一魚三味之二餸一湯

端午節雖然提早幾日出街食佐，不過正日依日，得閒嘅幾個都依然會返屋企食餐飯，始終一家人係屋企食，食飽之後大家座埋食下生果，講下是非，比起係酒樓食完拍拍屁股就走人，要嚟得更有家庭嘅感覺。

老爺係漁排帶佐條斑落嚟，片佐好勁大一舊魚扒俾我帶返屋企食。

真係超大一舊啊。。。。

一餐要食哂，獨沽一味似乎會太悶，於是，一分為三~~~

整佐二餸一湯：麒麟蒸斑片、面豉煮魚、味噌荽莤魚片湯

 

 

一部份切條狀（用胡椒鹽酒醃味），一部份片厚片，中間再切多一刀（同樣用胡椒鹽酒醃好味），最後嘅部份，保留大大一舊（用韓國面豉同酒醃味）

 

先嚟整個「麒麟蒸斑片」

首先魚片切厚片，然後中間開一刀。

然後胡椒鹽酒略醃味。

 

跟住就好簡單，片好嘅魚，中間夾一塊火腿，舖係碟上。

最後，係面舖蒜蓉同油蔥酥（比落炸蒜總要香）

上鑊隔水蒸6分鐘。

蒸好之後取出，落少少荽莤或蔥，淋蒸魚豉油，倒熟油係面，搞掂~~~

 

蒸得時間剛剛好，食落斑片好嫩，配埋火腿嘅香，加埋蒜同豉油嘅味，非常非常一流嘅一味蒸餸----「麒麟蒸斑片」

 

另一味餸，係成舊嘅魚，想惹味啲，香口啲，咁就整佐一味「面豉煮魚」

先用韓國面豉同酒醃入味，然後用油爆香薑絲，魚落鑊，煎至表皮香脆，加少少水，蓋上蓋焗一二分鐘至熟，撒一把糖落去，中和返面豉嘅咸，開大火煮至汁變結，搞掂~~~

 

一擺上檯，老公話「斑都可以整到咁西式嘅」~~~

另一種食法啦。。。。

因為太厚我煮得耐佐少少，所以食落，無蒸斑片咁滑係必定㗎啦，勝在味道夠惹味，下次轉用其它魚嚟煮，效果應該總好~~

最後，滾一個荽莤豆腐魚片湯~~~

落佐赤味噌，啖湯變得好日式。。。。。

 

好囉，搞掂咁大舊魚，安樂哂`~~

因為我同強哥都唔太鐘意食魚，所以平時真係好少整嚟食，唔想嘥佐舊魚，逼住整佐餐全魚宴~~~

對於好魚嘅人嚟講，喱餐一定好歡喜~~~~

 

搞掂~~