，咁用得就無嘥啦。點都可以發揮佢嘅作用嘅。。。。

咁晏晝，就一於用佢整一個煲仔飯出嚟。

相較用明火，電磁爐控制火候同時間都更為精準，所以我好有信心整到心目中嘅煲仔飯。。。。

晏晝我幾乎唔食嘢，凈係整俾老公食，咁就煮佐一杯米，水就同電飯煲嘅比例差唔多，先開中火，一分鐘左右水就滾起。

個廚寶係有蓋㗎，煮嘅時候，當然要蓋住個蓋㗎啦。。。。

水滾後，熄細火煮五分鐘。

煮夠五分鐘，開蓋睇下，基本收佐水，咁就沿邊邊淋一圈仔油。

跟手擺埋預先整好嘅梅菜肉餅係飯面，洗佐幾條介蘭苗，懶得另外淥熟，一起擺埋入去焗熟佢。。。。

繼續細火煮多十分鐘左右。。。。。

唔揭蓋，熄火後由得佢再焗多五分鐘。。。。

好啦，時間到。。。。

當當當。。。。

已經聞到香香嘅飯焦味啦。。。。。

淋啲甜豉油上面，強哥見到有梅菜肉餅飯，已經開心到不得了。。。。

再加埋係香噴噴煲仔飯添喎。。。。。

正，真係有飯焦㗎。。。。。

底下有飯焦，面啲飯就軟綿綿，香噴噴肉餅，一流嘅午餐，話咁易啦。。。。。

電磁爐整煲仔飯，掂~~~

~~~~~~~~~~~~~~~~~~~~~~~~~~~~~~~~

今晚強哥要開夜，得我自己一個食飯。

唔想食公仔麵，又懶得煮飯。

突然俾我醒起，一款北方嘅麵食，我聞名已久，但就未曾試過，知道個做法唔係好難，而且食材雪櫃都有齊，咁就一於整返依味北方最家常嘅麵食「蕃茄雞蛋麵疙瘩」

因為係第一次整，對於份量都係自己試下試下。

邏輯分析過所需份量得出嘅可能性，咁就有佐以下嘅份量：

因為係自己一個人食，麵粉煮好後嘅份量會比實際要顯得多，所以我就用佐「三湯匙嘅麵粉、大約80ml嘅清水」材料係好少㗎。

做法：

1、三湯匙麵粉準備好，一小小撮鹽俾味。

2、倒入80-100ml嘅清水

3、用筷子快速同一方向攪拌

4、攪好嘅麵團放置一邊醒十分鐘左右。

依個時候可以準備其它材料：

蕃茄一個、蛋一個打散、蔥切粒

煮法：

1、晏晝整梅菜肉餅，凈返少少生肉餅，咁就先用少少油，略炒至斷生，然後倒入蕃茄，炒成蓉。

2、蕃茄炒蓉之後，加清水入去，煮滾，俾少少雞粉。

3、水煮滾之後，筷子沾少少清水，然後挾少少麵粉出嚟，形狀隨意，我會將佢拉成長形再擺入湯度，將麵粉放入煮滾蕃茄湯內，一定要湯滾時先放麵團，因為高溫沸騰下，麵粉一落水就可以即刻定型唔會散開。

4、所有麵疙瘩都放入水後，煮多二三分鐘，倒入蛋液同一方向攪幾下即熟，就可以熄火。

5、熄火後，俾少少鹽同胡椒粉調味。

6、撒入一把蔥花，少少麻油~~~

食得~~~

前後十五分鐘左右搞掂。。。

原來咁簡單~~~~

真係超正啊依款麵食。。。

麵疙瘩同我想像中一樣嘅效果，滑一滑，Q一Q，咬落好食得到麵粉天然嘅香味，配埋酸酸香香滑滑嘅蕃茄雞蛋湯，真係得意到不得了。。。。。

我覺得煮俾小朋友食，一定會好鐘意~~~

個麵粉嘅份量，剛剛好煮夠一碗，如果屋企人多嘅，可以適當增加份量。

 

惹味黑椒雞扒通

今日周日強哥都要同客見面。

諗住強哥要下晝先返到嚟，咁晏晝自己先食佐嘢。

點知過得一陣，強哥俾電話我，同客講完公事，佢會返嚟同我食晏。

見雪櫃有一舊早一日醃落嘅黑椒雞扒，都咁足夠老公份食啦，咁就叫老公先返嚟屋企先。

然後即刻開工整個好好味嘅Lunch 俾佢。

雞扒用佐「李記黑椒醬、白酒、糖、鹽、蒜蓉」醃一日。

然後好簡單地，放入煎Pan兩面煎至香脆，其間蓋埋蓋，等佢熟透，可以用牙籤試刺入雞肉，如果有血水滲出嚟，就未熟要繼續煎。

煎熟之後，擦一層蜜糖係面，再開大火煎至兩面香脆，食時淋黑椒醬伴食。

煎雞扒嘅同時，另外用個碗仔，淥熟啲通粉同西蘭花。

原碗，再落啲「豉油、蜜糖、水、黑椒醬、蒜蓉、生粉水」

煮一個蒜香黑椒醬。

叮咚。。。。

門鐘聲響，老公返到屋企。。。。

未入廚房先問我「老婆，好香嘅味道，係我啲屋企嘅煮緊嘢咩」

等我將碟擺出餐檯，強哥已經勁開心「睇到都覺得好好味啊」

生煎黑椒雞扒餐，雞扒味道好足，煎到外脆內嫩，絕對唔會輸蝕俾出邊餐廳㗎~~~

食完嘢，陪老公落街飛髮，原本計劃係去食薄餅，諗諗下驚人多，就返嚟之前順便買半邊琵琶鴨返嚟做晚餐比較簡單。

因為無咁早食飯，盒鴨凍佐，咁就將鴨撥過隻碟，然後焗爐預熱二百度，等焗爐熱啲，就熄火，然後碟鴨擺入去，用焗爐餘溫整返熱碟鴨，咁樣返熱，又唔會令到鴨皮變腍，又可以食到微熱嘅肉，幾好㗎。。。。

琵琶鴨較燒鴨乾身，不過比燒鴨多佐醬香味，各有風味，都OK㗎。。。。

師奶就係師奶，落街陪老公飛髮之嘛，都可以買到份夜香花返嚟，夜晚滾個湯飲下。。。。

加埋瘦肉，清清哋幾好~~

一碟飯一碗湯半邊鴨

一個晚餐~~

 

 

咸檸豉汁蒸倉魚

我強哥「蝦蟹食佐會過敏，淡水鱼唔食，多骨海魚唔鐘意，啖啖肉唔嫩唔食，蒸魚麻麻，殼類海鮮驚有寄生蟲~~」

唉，為人妻，煮餐飯，甚艱難~~~

所以平時我幾乎唔煮海鮮，都好嘅，其實自己都一般般鐘意。

好彩，海鮮唔易煮，強哥對雞鴨豬牛羊都總算係無乜抗拒，唯有平時買啲簡單常見嘅餸嚟煮。

不過耐唔耐，強哥又想話食下魚喎，咁蒸魚佢麻麻鐘意，咁我就蒸啲味道惹味啲嘅，魚要啖啖肉，又滑嫩，無乜骨嘅，捨倉魚總可以其誰咧。。。。

咁就整一味「咸檸蒜蓉豆豉蒸倉魚」

用大孖嘅蒜蓉豆豉醬嚟整，已經加佐調味炒好香味，所以無需額外再加工，直接一大湯匙嘅蒜蓉醬，再加一粒細粒啲嘅咸檸檬。

落佐咸檸檬，成款餸變得好特別，酸酸香香，配埋嫩滑魚肉，係非常非常一流㗎。。。。

我都係第一次試咁整，係因為有一次我整檸檬鴨返去奶奶度大家一起食，老爺鬼咁鐘意檸檬鴨嘅醬汁，係咁用倉魚去點檸檬汁食，咁我試過之後，發覺原來味道真係好格喎，所以咪就蒸依味餸嘅時候，加埋咸檸檬剁碎入去，撈埋一起蒸~~~

煮餐飯，如果順序安排得好，係可以大大縮減煮餐飯嘅難度同時間㗎。

好似今餐，我先蒸飯，咁蒸飯嘅同時，準備蒸魚嘅材料，切埋豆卜，洗好芽菜，然後所有材料排好隊，一個一個嚟。

飯蒸好後取出，利用同一個鑊，有埋水有蒸氣，順勢蒸埋條魚，蒸佐8分鐘左右，將魚取出，鑊里邊嘅水倒走，過一過清水，再開大火焗干水份，倒幾湯匙嘅油入去，開大火燒滾油，條蒸好嘅倉魚，擺埋少少蔥花，淋滾油入去，一味餸搞掂~~~

跟手已經有佐油嘅鑊，可以直接一路炒埋碟芽菜。。。。

煮餐飯連切帶洗，半個鐘多少少，就開得飯啦~~~

最緊要，全程都隻不過一隻鑊就搞掂啦~~~

碟魚唔凈止睇得，總好好味添㗎~~~

碟炒芽菜，落埋豆卜，加埋一碗仔肉醬，簡單又清爽`~~

咁就兩餸一白飯，一個晚餐~~~