自製薑茶（食譜）

阿媽最鐘意講笑咁叫我「Doctor Kwan」，因為自細就好鐘意留意下各類病症同埋相應嘅民間治療方法。其實完全係一种興趣嚟嘅，咁多年嚟記記埋埋，本薄仔都記錄佐好多中醫嘅小偏方係度。

其實有些少嘅醫學常識係好事嚟嘅，自己遇上有咩頭暈身興，就算睇醫生，可以將自己嘅症狀更清楚明了地表達俾醫生聽，對醫生做出判斷同診療都會有好大幫助㗎。

依排強哥成日一食飽飯就要去廁所，腸胃好唔掂。

依排天氣又濕又熱，飲得凍嘢又多，我估可能係腸胃有啲寒氣，加埋自己都覺得身體有些少不適，所以就整佐一樽薑茶，倆公婆都好適合飲用嘅一個食療方法。

做法：

1，準備「黑糖250g、生薑250g」

材料就係咁簡單，兩樣搞掂~~

太繁複我就唔介紹啦，簡單得嚟又有益，先介紹俾大家知嘛~~

 

2，生薑切粒，放入攪拌機，加少少水（大約50ml），攪至變蓉。

3，將黑糖倒入，攪多二三下，等糖同薑融埋一起。

 

4，將撈好嘅薑同糖，置於碟上，隔水蒸40分鐘，搞掂~~

 

剛剛好入哂一樽~~~

唔同嘅病症，食唔同嘅次數。

好似強哥咁，係因為佢腸胃不適，所以我就俾佢一日飲一次，晚上瞓覺前飲。

每次一湯匙，然後衝大約200ml嘅暖水，開成半杯一次飲完。

基本上，飲完二次就可以見到成效。

 

好多人誤會薑茶係冬天飲先最好，可以驅寒。

其實一年四季飲用都絕無問題，特別係女士，依款薑茶嘅好處，數之不儘。

我家族遺傳，來潮即短且量少，其實唔係咁好嘅，而依款薑茶，可以好有效咁增加身體排毒嘅能力，對子宮係好好嘅一個天然清掃劑，而且女人容易有斑嘅問題，依款薑茶，薑入邊含有嘅澱粉質同各種胺基酸，可以極好地抑制斑點係皮膚嘅形成速度，可以話係好好嘅美容產品。

睇過一本醫書記載，醫治女士因為子宮冷而無法受孕有一個極好嘅食療方法，就係飲用我講嘅依種方法所制出嚟嘅薑茶，製作方法如上邊所講，而飲用嘅方法，就係由經期果日開始飲用，每日三次，每次用一湯匙薑糖加200ml水開成嘅薑茶，連續飲一個月，其間唔可以行房，有特效。

我依次做嘅量，如果一日飲三次，大約可飲半個月左右，係咪平靚正咧~~~

我做為平日保健身體咁飲用，都係一日飲一次，對預防感冒都好好㗎~~~

依排晚晚開冷氣瞓覺，我都好驚一個唔小心會感冒，咁先預防下，都係好嘅~~~

 

且不講佢嘅各種功效，就係味道，唔抗拒薑嘅人，大約都會鐘意依個飲品~~~

最後多口講句，黑糖本身嘅鈣含量，係白糖嘅30倍~~~

 

後記：強哥連續飲佐兩日，早晚各一次之後，由最初嘅溏便，到依家已經可以成型，俾到佢好大信心，繼續飲用。。。。